Read Ngaju YOHANES 16 Bible Online

YOHANES 16 - Ngaju bible

YOHANES 16

¹Kare taloh handiai te insanang-Ku akan keton mangat keton dia layau.

²Keton kareh impalua oloh bara kare huma sombayang. Tuntang katikae kareh dumah, oloh je mampatei keton manyangka arepe manempo Hatalla.

³Ewen manguan taloh te mawi keton awi ewen hindai kasene Bapa tuntang Aku kea.

⁴Tapi Aku toh mansanan jete akan keton, mangat amon jete kareh manjadi, keton tau mingat je Aku toh jari mansanan jete akan keton.” “Aku dia mansanan hal toh akan keton bara solake, awi Aku magon aton hinje keton.

⁵Tapi toh Aku handak haguet manalih Ie je manyoho Aku; tuntang ije biti mahin jaton bara keton misek akan kueh Aku haguet.

⁶Toh atei keton manjadi pehe, awi Aku mansanan hal te akan keton.

⁷Tapi Aku mansanan akan keton taloh je toto: labih bahalap akan keton amon Aku haguet; basa amon Aku dia haguet, Pandohop te dia akan dumah manalih keton. Tapi amon Aku haguet, Aku kareh manyoho Ie manalih keton.

⁸Amon Ie dumah, Ie kareh mamparahan akan kalunen narai riman dosa, tahiu taloh je toto, tuntang tahiu hukuman Hatalla.

⁹Ie kareh mamparahan amon oloh dia percaya dengang-Ku jete dosa;

¹⁰auh-Ku toh toto, awi Aku haguet manalih Bapa tuntang keton dia akan mite Aku tinai;

¹¹tuntang Hatalla jari nampara mahukum, basa panguasa kalunen jetoh jari buah hukum.

¹²Magon are taloh je handak insanang-Ku akan keton, tapi metoh toh keton hindai olih manarimae.

¹³Tapi amon Roh te dumah, Ie te je mamparahan katoto tahiu Hatalla, keton kareh ingagalan Awie uka mangasene kakare katoto. Ie dia handak hakotak bara Arepe kabuat tapi mansanan taloh je jari ihining Awie, tuntang Ie kareh mansanan akan keton taloh je akan manjadi rahian andau.

¹⁴Ie kareh mampahai Aku, basa taloh je inyampai Awie akan keton, inarimae bara Aku.

¹⁵Taloh handiai je aton intu Bapa jete ayung-Ku. Jete bukue Aku hamauh, taloh je inyampai Roh akan keton, inarimae bara Aku.”

¹⁶“Baya hanjulo keton dia akan mite Aku tinai, tuntang hanjulo tinai keton akan mite Aku.”

¹⁷Pire-pire murid Yesus nampara hisek sama arepe, “En Koae je hamauh dengan itah: ‘Baya hanjulo hindai keton dia tinai mite Aku, tuntang tinai hanjulo hindai keton akan mite Aku’? En je koae dengan itah: ‘Aku haguet manalih Bapa’?”

¹⁸Ewen bajuju misek, “Narai rimae je ‘hanjulo’ te? Itah dia haratie Ie hakotak tahiu en!”

¹⁹Yesus katawan ewen handak misek dengae. Maka Ie hamauh, “Endau koang-Ku, ‘Baya hanjulo hindai, keton kareh dia mite Aku, tuntang kea hanjulo tinai keton kareh mite Aku’. En jete je iisek keton sama arep keton?

²⁰Percaya ih, keton kareh manangis tuntang manatum, tapi kalunen kareh hanjak. Keton kareh kapehe atei, tapi kasusah keton te kareh hobah manjadi kahanjak.

²¹Amon ije biti oloh bawi handak luas, ie susah, awi katikae jari sampai ie buah kapehe. Tapi sana anake inakan oloh bawi te kalapean kapehee awi ie hanjak tagal ije biti awau inakan akan kalunen.

²²Kalote kea dengan keton: Toh keton kapehe atei, tapi Aku kareh hasondau tinai dengan keton, maka atei keton kareh hanjak; tuntang ije biti mahin jaton oloh je tau manduan kahanjak te bara atei keton.

²³Hong andau te, keton dia akan misek taloh en-en hindai dengang-Ku. Percaya ih: en bewei taloh je ilaku keton dengan Bapa huang arang-Ku, jete kareh inenga Bapa akan keton.[35]

²⁴Sampai katika toh keton hindai balaku taloh en-en huang arang-Ku. Laku, maka keton akan manarimae, mangat kahanjak keton tinduh barasih.”

²⁵“Taloh handiai toh insanang-Ku akan keton hapan paribasa. Tapi kareh dumah katikae, Aku dia mahapan paribasa hindai, tapi hakotak tarus-tarang akan keton tahiu Bapa.

²⁶Hong katika te keton kareh balaku dengan Bapa huang arang-Ku; keleh keton katawan, Aku kareh dia balaku bara Bapa akan keton,

²⁷awi Bapa kabuat sinta keton. Ie sinta keton awi keton sinta Aku tuntang percaya je Aku toh dumah bara Hatalla.

²⁸Asal-Ku puna bara Bapa, tuntang jari dumah akan kalunen. Tapi toh Aku malihi kalunen mangat haluli manalih Bapa.”

²⁹Palus kare murid Yesus hamauh Dengae, “Toh Tuhan hakotak tarus-tarang tuntang dia mahapan paribasa,

³⁰tuntang ikei katawan je Tuhan mangatawan taloh handiai. Ije biti mahin dia usah oloh misek taloh en-en dengan Tuhan. Tagal te ikei percaya Tuhan dumah bara Hatalla.”

³¹Yesus tombah auh ewen, “Jadi percayakah keton toh?

³²Ingat! Katikae kareh dumah, malah jari dumah, keton kareh manjadi kasaburan. Keton kareh buli mije-mije manalih human keton tuntang malihi Aku kabuat. Tapi Aku dia kabuat basa Bapa aton hinje Aku.

³³Taloh handiai toh insanang-Ku mangat keton mandino kahanjak awi keton hinje dengang-Ku. Hong kalunen keton kareh buah kapehe. Tapi keleh keton tanggar atei! Aku jari mampakalah kalunen!”