Read Ngaju YOHANES 17 Bible Online

YOHANES 17 - Ngaju bible

YOHANES 17

¹Limbah hamauh kalote, Yesus mananggera akan langit tuntang hamauh, “Bapa, toh jari sampai katikae. Keleh mampahai Anak Ayum, mangat Anak Ayum kea mampahai Bapa.

²Bapa jari manenga kuasa akan Anak mahunjun kakare oloh hapus kalunen, mangat Ie manenga pambelom je bujur tuntang katatahie akan kare oloh je inenga Bapa akae.

³Jetoh pambelom je bujur tuntang katatahie; uka oloh je mangasene Bapa je tunggal tuntang toto, tuntang mangasene Yesus Kristus je inyoho Bapa.

⁴Aku jari mampahai Bapa hunjun petak toh awi-Ku mahapus gawi je inyoho Bapa Aku mawie.

⁵Bapa! keleh toh mampahai Aku intu taharep Aim mahapan kahai je aton intu Aku metoh Aku hinje dengan Bapa helo bara kalunen toh injadian.

⁶Aku jari mamparahan Bapa akan kare oloh hong kalunen toh kilau je jari inenga bapa akang-Ku. Ewen toh ain Bapa, tuntang Bapa jari manenga ewen te akang-Ku. Ewen jari manumon auh Bapa.

⁷Toh ewen katawan, taloh handiai je inenga Bapa akang-Ku jete asale bara Bapa.

⁸Akan ewen jari inyampai-Ku auh je inenga Bapa akang-Ku; tuntang ewen jari manarimae. Ewen katawan je Aku toh puna toto-toto dumah bara Bapa tuntang ewen percaya Bapa bewei je manyoho Aku.

⁹Aku balakudoa akan ewen. Aku dia balakudoa akan kalunen tapi akan kare oloh je jari inenga Bapa akang-Ku, basa ewen te ain Bapa.

¹⁰Kare taloh je ayung-Ku jete ayun Bapa kea; tuntang taloh handiai je ayun Bapa jete ayung-Ku kea. Aku impahai hong marak ewen.

¹¹Toh Aku dumah manalih Bapa. Aku dia tinai melai hong kalunen; tapi ewen aton hong kalunen. Bapa ije barasih! Jaga ewen hapan kuasan Aram, iete Aran je jari inenga Bapa akang-Ku[36] — mangat ewen manjadi ije, sama kilau Bapa tuntang Aku kea ije.

¹² Katahin Aku magon hinje ewen, Aku jari manjaga ewen hapan kuasan aran Bapa — aran je jari inenga Bapa akang-Ku.[37] Aku jari manjaga ewen tuntang ije biti mahin jaton bara ewen je nihau, beken bara ie je puna jari musti nihau; uka tagal jete maka manjadi taloh je tarasurat huang Surat Barasih.

¹³Toh Aku dumah manalih Bapa. Taloh handiai toh insanang-Ku pandehan Aku magon huang kalunen; uka ewen hapan sakalepahe mangkeme kahanjak-Ku.

¹⁴Aku jari manyampai akan ewen auh Bapa, tuntang kalunen basingi dengan ewen, awi ewen dia ain kalunen, sama kilau Aku kea dia ain kalunen.

¹⁵Aku dia balaku uka Bapa manduan ewen bara kalunen toh, tapi Aku balaku uka Bapa manjaga ewen bara taloh je papa.

¹⁶Sama kilau Aku dia ain kalunen, ewen mahin dia ain kalunen.

¹⁷Keleh ewen manjadi ain Bapa kabuat mahalau katoto: auh Bapa jete katoto.

¹⁸Kilau Bapa jari manyoho Aku akan kalunen, kalote kea Aku manyoho ewen akan kalunen.

¹⁹Akan gunan ewen, Aku manyarah arep-Ku kilau je ain Bapa kabuat, mangat ewen kea manjadi ain Bapa mahalau katoto.

²⁰Dia baya akan ewen toh bewei Aku balakudoa. Aku balakudoa kea akan kare oloh je kareh percaya dengang-Ku tagal kasaksian ewen toh.

²¹Aku balaku, Bapa, uka ewen samandiai manjadi ije, kilau Bapa ije dengang-Ku, tuntang Aku dengan Bapa. Keleh ewen manjadi ije dengan itah uka kalunen percaya je Bapa te je manyoho Aku.

²²Aku jari manenga akan ewen kahai je inenga Bapa akang-Ku, mangat ewen manjadi ije, sama kilau itah kea ije;

²³Aku dengan ewen, tuntang Bapa dengang-Ku; mangat ewen toto-toto ije. Maka kalunen kareh katawan Bapa te je manyoho Aku, tuntang mangatawan Bapa sinta ewen kilau Bapa sinta Aku.

²⁴Bapa, Aku handak uka ewen, je inenga Bapa akang-Ku, aton hinje Aku hong kueh Aku aton, mangat ewen mite kahaing-Ku; iete kahai je inenga Bapa akang-Ku, awi Bapa sinta Aku helo bara kalunen injadian.

²⁵Bapa je adil! Kalunen dia mangasene Bapa, tapi Aku mangasene Bapa; tuntang kare oloh toh katawan je Bapa manyoho Aku.

²⁶Aku jari mamparahan aran Bapa akan ewen; tuntang Aku kareh mawie tinai kalote, uka sintan Bapa dengang-Ku tetep intu huang atei ewen tuntang Aku hinje dengan ewen.”