Read Ngaju YOHANES 18 Bible Online

YOHANES 18 - Ngaju bible

YOHANES 18

¹Limbah Yesus balakudoa kalote, Ie dengan kare murid Ayue haguet akan dipah silan Sungei Kidron. Hong hete aton ije taman, tuntang Yesus dengan kare murid Ayue tame akan taman te.

²Yudas je mandarhaka te, katawan eka te; awi Yesus jari kinjap hapumpong hete dengan kare murid Ayue.

³Maka Yudas haguet akan eka te hayak mimbit ije pasukan tantara Roma tuntang pire-pire pangawal Human Tuhan je inyoho kare imam kapala tuntang kare oloh Parisi. Ewen mimbit sanjata, lantera tuntang sulok.

⁴Yesus katawan taloh handiai je akan manjadi buah Ie. Maka Ie manokep kare oloh te tuntang misek, “Keton manggau eweh?”

⁵“Yesus oloh Nasaret,” koan ewen tombah. “Aku toh Ie,” koan Yesus. Yudas je mandarhaka mendeng intu hete dengan ewen.

⁶Metoh Yesus hamauh dengan ewen, “Aku toh Ie,” ewen uras mundur palus balongkang.

⁷Sinde tinai Yesus misek dengan ewen, “Keton manggau eweh?” “Yesus oloh Nasaret,” koan ewen tombah.

⁸“Jari insanang-Ku Aku toh Ie,” koan Yesus. “Tuntang amon puna Aku je inggau keton, nauhe ewen awang beken toh haguet.” (

⁹Awie hamauh kalote, maka manjadi taloh je jari insanan Yesus helo te: “Bapa, bara kare oloh je jari inenga Bapa akang-Ku, ije biti mahin jaton je nihau.”)

¹⁰Simon Petrus je mimbit ije kabilap padang, manyilak padange palus manejep jipen imam hai sampai balumpeng pinding gantaue. Aran jipen te Malkus.

¹¹ Maka Yesus hamauh dengan Petrus, “Namean haluli padangm akan huang ekae! En ikau manirok Aku dia kareh mihop cangkir kajake je inenga Bapa akang-Ku?”

¹²Palus kare prajurit Roma dengan komandan ewen tuntang kare pangawal Yehudi manawan tuntang mamasong Yesus.

¹³Sola-solake ewen mimbit Yesus manaharep Hanas, empo Kayapas je hatue. Kayapas te imam hai hong nyelo te.

¹⁴ Ie te je jari manasehat oloh Yehudi uka labih bahalap ije biti oloh matei akan salepah bangsa.

¹⁵Simon Petrus tuntang ije biti murid beken manuntut Yesus. Murid je beken te kasenan awi imam hai; jadi ie omba tame haya-hayak dengan Yesus akan halaman human imam hai,

¹⁶tapi Petrus mentai intu luar hong bauntonggang. Limbah te tinai murid je beken te haguet akan luar tuntang hakotak dengan jipen bawi je manjaga bauntonggang, palus mimbit Petrus tame akan huang.

¹⁷Jipen bawi panjaga bauntonggang te hamauh dengan Petrus, “Hau, en ikau dia ije biti bara kare murid oloh te?” “Beken,” koan Petrus tombah.

¹⁸Hong katika te hawa sadingen, jadi kare jipen tuntang pangawal jari mambelom apui habarah tuntang ewen mandang intu hete. Petrus haguet akan hete tuntang mendeng hayak mandang dengan ewen.

¹⁹Imam hai misek Yesus tahiu kare murid Ayue tuntang tahiu auh ajar Aie.

²⁰Yesus tombah, “Aku harajur hakotak tarus-tarang hong taharep oloh are. Aku harajur majar huang kare huma sombayang tuntang intu Human Hatalla, eka oloh Yehudi bahut hapumpong. Dia puji Aku mansanan taloh en-en sahoka-hokan.

²¹Jadi mbuhen Tuan misek Aku? Isek ih dengan ewen je jari mahining Aku majar. Pasti ewen katawan taloh je insanang-Ku.”

²²Metoh Yesus hakotak kalote, ije biti bara pangawal intu hete manampar Ie tuntang hamauh, “Bahanyi toto ikau hamauh kalote dengan imam hai!”

²³Yesus tombah, “Amon Aku mansanan taloh je sala, sanan hetoh narai kasalae! Tapi amon taloh je insanang-Ku te puna toto, mbuhen ikau manampar Aku?”

²⁴Limbah te tinai Hanas manyoho oloh mimbit Yesus marak lengee imasong akan Imam Hai Kayapas.

²⁵Simon Petrus magon kea mandang arepe intu hete. Kare oloh hamauh dengae, “En ikau dia murid oloh te kea?” Tapi Petrus milim, koae, “Beken!”

²⁶Ije biti oloh ain imam hai, iete jalahan oloh je balumpeng pindinge awi Petrus, hamauh, “En dia Aku jari mite ikau hong taman te haya-hayak dengae?”

²⁷Palus Petrus milim tinai, “Dia,” — tuntang pas hong katika te manok manando.

²⁸Hayak hanjewu toto ewen mimbit Yesus bara human Kayapas akan istana gubernur. Kare oloh Yehudi kabuat dia tame akan huang istana, mangat ewen dia inyewut pali secara agama, awi ewen handak omba kuman panginan Paska.

²⁹Tagal te Pilatus haguet akan luar manalih ewen tuntang misek, “En auh kadun keton mawi oloh toh?”

³⁰Ewen tombah, “Jaka Ie dia basala, dia baka ikei mimbit Ie manalih Bapa Gubernur.”

³¹Pilatus hamauh dengan ewen, “Duan ih Ie tuntang mutus ih perkarae manumon hukum ain keton kabuat!” Tapi kare oloh Yehudi te tombah, “Ikei dia tau mamutus oloh akan impatei!” (

³² Jetoh manjadi uka ilalus taloh je insanan Yesus tahiu carae Ie akan matei.)

³³Pilatus tame tinai akan istana tuntang mantehau Yesus, palus misek, “En ikau toh rajan oloh Yehudi?”

³⁴Yesus tombah, “En paisek toh bara ikau kabuat atawa aton oloh beken je jari mansanan akam tahiu Aku?”

³⁵Pilatus tombah, “En Aku toh oloh Yehudi? Je manyarah ikau akang-Ku iete bangsa ayum kabuat tuntang kare imam kapala. En taloh je jari iawim?”

³⁶Yesus hamauh, “Karajaan ayung-Ku dia bara kalunen toh. Jaka karajaang-Ku te bara kalunen toh, kare oloh ayung-Ku kareh kalahi uka Aku dia inyarah akan kare panguasa Yehudi. Tapi karajaang-Ku puna dia bara kalunen toh!”

³⁷Maka Pilatus misek dengae, “Amon kalote, ikau toh raja?” Yesus tombah, “Ikau manyewut je Aku toh raja. Aku inakan tuntang dumah akan kalunen akan ije maksud, iete manenga kasaksian tahiu katoto. Oloh samandiai je bara katoto te mahining auh-Ku.”

³⁸Pilatus misek dengae, “Katoto te en rimae?” Palus Pilatus balua tinai bara istana tuntang hamauh dengan kare oloh Yehudi, “Ije mahin jaton aku sondau kasalan huang Ie.

³⁹Tapi manumon hadat keton, aku harajur malapas ije biti oloh bara tahanan hong andau Pesta Paska. En keton handak mangat aku malapas rajan oloh Yehudi te akan keton?”

⁴⁰Ewen tombah dere-derep hayak mangkariak, “Dia, ela Ie, tapi Barabas!” (Barabas te ije biti parampok.)