Read Ngaju YOHANES 19 Bible Online

YOHANES 19 - Ngaju bible

YOHANES 19

¹Limbah te tinai Pilatus tame palus manyoho oloh mahewes Yesus hapan cambuk.

²Kare prajurit manampa ije makota bara kare pating je baduhi, palus mangkepae intu hunjun takolok Yesus. Limbah te ewen makaian Ie hapan jubah je warnae kawo-kawo,

³palus lulang luli dumah manalih Ie tuntang hamauh, “Panjang umur rajan oloh Yehudi!” Limbah te ewen manampar Ie.

⁴Limbah te Pilatus balua sinde tinai tuntang hamauh dengan oloh are te, “Ite! Aku mimbit Ie balua manalih keton, uka keton katawan je ije mahin jaton kasalan inyondau-Ku huang Ie.”

⁵Maka Yesus balua sambil mahapan makota duhi tuntang jubah kawo-kawo. Pilatus hamauh dengan ewen, “Ite oloh te.”

⁶Katika kare imam kapala tuntang kare pangawal te mite Yesus, ewen mangkariak, “Nyampalaki Ie! Nyampalaki Ie!” Pilatus hamauh dengan ewen, “Duan Ie, nyampalaki Ie awi keton kabuat ih, ije mahin jaton kasalan je sondau-Ku intu Ie.”

⁷Kare oloh Yehudi te tombah, “Manumon hukum ikei, Ie musti ihukum matei awi Ie mangaku arepe Anak Hatalla.”

⁸Katika Pilatus mahining ewen hamauh kalote, ie labih mikeh haream.

⁹Maka ie tame haluli akan huang istana tuntang limbah Yesus iimbit tame, Pilatus misek dengae, “Ikau asalm bara kueh?” Tapi Yesus dia tombah.

¹⁰Jadi Pilatus hamauh tinai, “Ikau dia handak hakotak dengang-Ku. Keleh ikau katawan, aku aton kuasangku mambebas ikau, tuntang kuasa manyampalaki ikau!”

¹¹Yesus tombah, “Amon Hatalla dia manenga kuasa te akam, ikau samasinde jaton kuasam mahunjun Aku. Tagal te oloh je manyarah Aku akam, labih hai dosae bara ikau.”

¹²Katika Pilatus mahining jete, ie manggau jalan uka malapas Yesus. Tapi kare oloh Yehudi dere-derep mangkariak, “Amon tuan mempas ie, tuan dia hindai kawal Kaisar! Oloh je mangaku arepe raja, Ie te musoh Kaisar!”

¹³Katika Pilatus mahining kare auh te, ie mimbit Yesus akan luar palus mondok intu karusi pangadilan hong eka je bagare Laseh Batu. (Hong basa Ibrani arae te Gabata.)

¹⁴Katika te jari tokep pukul duewalas bentok andau, jete andau helo bara Andau Pesta Paska. Pilatus hamauh dengan kare oloh te, “Jetoh rajan keton!”

¹⁵Ewen dere-derep mangkariak, “Patei Ie! Patei Ie! Nyampalaki Ie!” Pilatus misek, “En musti aku toh manyampalaki rajan keton?” Kare imam kapala tombah, “Tikas Kaisar kabuat ih rajan ikei!”

¹⁶Maka Pilatus manyarah Yesus akan ewen uka inyampalaki. Ewen manduan Yesus, palus mimbit Ie haguet.

¹⁷Yesus balua hayak meton sampalakie kabuat akan eka je bagare “Eka Bangon Takolok”. (Hong basa Ibrani inyewut Golgota).

¹⁸Intu hete Ie inyampalaki. Haya-hayak Dengae aton due biti oloh beken je inyampalaki: ije biti hong sambil Ie, ije tinai hila gantaun Ayue tuntang Yesus hong bentok.

¹⁹Intu kayu sampalakin Yesus, Pilatus manyoho oloh mangkepan papan basurat: “Yesus bara Nasaret, Rajan oloh Yehudi”.

²⁰Are oloh Yehudi mambasa surat te, awi eka Yesus inyampalaki te dia kejau bara lewu. Surat te huang basa Ibrani, Latin, tuntang Yunani.

²¹Kare imam kapala hamauh dengan Pilatus, “Ela manyurat ‘Rajan oloh Yehudi’, tapi keleh manyurat ‘Oloh toh hamauh, Aku Rajan oloh Yehudi.’ ”

²²Tapi Pilatus tombah, “Taloh je inyuratku, tetep tarasurat.”

²³Limbah kare prajurit te manyampalaki Yesus, ewen manduan pakaiae. Pakaian te imbagi epat: genep biti mandino ije bagian. Ewen manduan jubahe kea. Jubah te jaton bajahit — baya inantang bara hunjun sampai kapenda.

²⁴ Kare prajurit te hamauh sama arepe, “Ela itah manetek mambagi jubah toh. Keleh itah batenong mangat manukas eweh je tau mandinoe.” Hal te manjadi uka tulus auh je tarasurat huang Surat Barasih, iete: “Ewen habagi pakaiang-Ku, tuntang batenong akan jubah-Ku.” Tuntang kare prajurit te puna mawie kalote.

²⁵Hong tokep sampalakin Yesus mendeng indu Yesus, paharin indue je bawi, Maria sawan Kleopas, tuntang Maria Magdalena.

²⁶Katika Yesus mite indue tuntang murid je inyintae aton mendeng hete, Ie hamauh dengan indue, “Umai, te anakm.”

²⁷Limbah te Yesus hamauh dengan kare murid Ayue te, “Te indu keton.” Bara katika te kare murid te manarima indu Yesus uka melai intu humae.

²⁸ Yesus katawan taloh samandiai toh jari lepah manjadi, tuntang uka taloh je tarasurat huang Surat Barasih tau manjadi, Ie hamauh, “Aku teah belai-Ku.”

²⁹Intu hete aton ije mangkok kontep inyuang hapan danum anggor je masem. Maka ije kambang karang inculop akan huang danum anggor te, tuntang inyucok intu ije tantahan hisop, palus injuju akan biwih Yesus.

³⁰Yesus manyurop danum te palus hamauh, “Jari hapus!” Palus Ie manyontop takolok Aie balalu mahutos.

³¹Kare panguasa Yehudi dia maku hantun kare oloh je inyampalaki te tetep melai intu kayu sampalaki hong andau Sabat, mahin haream Sabat sinde toh Andau Hai je patut ihaga barasih. Karana andau metoh Yesus inyampalaki buah andau helo bara Sabat te, maka kare oloh Yehudi balaku permisi dengan Pilatus uka mamelek kare pain oloh je jari inyampalaki tuntang mampamohon kare hantu te bara kayu sampalaki.

³²Maka kare prajurit te haguet tuntang mamelek labih helo pain due oloh je inyampalaki hayak Yesus.

³³Katika ewen sampai akan gilir ain Yesus, ewen mite Ie jari mahutos. Jadi ewen dia mamelek paie.

³⁴Tapi ije biti bara kare prajurit te mamuno penda usok Yesus hapan lunju; tuntang hemben te kea balua daha tuntang danum.

³⁵Oloh je mite kabuat kajadian te, ie te je mansanan hal te mangat keton percaya.[38] Tuntang kasaksiae te toto, tuntang ie katawan jete toto.

³⁶ Hal te manjadi uka ilalus taloh je tarasurat huang Surat Barasih, iete, “Ije mahin jaton bara kare tolang Ayue kareh imelek.”

³⁷ Huang Surat Barasih kea tarasurat, “Ewen kareh manampayah Ie je jari imuno ewen”.

³⁸Limbah te tinai Yosep oloh Arimatea balaku permisi dengan Pilatus uka manduan hantun Yesus. (Yosep jete murid ain Yesus je omba Ie suni-suni, awi ie mikeh dengan kare panguasa Yehudi.) Pilatus manenga ijin akae, maka ie haguet manduan hantun Yesus.

³⁹ Nikodemus je bihin puji manalih Yesus metoh hamalem, haguet kea hayak Yosep. Nikodemus mimbit rarampah iete mur tuntang garo — samandiai taloh je iimbite te aton kurang labih telo puluh kilogram karee.

⁴⁰Kadadue oloh te manduan hantun Yesus palus mambungkuse hapan benang haya-hayak dengan rarampah je harum te manumon hadat mangubur ain oloh Yehudi.

⁴¹Intu eka Yesus inyampalaki aton ije taman. Intu huang taman te aton ije kubur taheta, je hindai puji hapan mangubur oloh.

⁴²Awi kubur te tokep, tuntang andau Sabat jari nampara, maka ewen mangubur Yesus intu hete.