Read Ngaju YOHANES 3 Bible Online

YOHANES 3 - Ngaju bible

YOHANES 3

¹Aton ije biti tokoh agama bara marak oloh Parisi je bagare Nikodemus.

²Sinde hong hamalem ie dumah manalih Yesus tuntang hamauh, “Bapa Guru, ikei katawan Bapa inyoho awi Hatalla. Basa ije biti mahin jaton oloh tau mawi kare taloh heran kilau je iawi Bapa, amon Hatalla dia mampahayak ie.”

³Yesus tombah, “Percaya ih ije biti mahin jaton oloh tau manjadi anak ungkup ain Hatalla, amon ie dia inakan haluli.”[5]

⁴“Dia badai oloh bakas tau inakan haluli,” koan Nikodemus dengan Yesus, “En tau ie tame haluli akan kanain indue tuntang inakan haluli?”

⁵Yesus tombah, “Toto haliai auh-Ku toh: amon oloh dia inakan hapan danum tuntang hapan Roh Hatalla, oloh te dia tau manjadi anak ungkup ain Hatalla.

⁶Olon secara biti-bereng inakan awi oloh bakase, tapi secara roh inakan awi Roh Hatalla.

⁷Ela hengan amon Aku hamauh, keton samandiai musti inakan haluli.[6]

⁸Riwut manampur tumon kanahuange; itah mahining auhe, tapi dia katawan bara kueh panumahe tuntang akan kueh pangguete. Kalote kea dengan oloh je inakan awi Roh Hatalla.”

⁹“Kilen ampie jete tau manjadi?” koan Nikodemus misek.

¹⁰Yesus tombah, “Ikau toh Guru hong Israel; dia badai ikau dia katawan?

¹¹Percaya ih: ikei hakotak baya tahiu taloh je ingatawan ikei, tuntang ikei manenga kasaksian baya tahiu taloh je jari gitan ikei; tapi keton dia maku manarima kasaksian ikei.

¹²Keton dia percaya amon Aku manyarita akan keton tahiu kare hal ain kalunen toh; kilen ampie keton tau percaya, amon Aku manyarita akan keton tahiu kare hal bara sorga?

¹³Jaton ije biti oloh puji mandai akan sorga, beken bara Ie je mohon akan kalunen, ie te Anak Olon.

¹⁴ Sama kilau Moses manggatang handipe tambaga intu tapakan kayu hong padang pasir, kalote kea Anak Olon musti inggatang,

¹⁵mangat kakare oloh je percaya intu Ie mandino pambelom je bujur tuntang katatahie.”

¹⁶Karana kalote Hatalla sinta dengan olon hong kalunen toh, sampai Ie manenga anak Ayue je tunggal, uka gagenep oloh je percaya intu Ie dia binasa, tapi mandino pambelom je bujur tuntang katatahie.

¹⁷Basa Hatalla manyoho Anak Ayue dia uka mahakim kalunen toh, tapi uka manyalamate.

¹⁸Oloh je percaya intu Ie dia ihukum. Tapi oloh je dia percaya jari ihukum awi Hatalla, awi ie dia percaya dengan Anak Hatalla je tunggal.

¹⁹Ie inuntut hagalang hal jetoh: Kalawa te jari dumah akan kalunen, tapi olon labih marajin kakaput bara kalawa, awi gawin ewen papa.

²⁰Gagenep oloh je mawi kapapa, basingi kalawa; ie dia maku dumah manalih kalawa, mangat gawie je papa te dia gitan.

²¹Tapi oloh je malalus kahandak Hatalla, dumah manalih kalawa uka manjadi batantu taloh je ilaluse te jete manumon kahandak Hatalla.

²²Limbah te Yesus dengan kare murid Ayue haguet akan Yuda. Ie melai hete pire-pire katika katahie dengan ewen tuntang mampandoi.

²³ Hong katika te Yohanes hindai tame penjara. Ie mampandoi intu Ainon, dia kejau bara Salem, awi intu hete are danum. Kare oloh dumah manalih ie, tuntang ie mampandoi ewen.

²⁵Pire-pire murid Yohanes nampara hakaridu dengan oloh Yehudi[7] tahiu atoran gawi mamparasih.

²⁶Ewen haguet manalih Yohanes, tuntang hamauh, “Pa Guru, en bapa magon mingat oloh je dengan bapa hong silan Sungei Yordan te, je ininjok bapa akan ikei bihin? Ie wayah toh mampandoi kea, tuntang kare oloh uras haguet manalih Ie!”

²⁷ Yohanes tombah, “Olon jaton tau mandino taloh en-en amon dia inenga Hatalla Akae.

²⁸Keton kabuat jari mahining aku hamauh, ‘Aku toh beken Raja Panyalamat. Aku inyoho helo bara Ie.’

²⁹Panganten bawi jete ain panganten hatue. Sobat panganten hatue te baya mendeng hila balikate tuntang manyeneh, tuntang ie hanjak amon mahining auh panganten hatue. Kalote kea dengangku. Toh Aku hanjak toto.

³⁰Ie te musti sasar mambatang, tuntang aku sasar dia mambatang.”

³¹Je dumah bara ngambo mahunjun taloh samandiai. Je dumah bara kalunen tame baris oloh kalunen, tuntang hakotak tahiu kare hal kalunen. Ie je dumah bara ngambo mahunjun taloh samandiai.

³²Ie hakotak tahiu taloh je jari gitan tuntang jari ihining Awie, tapi ije biti mahin jaton oloh percaya dengan auh kasaksian Ayue.

³³Oloh je percaya dengan kasaksian Ayue te, mangaku je Hatalla puna toto bujur.

³⁴Karana oloh je inyoho Hatalla, manyampai kare auh Hatalla, basa Roh Hatalla jari inenga lepah Akae.

³⁵ Bapa sinta Anak tuntang jari manyarah salepah kuasa Akae.

³⁶Oloh je percaya dengan Anak te, kareh mandino pambelom je bujur tuntang katatahie. Tapi oloh je dia mamenda Anak te jaton mandino pambelom. Ie ihukum Hatalla sampai katatahie.