Read Ngaju YOHANES 4 Bible Online

YOHANES 4 - Ngaju bible

YOHANES 4

¹Kare oloh Parisi mahining je Yesus mandino tuntang mampandoi labih are murid bara Yohanes. (

²Sapunae Yesus kabuat dia mampandoi malengkan kare murid Ayue bewei.)

³Katika Yesus katawan kare oloh Parisi jari mahining tahiu hal te, Ie haguet bara Yuda haluli akan Galilea.

⁴Hong panjalanan Ayue te Ie musti mahalau Samaria.

⁵ Maka Yesus sampai intu ije lewu hong Samaria je bagare Sikhar, dia kejau bara petak je horan inenga Yakob akan anake Yosep.

⁶Intu hete aton sumur Yakob. Yesus heka toto tagal panjalanae, awi te Ie mondok intu saran sumur. Metoh te kurang labih pukul duewalas bentok andau.

⁷Tuntang kare murid Yesus jari haguet akan lewu mangat mamili panginan. Limbah te tinai ije biti bawin oloh Samaria dumah masip danum. Yesus hamauh dengae, “Bu, tau Aku balaku danum?”

⁸

⁹ Bawin Samaria te tombah, “Tuan oloh Yehudi, aku oloh Samaria; mbuhen Tuan balaku danum dengangku?” (Basa kare oloh Yehudi jaton kajentae dengan oloh Samaria.)[8]

¹⁰Yesus tombah, “Jaka ikau katawan panengan Hatalla tuntang eweh je balaku danum ihop dengam, pasti ikau kabuat je balaku danum ihop Dengae, tuntang Ie akan manenga akam danum pambelom.”

¹¹Koan oloh bawi te, “Ain Tuan jaton timba, tuntang sumur toh handalem toto. Bara kueh Tuan mandino danum pambelom?

¹²Yakob, tato hiang ikei, manenga sumur toh akan ikei.[9] Ie kabuat masip danum ihop bara hetoh; kalote kea kare anak jariae tuntang kare meto je imbelome. En Tuan manyangka Tuan labih hai bara Yakob?”

¹³“Oloh je mihop danum toh kareh teah belaie tinai,” koan Yesus,

¹⁴“tapi oloh je mihop danum je inenga-Ku te, dia tau teah belaie tinai sampai katatahie. Karana danum je inenga-Ku te kareh manjadi tahasak danum huang arepe je mamancar balua tuntang manenga akae pambelom je bujur tuntang katatahie.”

¹⁵Koan oloh bawi te, “Tuan, tenga akangku danum te, mangat aku dia teah belaiku tinai; tuntang dia usah haluli akan hetoh mangat masip danum.”

¹⁶“Lius, tehau kabalim, palus haluli akan hetoh,” koan Yesus.

¹⁷“Aku jaton banangku,” koan oloh bawi te. “Puna toto auhm te,” koan Yesus.

¹⁸“Basa ikau jari kawin hangkalime tuntang oloh hatue je belom hinje ikau metoh toh jete dia ie kabalim.”

¹⁹“Toh aku katawan Tuan toh nabi,” koan oloh bawi te.

²⁰“Tato hiang ikei manyembah Hatalla hong bukit toh, tapi koan bangsa Tuan, baya hong Yerusalem bewei eka oloh manyembah Hatalla.”

²¹“Percaya ih,” koan Yesus dengae, “sinde katika oloh kareh manyembah Bapa, dia tinai hong Bukit toh, tuntang dia kea hong Yerusalem.

²²Keton oloh Samaria manyembah taloh je dia keton kasenee, tapi ikei oloh Yehudi manyembah Ie je kasenan ikei, awi kasalamatan te dumah bara oloh Yehudi.

²³Tapi katikae kareh sampai, malahan jari dumah metoh toh, iete hapan kuasan Roh Hatalla oloh manyembah Bapa huang katoto. Ewen kareh manyembah mahapan cara je ingahandak Bapa.

²⁴Basa Hatalla te Roh, tuntang baya dengan Roh Hatalla, kare oloh tau manyembah Bapa tumon ampin katotoe.”

²⁵Oloh bawi te hamauh dengan Yesus, “Aku katawan Raja Panyalamat (je inyewut Kristus) akan dumah. Amon Ie dumah, Ie akan mansanan kakare taloh handiai akan itah.”

²⁶“Aku toh Ie,” koan Yesus, “Aku je metoh toh hakotak dengam.”

²⁷Hong katika te murid Yesus haluli. Ewen hengan mite Yesus hakotak dengan ije biti oloh bawi. Tapi ije biti mahin jaton bara ewen te je misek dengan oloh bawi te, “Ibu perlu en?” atawa misek dengan Yesus, “Mbuhen bapa hakotak dengan oloh bawi te?”

²⁸Maka oloh bawi te malihi balanaie intu hete palus hadari akan lewu tuntang hamauh dengan kare oloh hong hete,

²⁹“Has ite oloh je mansanan akangku kare taloh handiai je puji aku mawie. En mungkinkah Ie te Raja Panyalamat?”

³⁰Maka kare oloh te malihi lewu palus haguet manalih Yesus.

³¹Pandehan te kare murid Ayue mimbit Yesus kuman. “Bapa Guru,” koan ewen, “has itah kuman.”

³²Tapi Yesus tombah, “Ayung-Ku aton panginan je dia keton katawae.”

³³Maka kare murid Ayue nampara hisek sama arepe, “En aton oloh je mimbit panginan Akae?”

³⁴Palus Yesus hamauh, “Panginang-Ku iete malalus kahandak Ayue je manyoho Aku, tuntang mampajadi gawi je inyarah Awie akang-Ku.

³⁵Keton hamauh, ‘Epat bulan hindai wayah getem.’ Tapi Aku hamauh dengan keton: Tampayah kare tana je jari lenda-lendang, jari tatap uka inggetem!

³⁶Oloh je manggetem jari nampara manarima upahe tuntang mamumpong hasil akan pambelom je bujur tuntang katatahie. Maka oloh je manawor tuntang je manggetem tau haya-hayak hanjak.

³⁷Toto kea auh paribasa toh, ‘Aton oloh je mimbul, oloh beken je manggetem.’

³⁸Aku manyoho keton haguet manggetem hong tana je keton dia manguae; oloh beken jari bagawi hete tuntang keton manarima kaontongan bara gawin ewen.”

³⁹Are oloh Samaria hong lewu te percaya dengan Yesus, awi oloh bawi te hamauh, ‘Ie mansanan akangku kare taloh handiai je puji aku mawie.’

⁴⁰Maka katika oloh Samaria te hasondau dengan Yesus, ewen balaku nyame-nyame uka Ie melai dengan ewen. Jadi Yesus melai hong hete due andau katahie.

⁴¹Limbah te labih are hindai oloh percaya dengan Yesus tagal taloh je iajar Awie kabuat akan ewen.

⁴²Ewen hamauh dengan oloh bawi te, “Toh ikei percaya, dia hindai tagal taloh je insanam akan ikei, tapi awi ikei kabuat jari mahining Ie, tuntang katawan je Ie te puna Panyalamat kalunen.”

⁴³Limbah due andau melai hong Sikhar, Yesus haguet akan Galilea.

⁴⁴ Yesus kabuat jari hamauh, “Ije biti nabi dia ihormat intu lewun ayue kabuat.”

⁴⁵ Tapi katika Ie sampai hong Galilea, kare oloh hong hete manambang Ie dengan sanang atei, awi ewen aton hong Yerusalem metoh Andau Pesta Paska, tuntang jari mite taloh handiai je iawi Yesus.

⁴⁶ Balalu Yesus haluli akan Kana hong Galilea, ekae puji mobah danum manjadi anggor. Hong lewu te aton ije biti pagawai istana; anake metoh haban hong Kapernaum.

⁴⁷Katika ie mahining Yesus dumah bara Yuda akan Galilea, ie haguet manalih Yesus tuntang balaku Yesus dumah akan Kapernaum mangat mampakeleh anake je handak matei.

⁴⁸Yesus hamauh dengan pagawai istana te, “Jaka keton dia mite kare taloh heran, dia keton percaya.”

⁴⁹“Tuan,” koan pagawai istana te tombah, “Jeleng dumah helo bara anakku matei.”

⁵⁰Koan Yesus dengae, “Haguet ih anakm te keleh.” Oloh te percaya dengan auh Yesus, palus ie haguet.

⁵¹Hong benteng jalan, kare jipee dumah manalih ie tuntang mangabar, “Anak Tuan jari keleh.”

⁵²Palus ie misek dengan ewen pukul pire anak te nampara keleh. Ewen tombah, “Andau male kurang labih pukul ije bentok andau dareme nihau.”

⁵³Palus bapa anak te taraingat je intu katika te kea Yesus hamauh dengae, “Anakm te keleh.” Maka ie tuntang hapus keluargae percaya dengan Yesus.

⁵⁴Maka jete taloh heran je kaduee je iawi Yesus hong Galilea limbah Ie dumah bara Yuda.