Read Ngaju YOHANES 6 Bible Online

YOHANES 6 - Ngaju bible

YOHANES 6

¹Pire-pire katika limbah te tinai Yesus haguet dimpah akan silan Danau Galilea, je inyewut kea Danau Tiberias.

²Sana sampai hong hete, are oloh manuntut Ie awi ewen jari mite kare taloh heran je ilalus Awie iete mampakeleh kare oloh haban.

³Yesus mandai akan hunjun bukit, palus mondok hete dengan kare murid Ayue.

⁴Hong katika te, Andau Pesta Paska Yehudi jari tokep.

⁵Katika Yesus manampayah hakaliling, Ie mite oloh mero-merong dumah manalih Ie. Maka Ie hamauh dengan Pilippus, “Hong kueh itah mamili panginan mangat kakare oloh toh tau kuman?” (

⁶Yesus jari katawan taloh je handak ilalus Awie, tapi Ie hamauh kalote awi Ie handak mancoba Pilippus.)

⁷Pilippus tombah, “Rote barega due ratus duit perak[12] dia baka sukup akan oloh kare toh, aloh genep biti baya dinon isut barangai.”

⁸Ije murid Yesus je beken, iete Andreas, paharin Simon Petrus, hamauh,

⁹“Hong hetoh aton anak oloh hatue dengan lime rote tuntang due kongan lauk. Tapi en rimae jete akan oloh je kare toh?”

¹⁰“Soho kare oloh mondok,” koan Yesus. Hong eka te aton are oru, jadi kare oloh te mondok intu oru — samandiaie aton kurang labih lime koyan biti oloh hatue.

¹¹Limbah te tinai Yesus manduan rote te, palus manyewut tarima kasih akan Hatalla. Limbah te Ie mambagi rote te akan oloh are. Limbah te tinai Ie mambagi lauk te, tuntang ewen kuman sampai besoh toto.

¹²Limbah oloh samandiai te kuman sampai besoh, Yesus hamauh dengan kare murid Ayue, “Nampunan kalabien panginan te; ela sampai aton je haka-kanan.”

¹³Palus ewen manampunan duewalas lontong kontep kalabien panginan bara lime rote je kinan awi oloh are te.

¹⁴Katika oloh are mite taloh heran je iawi Yesus, ewen hamauh, “Toto, jetoh Nabi[13] je iharap dumah akan kalunen!”

¹⁵Yesus katawan ewen dumah handak mamaksa Ie manjadi rajan ewen. Tagal te Ie mangejau arepe haguet akan eka je habukit.

¹⁶Metoh andau nampara hamalem, kare murid Yesus mohon akan danau.

¹⁷Palus ewen lumpat arut dimpah danau te manalih Kapernaum. Andau jari kaput, tapi Yesus hindai kea dumah manalih ewen.

¹⁸Pandehan te danum nampara hariak awi riwut paham.

¹⁹Limbah balayar kurang labih lime atawa jahawen kilometer, ewen mite Yesus dumah manalih arut hayak mananjong hunjun danum. Ewen mikeh toto.

²⁰Tapi Yesus hamauh dengan ewen, “Ela mikeh, jetoh Aku!”

²¹Palus dengan kahanjak atei ewen manarima Ie akan huang arut, tuntang metoh te kea arut ewen sampai eka je inalih.

²²Hanjewu andau tinai oloh are je magon melai intu dipah danau, mangatawan hong hete endau baya aton ije arut ih. Ewen katawan kare murid Yesus jari haguet mahapan arut te, tapi Yesus dia omba.

²³Limbah te tinai pire-pire arut bara lewu Tiberias dumah tuntang tende tokep eka oloh are te kuman rote limbah Tuhan manyewut tarimakasih.

²⁴Katika oloh are te mite Yesus tuntang kare murid Ayue jaton hete, ewen kea lumpat akan arut te tuntang haguet akan Kapernaum manggau Yesus.

²⁵Katika kare oloh hasondau dengan Yesus hong silan danau, ewen misek Ie, “Bapa Guru, hamparea Bapa sampai intu hetoh?”

²⁶Yesus tombah, “Puna toto keton jari manggau Aku dia ie awi keton jari harati riman kare taloh heran je iawi-Ku, tapi awi keton jari kuman besoh.

²⁷Ela keton bagawi mangat mandino panginan je tau lepah tuntang babasi. Keleh keton bagawi uka mandino panginan je dia tau babasi tuntang je manenga pambelom je katatahie. Panginan te kareh inenga awi Anak Olon akan keton, Ie jari iangkat awi Hatalla Bapa.”

²⁸Palus ewen misek dengae, “En je musti iawi ikei mangat malalus kahandak Hatalla?”

²⁹Yesus tombah, “Jetoh ie je ingahandak Hatalla bara keton: percaya intu Ie je inyoho Hatalla.”

³⁰“Amon kalote,” koan ewen “en buktie je tau Bapa manengae mangat ikei mitee tuntang percaya dengan Bapa? En je tau Bapa mawie?

³¹ Tato hiang ikei[14] kuman manhu hong padang pasir, kilau je tarasurat hong Surat Barasih, ‘Ie manenga akan ewen panginan rote bara sorga.’ ”

³²Palus Yesus hamauh dengan ewen, “Percaya ih: Beken Moses, malengkan Bapa-Ku je jari manenga akan keton[15] rote je puna toto bara sorga.

³³Basa rote je inenga Hatalla jete je puna mohon bara sorga tuntang manenga pambelom akan oloh hong kalunen.”

³⁴“Bapa,” koan ewen, “tenga harajur akan ikei rote te.”

³⁵“Aku toh rote je manenga pambelom,” koan Yesus dengan ewen. “Oloh je manalih Aku dia akan balau tinai sampai katatahie. Tuntang oloh je percaya dengang-Ku, dia akan teah belaie tinai sampai katatahie.”

³⁶“Tapi kilau je insanang-Ku akan keton, aloh keton jari mite Aku, keton mahin dia percaya.

³⁷Kakare oloh je inenga Bapa akang-Ku kareh dumah manalih Aku. Aku dia manolak eweh bewei je manalih Aku.

³⁸Basa Aku mohon bara sorga dia uka malalus kahandak-Ku kabuat, malengkan kahandak Ayue je manyoho Aku.

³⁹Tuntang jetoh ie kahandak Ayue je manyoho Aku: uka bara kare oloh samandiai je inenga Akang-Ku, ije mahin jaton nihau; tapi uka Aku mampisik ewen hong Andau Kiamat.

⁴⁰Puna jetoh ie kahandak Bapa-Ku: uka oloh samandiai je mite Anak, tuntang percaya intu Ie mandino pambelom je katatahie, tuntang Aku mambelom ewen tinai hong Andau Kiamat.”

⁴¹Kare oloh Yehudi nampara bakotok dengan Yesus, awi Ie hamauh: “Aku toh rote je mohon bara sorga.”

⁴²Ewen hamauh, “En dia Ie toh Yesus, anak Yosep? Ikei kasene indu-bapae! Kilen ampie Ie tau hamauh Ie mohon bara sorga?”

⁴³Palus Yesus hamauh dengan ewen, “Ela bakotok.

⁴⁴Ije biti mahin jaton oloh tau dumah manalih Aku, amon Bapa je manyoho Aku, dia mimbit ie manalih Aku; tuntang ewen je dumah, kareh impisik hong Andau Kiamat.

⁴⁵ Huang surat kare Nabi tarasurat kalotoh, ‘Kakare oloh kareh iajar awi Hatalla.’ Jadi oloh samandiai je mahining Bapa tuntang mandino ajar bara Ie, dumah manalih Aku.

⁴⁶Jete dia tau irima kilau oloh jari puji mite Bapa. Baya Ie je dumah bara Bapa, Ie te je jari mite Bapa.

⁴⁷Keleh keton katawan: Oloh je percaya, madino pambelom je bujur tuntang katatahie.

⁴⁸Aku toh rote je manenga pambelom.

⁴⁹Tato hiang keton kuman manhu hong padang pasir tuntang ewen matei kea.

⁵⁰Tapi dia kalote dengan rote je mohon bara sorga; oloh je kuman rote te dia akan matei.

⁵¹Aku toh rote je mohon bara sorga — rote je manenga pambelom. Oloh je kuman rote toh akan belom katatahie. Rote je inenga-Ku akan pambelom olon hong kalunen, jete ising-Ku.”

⁵²Mahining jete kare oloh Yehudi hakaridu sama arepe. “Kilen ampie oloh toh tau manenga isie akan itah mangat kumae?” koan ewen.

⁵³Palus Yesus hamauh dengan ewen, “Percaya ih: Amon keton dia kuman isin Anak Olon tuntang mihop dahae, keton kareh dia toto-toto belom.

⁵⁴Oloh je kuman ising-Ku tuntang mihop dahang-Ku mandino pambelom je bujur tuntang katatahie tuntang Aku mampisik ie hong Andau Kiamat.

⁵⁵Basa ising-Ku puna panginan, tuntang dahang-Ku te puna taloh ihop.

⁵⁶Oloh je kuman ising-Ku tuntang mihop dahang-Ku, tetep hinje dengang-Ku, tuntang Aku hinje ie.

⁵⁷Bapa je belom te, manyoho Aku tuntang Aku mahin belom awi Bapa. Kalote kea oloh je kuman ising-Ku kareh belom awi-Ku.

⁵⁸Jetoh Ie rote je mohon bara sorga: dia ie rote kilau je kinan awi tato hiang keton. Basa limbah kuman rote jete, ewen matei kea. Tapi oloh je kuman rote jetoh kareh belom sampai katatahie.”

⁵⁹Taloh samandiai te isanan awi Yesus katika Ie majar hong huma sombayang intu Kapernaum.

⁶⁰Limbah mahining kare auh Yesus te, are bara marak kare murid Ayue hamauh, “Auh ajar toh lalau babehat. Eweh je olih manarima!”

⁶¹Yesus kabuat katawan je murid Ayue mangomel tahiu hal te. Maka Ie hamauh, “En keton tersinggung tagal kare auh te?

⁶²Kilen ampie kajariae amon kareh keton mite Anak Olon mandai haluli akan eka je solake?

⁶³Je mawi oloh belom iete Roh Hatalla. Kaabas olon jaton gunae. Kare auh je insanang-Ku akan keton toh jetoh kare auh Hatalla tuntang kare auh je manenga pambelom.

⁶⁴Tapi aton kea bara keton je dia percaya.” (Yesus jari katawan bara solake kare oloh je dia maku percaya, tuntang oloh je handak mandarhaka mawi Ie.)

⁶⁵Palus Yesus hamauh tinai, “Jete sababe Aku mansanan akan keton ije biti mahin jaton oloh dumah manalih Aku, amon Bapa dia manengae akang-Ku.”

⁶⁶Nampara bara katika te are murid Ayue malihi Ie, tuntang dia maku omba Ie tinai.

⁶⁷Palus Yesus misek dengan duewalas murid Ayue, “En keton handak malihi Aku kea?”

⁶⁸ “Tuhan,” koan Simon Petrus Dengae, “ikei haguet manalih eweh? Auh Tuhan manenga pambelom je bujur tuntang katatahie.

⁶⁹Ikei jari percaya tuntang yakin je Tuhan bewei sarohan je barasih bara Hatalla.”

⁷⁰Yesus tombah, “En diakah Aku je mintih keton duewalas biti? Tapi ije bara keton te setan!”

⁷¹Oloh je koan Yesus te iete Yudas anak Simon Iskariot. Basa aloh Yudas te ije biti bara duewalas murid Yesus, ie akan mandarhaka mawi Yesus.