Read Ngaju YOHANES 7 Bible Online

YOHANES 7 - Ngaju bible

YOHANES 7

¹Limbah te Yesus haguet akan hete-hete hong Galilea. Ie dia maku akan daerah Yuda basa kare panguasa Yehudi hong hete handak mampatei Ie.

² Hong katika te Andau Pesta Tingkap Dawen jari tokep.

³Maka kare paharin Yesus hamauh dengae, “Lihi ih eka toh tuntang haguet akan Yuda, mangat kare murid Ayum tau mite kea taloh gawin Aim.

⁴Dia aton oloh je handak manyahokan taloh je iawie, amon Ie handak manjadi oloh basewut. Amon ikau malalus kare taloh macam te, hapus kalunen musti katawae!” (

⁵Basa kare paharie kabuat mahin dia percaya intu Ie.)

⁶“Hindai katikae akang-Ku,” koan Yesus dengan ewen, “tapi akan keton, genep katika tau.

⁷Kalunen toh dia mungkin manyingi keton. Tapi Aku puna inyingi oloh kalunen, awi Aku harajur mansanan akan kalunen je gawie te papa.

⁸Haguet ih kabuat keton akan pesta te. Aku dia haguet[16] awi hindai katikae akang-Ku.”

⁹Kakai auh Yesus dengan kare paharie, tuntang Ie mahin melai hong Galilea.

¹⁰Limbah kare paharin Aie haguet akan pesta te, Yesus haguet suni-suni kabuate, jaton oloh katawae.

¹¹Katahin pesta te, kare panguasa Yehudi manggau Ie tuntang hisek, “Hong kueh Ie?”

¹²Are oloh nampara bisik-bisika tahiu Ie. Aton je hamauh, “Ie oloh bahalap.” Aton kea je hamauh, “Dia! Ie mampalayang oloh are.”

¹³Tapi ije biti mahin jaton oloh bahanyi hakotak tara-tarang tahiu Ie awi ewen mikeh dengan kare panguasa Yehudi.

¹⁴Hong bentok pesta oloh are te, Yesus tame akan huang Human Tuhan, palus nampara majar.

¹⁵Kare panguasa Yehudi hengan toto tuntang hamauh, “Kilen ampie oloh toh tau are pangatawae, padahal Ie dia puji sakola?”

¹⁶Yesus tombah, “Taloh je iajar-Ku toh dia bara Aku tapi auh ajar bara Ie je manyoho Aku.

¹⁷Oloh je handak manumon kahandak Hatalla, akan mangatawan en auh ajar-Ku te panumahe bara Hatalla atawa bara arep-Ku kabuat.

¹⁸Oloh je manenga auh ajar ayue kabuat, ie manggau hormat akan arepe kabuat. Tapi oloh je manggau hormat akan oloh je manyoho ie, oloh te bujur ateie, jaton tanjaro huang ie.

¹⁹En dia Moses jari manenga kare parentah Hatalla akan keton? Tapi hong marak keton aton oloh je manumon kare parentah te. Mbuhen keton handak mampatei Aku?”

²⁰Oloh are te tombah, “Ikau gila! Eweh je handak mampatei ikau?”

²¹Yesus tombah, “Baya ije ih gawi je ilalus-Ku hong andau Sabat, tuntang keton hengan.

²² Moses manenga akan keton atoran uka basunat — aloh asal sunat te sapunae dia bara Moses, tapi bara kare tato hiang itah helo bara Moses. Tagal te, hong andau Sabat kea keton mahin manyunat oloh.

²³ Amon keton malalus jete uka ela keton malanggar atoran Moses tahiu sunat, mbuhen keton balait dengang-Ku awi-Ku mampakeleh hapus bitin oloh hong andau Sabat?

²⁴Ela mahakim oloh hagalang taloh je gitan, tapi hunjun galang kaadilan.”

²⁵Limbah te tinai aton pire-pire oloh Yerusalem hamauh, “En dia jetoh oloe te je inggau uka impatei?

²⁶Tampayah Ie hakotak mana koae ih hong bentok umum, tuntang jaton oloh je hakotak taloh auh en-en mawi Ie! En kare panguasa itah mungkin jari mangatawan je Ie toh Raja Panyalamat?

²⁷Tapi amon Raja Panyalamat te dumah, jaton ije oloh katawan bara kueh asale! Padahal itah katawan bara kueh asale oloh toh.”

²⁸Limbah te, metoh Yesus majar hong Human Tuhan, Ie mangkariak hai auhe, “Jadi keton katawan eweh Aku toh, tuntang bara kueh asal-Ku? Aku dumah dia awi kahandak-Ku kabuat. Aku inyoho awi Ie je bara hak manyoho Aku, tuntang Ie tau imercaya. Tapi keton dia mangasene Ie.

²⁹Aku mangasene Ie, karana asal-Ku bara Ie, tuntang Ie te je manyoho Aku.”

³⁰Hong katika te ewen handak manawan Yesus, tapi jaton je bahanyi mimbing Ie, awi katikae hindai sampai.

³¹Are bara kare oloh te nampara percaya dengae, tuntang hamauh, “Amon Raja Panyalamat te dumah, en tau Ie manguan labih are taloh heran bara je iawi oloh toh?”

³²Kare oloh Parisi mahining kilen ampie oloh te bisik-bisika tahiu Yesus. Tagal te, haya-hayak dengan kare imam kapala, ewen manyoho pire-pire pangawal Human Tuhan haguet manawan Yesus.

³³Yesus hamauh dengan oloh are huang Human Tuhan, “Baya hanjulo ih hindai Aku aton hinje keton. Limbah te Aku akan haluli manalih Ie je manyoho Aku.

³⁴Keton kareh manggau Aku, tapi dia tau sondau Aku; awi keton dia tau sampai akan eka-Ku melai.”

³⁵Palus kare panguasa Yehudi te hamauh sama arepe, “Oloh toh handak haguet akan kueh sampai itah dia tau manyondau Ie? En Ie handak haguet manalih kare oloh Yehudi je melai hong luar negeri hong marak oloh Yunani, tuntang majar oloh Yunani?

³⁶Narai riman auhe je itah kareh manggau Ie tapi dia tau sondau Ie tuntang dia tau manalih eka Ie melai?”

³⁷ Hong andau je pangkarahiae lawin pesta te, iete andau je paling mambatang, Yesus mendeng hong Human Tuhan palus mangkariak, “Oloh je teah belaie keleh dumah manalih Aku tuntang mihop.

³⁸ Tahiu oloh je percaya dengang-Ku, tarasurat huang Surat Barasih, ‘Bara huang atei mahasor kare tahasak danum je manenga pambelom.’ ”[17] (

³⁹Yesus hakotak tahiu Roh Hatalla, je akan inarima awi oloh je percaya intu Ie. Basa hong katika te Roh Hatalla hindai inenga; awi Yesus hindai impahai dengan pampateie.)

⁴⁰Are oloh je mahining taloh je insanan Yesus, tuntang bara ewen te aton je hamauh, “Oloh toh pasti Nabi te!”[18]

⁴¹Oloh je beken hamauh, “Jetoh Ie Raja Panyalamat!” Tapi aton kea je hamauh, “Ah, dia badai Raja Panyalamat dumah bara Galilea?

⁴² Huang Surat Barasih tarasurat je Raja Panyalamat te turonan Dawid tuntang akan dumah bara Betlehem, iete lewu-human Dawid.”

⁴³Kajariae kare oloh nampara hatakian auh tahiu Yesus.

⁴⁴Aton je handak manawan Ie, tapi ije biti mahin jaton je mimbing Ie.

⁴⁵Katika kare pangawal Human Tuhan dumah haluli limbah ewen inyoho haguet manawan Yesus, kare imam kapala tuntang kare oloh Parisi te misek dengan ewen, “Mbuhen keton dia mimbit Ie akan hetoh?”

⁴⁶Kare pangawal te tombah, “Wah, hindai aton oloh hakotak sama kilau Ie!”

⁴⁷“En keton kea jari impalayang awie?” koan kare oloh Parisi te.

⁴⁸“En aton bara kare panguasa itah atawa oloh Parisi je percaya intu Ie?

⁴⁹Tapi oloh are toh dia mangasene hukum Moses, tuntang aloh kilen ampie kea ewen te jari tarasapa.”

⁵⁰ Ije bara kare oloh Parisi te iete Nikodemus je puji dumah manalih Yesus. Nikodemus hamauh dengan kare oloh Parisi awang beken,

⁵¹“Manumon hukum, oloh dia tau ihukum helo bara perkarae te ihining tuntang gawie te iriksa.”

⁵²“En ikau kea bara Galilea?” koan ewen tombah, “Riksa ih Surat Barasih! Ikau kareh mitee je asal nabi te dia[19] bara Galilea!” [

⁵³Limbah te uras oloh buli akan huma.