Read Ngaju YOHANES 8 Bible Online

YOHANES 8 - Ngaju bible

YOHANES 8

²Andau ije tinai hayak hanjewu Ie haguet akan Human Tuhan, tuntang are oloh dumah manalih Ie. Yesus mondok, palus nampara majar ewen.

³Metoh te kare guru agama tuntang kare oloh Parisi mimbit manalih Ie ije biti oloh bawi je tarasondau habandong. Ewen manyoho oloh bawi te mendeng hong bentok,

⁴palus hamauh dengan Yesus, “Bapa Guru, oloh bawi toh tarasondau ikei metohe habandong.

⁵ Huang Hukum Moses aton atoran je oloh bawi kilau toh musti imanting hapan batu sampai matei. Toh kilen angat tirok bapa?”

⁶Ewen misek kalote hapan manjabak Ie, mangat ewen tau manyalan Ie. Tapi Yesus sontop ih, tuntang manyurat intu petak hapan tunjok Aie.

⁷Metoh ewen jajuan auh ewen Dengae, Ie manggatang baue tuntang hamauh dengan ewen, “Oloh je jaton badosa bara marak keton, takan ih ie je pangkaheloe mamanting batu mawi oloh bawi te.”

⁸Limbah te Yesus sontop haluli tuntang manyurat tinai intu petak.

⁹Limbah mahining Yesus hamauh kalote, mije-mije ewen te haguet malihi eka te, nampara bara je tambakase. Kajariae Yesus melai kabuate intu hete dengan oloh bawi je magon mendeng hong ekae.

¹⁰Palus Yesus manggatang baue tuntang hamauh dengan oloh bawi te, “Hong kueh ewen handiai te? En jaton oloh je mahukum ikau?”

¹¹“Jaton, Pa,” koae tombah. “Buah ih,” koan Yesus, “Aku mahin dia mahukum ikau. Toh haguet ih, ela mawi dosa tinai.”][20]

¹² Yesus hakotak tinai dengan oloh are, “Aku toh kalawan kalunen. Oloh je omba Aku dia olih mananjong hong kakaput, tapi mandino kalawan pambelom.”

¹³ “Toh ikau manenga kasaksian tahiu arepm kabuat,” koan kare oloh Parisi te dengae, “Kasaksia Ayum te dia toto.”

¹⁴Yesus tombah, “Aloh Aku manenga kasaksian tahiu arep-Ku kabuat, kasaksiang-Ku te toto; awi Aku katawan bara kueh pandumah-Ku tuntang akan kueh pangguet-Ku. Keton jaton katawan bara kueh panumah-Ku tuntang akan kueh pangguet-Ku.

¹⁵Keton mahakim oloh hapan cara ain olon; Aku jaton mahakim eweh bewei.

¹⁶Tapi paribasa Aku mahakim oloh, maka perkara je imutus-Ku te bujur, awi Aku dia kabuat-Ku; Bapa je manyoho Aku aton hinje Aku.

¹⁷Intu huang Hukum Moses aton tarasurat kalotoh: Kasaksian je toto iete kasaksian bara due biti oloh.

¹⁸Je manenga kasaksian tahiu Aku aton due — Aku tuntang Bapa je manyoho Aku.”

¹⁹“Bapa Ayum te huang kueh?” koan ewen. Yesus tombah, “Aloh Aku, aloh Bapa, keton dia kasenee. Paribasae keton kasene Aku, pasti keton mangasene kea Bapa-Ku.”

²⁰Taloh handiai te insanan Yesus katika Ie metoh majar hong Human Tuhan tokep kare patin duit parapah. Tapi ije biti mahin jaton oloh je manawan Ie, awi katikae hindai sampai.

²¹Yesus hamauh tinai dengan ewen, “Aku toh handak haguet, tuntang keton kareh manggau Aku, tapi keton kareh matei huang dosan keton. Eka je inggoang-Ku, dia keton tau manalihe.”

²²Maka kare panguasa Yehudi hamauh, “Tau kea Ie handak mampatei Arepe, basa Ie hamauh, ‘Eka je inggoang-Ku, keton dia tau manalihe.’ ”

²³Palus Yesus hamauh dengan ewen, “Keton dumah bara ngiwa; tapi Aku dumah bara ngambo. Keton bara kalunen; Aku dia bara kalunen.

²⁴Jete sababe Aku hamauh dengan keton, je keton kareh matei huang kare dosan keton. Tuntang puna keton akan matei huang kare dosan keton, amon dia percaya je ‘Aku toh Ie je inyewut AKU ATON’.”[21]

²⁵“Ikau eweh sapunae?” koan ewen misek. Yesus tombah, “Akan en hakotak tinai dengan keton! [22]

²⁶Magon are hal tahiu keton je handak isanang-Ku tuntang ihakim-Ku. Tapi Ie je manyoho Aku tau imercaya. Tuntang Aku mansanan akan kalunen taloh je ihining-Ku bara Ie.”

²⁷Ewen dia haratie je Ie te metoh te hakotak dengan ewen tahiu Bapa.

²⁸Tagal te Yesus hamauh dengan ewen, “Kareh amon keton jari mampagantong Anak Olon, keton akan katawan je ‘Aku toh Ie je inyewut AKU ATON’, tuntang keton akan katawan, ije mahin jaton taloh je iawi-Ku te bara arep-Ku kabuat. Aku baya mansanan taloh je iajar Bapa akang-Ku.

²⁹Tuntang Ie je manyoho Aku aton hinje Aku. Ie dia puji manalua Aku kabuatku, awi Aku harajur malalus taloh je manyanang atei Aie.”

³⁰Limbah Yesus mansanan taloh samandiai te, are oloh percaya dengae.

³¹Limbah te tinai Yesus hamauh dengan kare oloh Yehudi je jari percaya dengae, “Amon keton belom manumon auh ajar-Ku, keton toto-toto murid-Ku,

³²maka keton akan mangasene Hatalla je toto, tuntang tagal te keton kareh mardeka.”

³³ “Ikei toh turonan Abraham,” koan ewen. “Hindai puji ikei jadi jipen eweh bewei! En riman auh Aim manyewut, ‘Keton kareh mardeka’?”

³⁴“Puna toto auh-Ku toh,” koan Yesus dengan ewen. “Oloh je mawi dosa, ie te jipen dosa.

³⁵Tuntang ije biti jipen jaton dinon eka je tetep huang keluarga, tapi anak mandino eka sampai katatahie huang keluarga.

³⁶Tagal te, amon Anak te mamardeka keton maka keton toto-toto mardeka.

³⁷Puna Aku katawan keton toh turonan Abraham. Tapi keton handak mampatei Aku awi keton dia maku manarima auh ajar-Ku.

³⁸Taloh je gitang-Ku intu Bapa-Ku, jete kea je insanang-Ku. Tapi keton malalus taloh je iajar bapa keton akan keton.”

³⁹Ewen tombah, “Bapa ikei Abraham.” “Paribasa keton puna toto anak Abraham,” koan Yesus, “pasti keton malalus[23] taloh je ilalus awi Abraham.

⁴⁰Aku manyampai akan keton katoto je ihining-Ku bara Hatalla. Tapi keton handak mampatei Aku. Abraham dia mawie kilau te!

⁴¹Keton malalus kare taloh je ilalus awi bapa keton kabuat.” Koan ewen tombah, “Ikei toh dia ie anak sarau. Bapa ikei baya ije bewei, iete Hatalla kabuat.”

⁴²Palus Yesus hamauh dengan ewen, “Jaka Hatalla te Bapa keton, keton kareh sinta Aku, awi Aku dumah bara Hatalla. Aku dumah dia mahapan kahandak-Ku kabuat, tapi Ie je manyoho Aku.

⁴³En sababe keton dia harati taloh je isanang-Ku? Awi keton dia mahining auh ajar-Ku.

⁴⁴Setan te bapa keton, tuntang keton handak manumon kahandak bapa keton. Bara solake setan te puna pamuno. Ie dia puji omba huang katoto, awi huang ie jaton katoto. Amon ie mananjaro jete patut ih akae, basa sipat ayue puna jari kalote. Ie pananjaro tuntang asal kakare tanjaro.

⁴⁵Tapi Aku toh mansanan katoto, tuntang tagal te kea keton dia percaya dengang-Ku.

⁴⁶Eweh bara keton je tau mambuktie je huang Aku toh aton dosa? Amon Aku mansanan katoto, mbuhen keton dia percaya dengang-Ku?

⁴⁷Oloh je asale bara Hatalla, mahining auh Hatalla. Tapi keton dia bara Hatalla, jete sababe keton dia maku mahining.”

⁴⁸Kare oloh Yehudi te tombah auh Yesus, “En dia toto auh ikei je ikau toh oloh Samaria je ingumpang setan?”

⁴⁹Yesus tombah, “Aku dia ingumpang setan. Aku mahormat Bapa-Ku, tapi keton mahina Aku.

⁵⁰Aku dia manggau hormat akan arep-Ku kabuat. Aton Ije je manyatiar hormat akang-Ku, tuntang Ie te je mahakim.

⁵¹Toto haliai auh-Ku toh, oloh je manumon auh-Ku, sampai katatahie ie kareh dia akan matei.”

⁵²Palus kare oloh Yehudi te hamauh dengan Yesus, “Toh ikei katawan je ikau toh toto-toto ingumpang setan! Abraham kabuat jari matei, kalote kea kakare nabi. Tapi ikau hamauh, ‘Oloh je manumon auh-Ku, sampai katatahie dia akan matei.’

⁵³Amon Abraham kabuat jari matei, tuntang uras kare nabi kea jari matei, ikau toh eweh? Dia badai ikau toh labih hai bara bapa ikei Abraham!”

⁵⁴Yesus tombah, “Jaka Aku manggau hormat akan arep-Ku kabuat, jete hormat je jaton rimae. Je mahormat Aku iete Bapa je koan keton Hatallan keton,

⁵⁵padahal keton dia mangasene Ie. Tapi Aku mangasene Ie. Jaka Aku hamauh Aku dia kasene Ie, maka Aku oloh pananjaro, sama kilau keton. Aku kasene Ie tuntang manumon auh Ayue.

⁵⁶Bapa keton Abraham hanjak toto je ie mite andau pambelom ayung-Ku. Ie jari mitee tuntang ie hanjak!”

⁵⁷Palus kare oloh Yehudi hamauh dengan Yesus, “Umur Ayum hindai sampai lime puluh nyelo, tuntang ikau jari mite Abraham?”[24]

⁵⁸Yesus tombah, “Toto Aku hamauh dengan keton: helo bara Abraham inakan, Aku jari aton.”

⁵⁹Palus kare oloh Yehudi te manduan batu handak mamedak Ie; tapi Yesus manyahokan arepe, palus haguet malihi Human Tuhan.