Read Ngaju YOHANES 9 Bible Online

YOHANES 9 - Ngaju bible

YOHANES 9

¹Katika Yesus mananjong, Ie mite oloh je babute bara metoh ie inakan.

²Kare murid Yesus hamauh dengan Yesus, “Bapa Guru, mbuhen oloh toh inakan babute? En toh awi ie kabuat je badosa atawa awi indu-bapae je badosa?”

³Yesus tombah, “Ie babute dia awi dosae kabuat atawa dosan oloh bakase, tapi uka oloh tau mite kuasan Hatalla bagawi huang ie.

⁴Katahin andau balawa, itah musti malalus gawin Aie je manyoho Aku. Hamalem kareh dumah, tuntang jaton ije biti oloh je tau bagawi.

⁵ Katahin Aku hong kalunen, Aku toh kalawan kalunen.”

⁶Limbah Ie hamauh kalote Yesus maluja akan petak, tuntang mudak lujae te hapan petak. Limbah Ie mohos petak intu matan oloh te,

⁷palus Ie hamauh dengae, “Lius, enyau baum hong Talaga Siloam.” (Siloam te rimae ‘Inyoho’.) Maka oloh te haguet marasih baue. Metoh ie haluli, ie jari tau mite.

⁸Kare oloh hasansila humae tuntang kare oloh je solake mite ie manyadakah, uras hamauh, “En dia ie toh oloh je bahut mondok manyadakah?”

⁹Aton je hamauh, “Puna ie.” Tapi aton kea je hamauh, “Beken, ie baya mirip kilau oloh te.” Tapi oloh te kabuat hamauh, “Aku toh ie.”

¹⁰“Kilen ampie sampai ikau jari tau mite?” koan ewen misek ie.

¹¹Ie tombah, “Oloh je bagare Yesus te manampa petak kisak isut, palus mohose intu matangku tuntang hamauh, ‘Lius enyau baum intu Talaga Siloam,’ Palus aku haguet. Tuntang katika aku menyau baungku, aku tau mite.”

¹²“Hong kueh oloh te?” koan ewen misek. “Tawae,” koae tombah.

¹³Andau metoh Yesus mudak petak hapan lujae te uka mawi oloh babute te tau mite, jete hong andau Sabat. Maka oloh je solake babute te iimbit manalih kare oloh Parisi.

¹⁵Ewen kea misek dengae kilen ampie ie salenga tau mite. Ie tombah, “Ie mohos petak kisak intu matangku, palus aku menyaue tuntang aku tau mite.”

¹⁶Pire-pire bara kare oloh Parisi te hamauh, “Dia badai oloh je mawie te asale bara Hatalla, basa Ie dia paduli andau Sabat.” Tapi oloh beken hamauh, “Dia badai oloh je badosa malalus kare taloh heran kilau toh?” Palus lembut auh karidu hong marak ewen.

¹⁷Maka kare oloh Parisi te misek tinai dengan oloh te, “Kilen tumon tirokm tahiu Ie je mawi ikau tau mite te?” “Ie te nabi,” koan oloh te.

¹⁸Tapi kare pamimpin Yehudi te dia maku percaya je oloh te puna babute solake tuntang toh tau mite. Tagal te ewen mantehau oloh bakase,

¹⁹tuntang misek, “En toto jetoh anak keton je koan keton babute metoh inakan? Kilen ampie ie salenga tau mite wayah toh?”

²⁰Indu-bapa oloh te tombah, “Jetoh puna anak ikei; tuntang ie puna babute bara metoh inakan.

²¹Tapi ikei dia katawan kilen ampie ie salenga tau mite wayah toh. Tuntang eweh je mawi ie tau mite, jete mahin ikei dia katawae isek ih dengae, ie jari sukup kabakase; ie tau tombah kabuat.”

²²Oloh bakas oloh te hamauh kalote awi ewen mikeh dengan kare pamimpin Yehudi; awi ewen jari pakat, uka oloh je mangaku Yesus kilau Raja Panyalamat, dia tau hindai tame huma sombayang.

²³Jete sababe indu-bapa oloh te hamauh, “Ie jari sukup kabakase; isek ih dengae.”

²⁴Palus ewen mantehau tinai oloh je solake babute te, tuntang hamauh dengae, “Keleh ikau sumpah je ikau mansanan auh je bujur. Ikei katawan oloh te oloh badosa.”

²⁵“En ie badosa atawa dia,” koan oloh te tombah, “aku dia katawan. Tapi aku katawan baya ije hal ih; bihin aku babute, toh aku tau mite.”

²⁶Palus ewen hamauh tinai dengae, “En je iawie dengam? Kilen ampie Ie mawi ikau tau mite?”

²⁷Oloh te tombah, “Jari inyaritaku akan keton, tapi keton dia maku mahining. Mbuhen keton handak mahining tinai? Mungkin keton toh handak manjadi murid Ayue kea?”

²⁸Palus ewen mamapa ie tuntang hamauh, “Ikau kau je jadi murid Ayue; ikei dia! Ikei murid Moses.

²⁹Ikei katawan Hatalla jari hakotak dengan Moses. Tapi tahiu oloh te, ikei dia katawan bara kueh asale.”

³⁰Oloh te tombah, “Heran toto sampai keton toh dia katawan bara kueh asale, padahal Ie jari mawi aku tau mite.

³¹Itah katawan Hatalla te dia mahining auh oloh badosa, tapi mahining auh oloh je mahormat Hatalla tuntang malalus kahandake.

³²Bara tamparan kalunen hindai puji itah mahining oloh manatamba matan oloh babute bara metoh ie inakan salenga tau mite.

³³Amon oloh te dia bara Hatalla, ie dia badai tau mawi taloh en-en.”

³⁴Ewen tombah, “Hah? Ikau kontep dosa bara metoh ikau inakan, ikau handak majar ikei?” Maka bara katika te ie ingahana tame akan huma sombayang.

³⁵Yesus mahining je ewen te jari mangahana oloh te tame huma sombayang tinai. Ie manggau oloh te palus hamauh dengae, “En ikau percaya dengan Anak Olon?”

³⁶Oloh te tombah, “Eweh Ie, tuan? Dohop sanan akangku mangat aku percaya dengae.”

³⁷“Ikau jari mite Ie,” koan Yesus tombah. “Ie te oloh je metoh toh hakotak dengam.”

³⁸“Aku percaya, Tuhan,” koan oloh te palus sontop manyembah intu taharep Yesus.

³⁹Yesus hamauh, “Aku dumah akan kalunen toh uka mahakim; mangat oloh je babute tau mite, tuntang oloh je tau mite, manjadi babute.”

⁴⁰Pire-pire oloh Parisi je aton intu hete mahining Yesus hakotak kalote, palus ewen misek intu Ie, “En Koam ikei toh babute kea?”

⁴¹Yesus tombah, “Jaka keton babute, keton dia badosa. Tapi awi keton hamauh ‘Ikei tau mite,’ jete rimae keton magon badosa.”