Read Ngaju SARITAN GAWIN KARE RASUL 1 Bible Online

SARITAN GAWIN KARE RASUL 1 - Ngaju bible

SARITAN GAWIN KARE RASUL 1

¹ Teopilus je bahalap atei, Intu suratku je solake jari inarangku taloh handiai je ilalus tuntang iajar awi Yesus bara metoh Ie nampara taloh gawin Aie,

²sampai andau Ie inggatang akan sorga. Hapan kuasan Roh Hatalla Ie manenga kare nasehat akan kare rasul Ayue je jari iintih Awie.

³Limbah Ie mentai katahin epat puluh andau Ie kinjap mamparahan Arepe mahapan cara je batantu haliai akan kare rasul te je Ie toto-toto belom. Ewen mite Ie, tuntang Ie hakotak dengan ewen tahiu kilen ampie Hatalla marentah kilau Raja.

⁴ Tuntang metoh Ie hinje dengan ewen,[1] Ie manenga parentah toh akan ewen, “Ela haguet bara Yerusalem. Entai intu hete sampai Bapa manenga taloh je injanji Awie, iete taloh je jari insanang-Ku akan keton bihin.

⁵ Basa Yohanes mampandoi hapan danum, tapi pire-pire andau tinai keton kareh impandoi hapan Roh Hatalla.”

⁶Katika kare rasul te hapumpong haya-hayak dengan Yesus, ewen misek dengae, “Tuhan, en metoh toh kea Tuhan handak mampendeng haluli Pamarentahan bangsa Israel?”

⁷Yesus tombah, “Bapaku kabuat je manukas andau tuntang katikae. Jete dia usah keton katawae, awi jete hak Bapa.

⁸ Tapi keton kareh mandino kuasa, amon Roh Hatalla jari dumah manalih keton. Tuntang keton kareh manjadi saksi akangku hong Yerusalem, intu hapus daerah Yuda, intu Samaria, tuntang sampai tapakan petak.”

⁹ Limbah Yesus hamauh kalote, Ie hagatang akan sorga intu baun matan ewen, tuntang baunandau manutup Ie bara tampayah ewen.

¹⁰Pandehan ewen magon mananggera akan langit, katika Yesus hagatang, salenga aton due biti oloh hapakaian baputi mendeng hila silan ewen.

¹¹“O, kare oloh Galilea,” koan kadadue oloh te, “mbuhen keton mendeng ih intu hikau mananggera akan langit? Yesus, je gitan keton hagatang akan sorga te intu taharep keton, kareh haluli tinai kilau te kea sama kilau je gitan keton nah.”

¹²Rahian tinai kare rasul te haluli akan Yerusalem bara Bukit Saiton. Eka bukit te aton kurang labih ije kilometer kakejaue bara Yerusalem.

¹³ Intu Yerusalem ewen haguet akan huma eka ewen manyandehan, palus mandai akan kamar je hila hunjun. Kare rasul te iete Petrus tuntang Yohanes, Yakobus tuntang Andreas, Pilippus tuntang Tomas, Bartolomeus tuntang Mateus, Yakobus anak Alpeus, Simon Ije Menteng tuntang Yudas anak Yakobus;

¹⁴ewen samandiai harajur hinje ateie hapumpong balakudoa. Ewen balakudoa haya-hayak dengan kare oloh bawi kilau Maria indu Yesus, tuntang dengan kare paharin Yesus.

¹⁵Hong sinde andau, katika ewen metoh hapumpong — aton kurang labih saratus due puluh biti oloh je dumah — Petrus mendeng handak hakotak. Ie hamauh,

¹⁶“O kare pahari! Taloh je tarasurat huang Surat Barasih, jete musti manjadi. Horan mahalau Dawid, Roh Hatalla jari manujum tahiu Yudas, pamimpin kare oloh je manawan Yesus te.

¹⁷Yudas te aton ije biti bara itah, tuntang ie jari iintih kea uka omba bagawi haya-hayak dengan itah.” (

¹⁸ Yudas toh jari mandino petak akan kubure bara upah kadarhakae je papa. Ie manjato tuntang matei, kanaie babindai sampai taloh je huang kanaie balua lepah.

¹⁹Kare oloh je melai hong Yerusalem uras katawan tahiu hal te. Jete sababe huang basan ewen, ewen manyewut petak te Akeldama, je rimae ‘Petak Daha’.)

²⁰ “Karana huang Surat Mazmur aton tarasurat kalotoh, ‘Keleh ekae melai te manjadi suni benyem; ije mahin ela aton oloh melai huange.’ Aton kea tarasurat kalotoh, ‘Keleh ekae mondok te induan awi oloh beken.’

²¹ Tagal te, musti aton ije biti oloh je puji omba itah manjadi saksi tahiu Tuhan Yesus je jari belom haluli bara pampatei. Oloh te musti aton ije biti bara kare oloh je harajur haya-hayak dengan itah katahin itah omba Yesus akan hete-hete, bara metoh Yohanes nampara mampandoi[2] sampai katika Yesus mandai akan sorga bara bentok itah.”

²³Maka kare oloh je dumah intu hete mausul due biti, iete Yosep je inyewut kea Barsabas (ie inyewut Yustus kea), tuntang Matias.

²⁴Palus ewen balakudoa. Ewen hamauh, “Tuhan, ikau katawan atei oloh samandiai. Yudas jari manjato bara pangkate kilau rasul tuntang jari matei. Jadi keleh mamparahan akan ikei eweh bara due biti oloh toh je iintih Tuhan uka akae inenga gawi te mangganti Yudas.”

²⁶Limbah te kadadue aran oloh te inenong, maka tenong te manjato akan Matias. Jadi ie iangkat manjadi rasul omba haya-hayak dengan sawalas rasul je beken te.