Read Ngaju SARITAN GAWIN KARE RASUL 10 Bible Online

SARITAN GAWIN KARE RASUL 10 - Ngaju bible

SARITAN GAWIN KARE RASUL 10

¹Intu Kaisarea aton ije biti oloh hatue bagare Kornelius. Ie te ije biti kapten “Pasukan Italia”.

²Ie oloh je mikeh dengan Hatalla tuntang hapus keluargae sombayang manyembah Hatalla. Ie are mandohop kare oloh Yehudi je belom susah, tuntang ie harajur balakudoa intu Hatalla.

³Hong sinde andau kurang labih pukul telo halemei ie mite batantu huang tampayahe, ije malekat Hatalla dumah tuntang mantehau ie, “Kornelius!”

⁴Kornelius mananture malekat te dengan kikehe palus hamauh, “Aton en Tuan?” Malekat te tombah, “Lakudoam tuntang kataum jari inarima awi Hatalla tuntang Hatalla mingat ikau.

⁵Toh soho oloh akan Yope mantehau Simon je bagare Simon Petrus.

⁶Ie melai manyandehan intu human ije biti tukang upak meto bagare Simon, je melai intu saran tasik.”

⁷Limbah malekat je hakotak dengan Kornelius te haguet, Kornelius mantehau due biti anak oloh ayue intu humae tuntang ije biti tentara pangawal ayue je barasih ateie.

⁸Kornelius manyarita akan ewen taloh je jari manjadi, palus manyoho ewen akan Yope.

⁹Andau jewue tinai metoh ewen magon huang panjalanae tuntang handak sampai Yope, Petrus mandai akan hunjun huma uka balakudoa.

¹⁰Palus ie balau tuntang handak kuman. Pandehan oloh manatap panginan, ie mite ije taloh paite.

¹¹Ie mite langit buap tuntang taloh je kilau benang lombah impamohon akan hunjun petak inggayong intu epat putinge.

¹²Intu huange aton sukup macam kare meto je hapai epat, kare meto je manggayar tuntang kare burong baliar.

¹³Palus aton auh je hakotak dengae, “Petrus, misik! Sambalih tuntang kinan!”

¹⁴Petrus tombah, “Dia, Tuhan! Hindai puji aku kuman taloh je pali atawa papa.”

¹⁵Tapi auh Tuhan te hamauh tinai dengae, “Taloh je jari imparasih awi Hatalla, ela ikau manyewut jete pali.”

¹⁶Taloh tampayahe te lulang-luli telo tingkat, limbah te benang te hagatang akan sorga.

¹⁷Petrus bingung manirok en riman taloh je gitae te. Pandehan Petrus manirok hal te, kare oloh je inyoho awi Kornelius jari sondau human Simon tuntang ewen jari aton intu bauntonggang.

¹⁸Palus ewen mantehau oloh tuntang misek, “En intu hetoh aton oloh tamuei melai manyandehan je arae Simon Petrus?”

¹⁹Pandehan Petrus magon manggau riman tampayahe te, Roh Hatalla hamauh dengae, “O Petrus, aton telo biti[12] oloh dumah manggau ikau.

²⁰Ayo bajeleng mohon akan penda tuntang ela bembang omba ewen, basa Aku toh je manyoho ewen.”

²¹Maka Petrus mohon akan penda tuntang hamauh dengan kare oloh te, “Aku toh ie je inggau awi kare pahari. Mbuhen keton dumah?”

²²Ewen tombah, “Kapten Kornelius manyoho ikei akan hetoh. Ie te ije biti oloh bahalap tuntang mikeh dengan Hatalla tuntang paham ihormat kakare oloh Yehudi. Ije biti malekat Hatalla manyoho ie balaku Tuan dumah akan humae basa kilau inenga tumon lakudoae, ie inyoho mahining taloh je insanan Tuan akae.”

²³Maka Petrus manyoho ewen tame uka melai manyandehan hete. Andau jewue tinai Petrus hingkat tuntang haguet haya-hayak dengan ewen. Pire-pire oloh percaya bara Yope mahin omba kea.

²⁴Ije andau limbah te ewen sampai hong Kaisarea. Intu hete ewen jari ientai awi Kornelius dengan kare paharie tuntang kare sobate je jari iraweie.

²⁵Katika Petrus sampai, Kornelius haguet manambang ie tuntang sontop manyembah intu taharepe.

²⁶Tapi Petrus mandohop ie mendeng palus hamauh, “Mendeng! Aku kabuat mahin olon kea.”

²⁷Sambil hakotak dengan Kornelius, Petrus tame akan huang huma. Intu hete ie mite are oloh jari hapumpong.

²⁸Palus ie hamauh dengan ewen, “Pahari handiai katawan kabuat je oloh Yehudi te ingahana awi agamae maja atawa mawi hubungan dengan kare oloh bangsa beken. Tapi Hatalla jari mansanan akangku je aku dia tau manyewut oloh beken pali atawa papa.

²⁹Jete sababe katika Tuan balaku aku dumah, aku dia mangkeme babehat dumah. Jadi toh aku handak katawan mbuhen Tuan balaku aku dumah.”

³⁰Kornelius tombah, “Telo andau jari mahalau, katika kurang labih kilau toh, aku metoh balakudoa[13] intu huma pukul telo halemei. Maka salenga ije biti oloh hatue mendeng hila baungku. Pakaian oloh te mangilat.

³¹Ie hamauh, ‘Kornelius! Hatalla jari manarima lakudoam tuntang mingat kare kahalap ateim.

³²Jadi soho oloh akan Yope mantehau oloh je bagare Simon Petrus. Ie aton manyandehan hong human ije biti tukang upak meto je bagare Simon; huma te intu saran tasik.’

³³Jete bukue aku bajeleng manyoho oloh haguet mantehau Tuan. Tuntang Tuan paham bahalap atei sampai dumah akan hetoh. Toh ikei samandiai hapumpong intu taharep Hatalla uka mahining taloh handiai je inyoho Hatalla Tuan mansanae akan ikei.”

³⁴ Palus Petrus hamauh, “Toh aku toto-toto mangatawan je Hatalla te sama ampin kataue dengan oloh samandiai.

³⁵Oloh je mikeh Hatalla tuntang malalus taloh je bujur, oloh te inarima awi Hatalla, dia ie paduli oloh te bara bangsa je kueh.

³⁶Pahari samandiai jari katawan auh barita je inyampai Hatalla akan bangsa Israel. Barita te iete tahiu Barita Bahalap kadamai mahalau Yesus Kristus, Ie te Tuhan oloh samandiai.

³⁷Keton katawan en je jari manjadi hong hapus daerah Yuda, iete nampara bara Galilea limbah pampandoi je ilalus awi Yohanes.

³⁸Keton katawan je Hatalla jari mintih Yesus oloh Nasaret te tuntang manenga Akae Roh Hatalla tuntang kuasa. Keton katawan kea je Yesus te haguet akan hete-hete uka malalus kahalap; Ie mampakeleh oloh samandiai je inguasa awi setan, basa Hatalla mampahayak Ie.

³⁹Ikei toh ie kare oloh je jari mitee kabuat taloh handiai je ilaluse hong daerah oloh Yehudi hong Yerusalem. Aloh kalote ewen manyampalaki tuntang mampatei Ie.

⁴⁰Tapi hong andau je kateloe Hatalla mambelom Ie tinai bara pampatei tuntang mamparahan Ie akan olon;

⁴¹dia akan oloh samandiai, malengkan baya akan ikei je jari iintih Hatalla labih helo uka manjadi saksi Akae: Ikei kuman tuntang mihop Dengae limbah Ie belom haluli bara pampatei.

⁴²Tuntang Ie manyoho ikei mansanan Barita Bahalap te akan kare oloh tuntang manenga kasaksian je Ie te iangkat awi Hatalla manjadi Hakim akan kare oloh je magon belom tuntang kare oloh je jari matei.

⁴³Uras kare nabi hakotak tahiu Ie. Ewen mansanan tahiu oloh samandiai je percaya dengan Yesus, dosae kareh iampun mahapan kuasa bara Yesus.”

⁴⁴Metoh Petrus magon hakotak, Roh Hatalla mohon tuntang manguasa oloh samandiai je mahining barita te.

⁴⁵Kare oloh Yehudi je percaya dengan Yesus tuntang omba mampahayak Petrus bara Yope, uras hengan mite Hatalla manenga kea Roh Ayue akan kare oloh bangsa beken je dia Yehudi.

⁴⁶Basa ewen mahining kare oloh te hakotak hong kare basa tuntang manara kahain Hatalla. Palus Petrus hamauh,

⁴⁷“Coba ite, kare oloh toh jari mandino Roh Hatalla sama kilau itah. Jadi en tau oloh mahambang ewen mangat impandoi hapan danum?”

⁴⁸Maka Petrus manyoho ewen impandoi huang aran Yesus Kristus. Limbah te ewen balaku uka Petrus melai dengan ewen pire-pire andau katahie.