Read Ngaju SARITAN GAWIN KARE RASUL 11 Bible Online

SARITAN GAWIN KARE RASUL 11 - Ngaju bible

SARITAN GAWIN KARE RASUL 11

¹Kare rasul tuntang kare oloh percaya hong hapus daerah Yuda mahining kea kare oloh percaya je dia bara agama Yehudi mahin jari manarima auh Hatalla.

²Rahian tinai katika Petrus haguet akan Yerusalem, kare oloh Yehudi je jari percaya te, manyalan Petrus.

³Ewen hamauh, “Mbuhen ikau haguet akan kare human oloh je hindai basunat? Ikau omba kuman haream dengan ewen!”

⁴Tagal te Petrus manarang akan ewen taloh handiai je jari manjadi, nampara bara tamparae. Petrus hamauh,

⁵“Aku metoh balakudoa hong lewu Yope, palus aku mite ije taloh paite. Aku mite aton ije taloh je kilau ije kalambar benang lombah impamohon bara langit, gayo-gayong intu epat putinge, limbah te tende hila balikatku.

⁶Katika aku mananture akan huange, aku mite kare meto hapai epat, kare meto baliar, kare meto je manggayar tuntang kare burong baliar.

⁷Palus aku mahining ije auh hamauh dengangku, ‘Ayo misik, Petrus! Sambalih jete tuntang kinan!’

⁸Tapi aku tombah, ‘Dia, Tuhan! Hindai puji aku kuman panginan je pali tuntang papa.’

⁹Tapi auh te hakotak tinai bara langit, ‘Taloh je jari imparasih awi Hatalla ela ikau manyewut jete pali.’

¹⁰Aku mite taloh te sampai telo tingkat tuntang kajariae taloh samandiai te hagatang haluli akan sorga.

¹¹Pas huang katika te kea telo biti oloh Kaisarea, je inyoho manalih aku,[14] sampai intu huma ekaku manyandehan.

¹²Palus Roh Hatalla manyoho aku haguet omba ewen hayak ela bembang. Jahawen pahari toh mahin omba dengangku akan Kaisarea, tuntang ikei handiai tame akan huang human Kornelius.

¹³Rahian tinai Kornelius manyarita akan ikei kilen ampie ie mite ije malekat mendeng intu humae tuntang hamauh, ‘Soho oloh akan Yope mantehau ije biti oloh hatue je bagare Simon Petrus.

¹⁴Ie kareh mansanan akam barita je manyalamat ikau tuntang keluargam.’

¹⁵Tuntang hong katika aku nampara hakotak kalote,” kalote auh Petrus manontong saritae, “Roh Hatalla dumah akan hunjun ewen, sama kilau je manjadi buah itah bihin huang tamparae.

¹⁶ Palus aku taraingat, Tuhan puji hamauh, ‘Yohanes mampandoi hapan danum, tapi keton akan impandoi hapan Roh Hatalla.’

¹⁷Jadi batantu Hatalla kea manenga akan kare oloh je dia bara agama Yehudi te, panenga je sama kilau inenga Awie akan itah katika itah percaya dengan Tuhan Yesus Kristus. Tagal te, kueh aku tau mangahana Hatalla!”

¹⁸Limbah mahining jete, ewen dia manyalan hindai. Palus ewen manara Hatalla. Ewen hamauh, “Amon kalote, kare oloh je dia Yehudi mahin inenga katika uka hobah bara kare dosae tuntang mangkeme pambelom je bujur!”

¹⁹ Limbah Stepanus impatei, kare oloh je percaya dengan Yesus nampara inggau oloh, sampai ewen kasaburan akan hete-hete. Aton je hadari akan Poinike, tuntang aton kea je sampai akan Siprus tuntang Antiokhia. Ewen mangabar barita bara Hatalla akan kare oloh Yehudi bewei.

²⁰Tapi pire-pire biti bara ewen, je asale bara Siprus tuntang Kirene, haguet akan Antiokhia tuntang mangabar Barita Bahalap tahiu Yesus te akan kare oloh je dia bara agama Yehudi[15] kea.

²¹Kuasan Tuhan aton intu ewen sampai are oloh manjadi percaya tuntang manyarah arepe akan Tuhan.

²²Kare sarita tahiu kajadian toh sampai kea akan ungkup intu Yerusalem. Maka ewen manyoho Barnabas akan Antiokhia.

²³Tuntang katika Barnabas sampai intu hete, tuntang mite kilen ampie Hatalla mamberkat kare oloh te, ie hanjak toto. Palus ie balaku mangat ewen toto-toto baketep dengan Tuhan hapan salepah atei.

²⁴Barnabas toh oloh je bahalap ateie tuntang inguasa awi Roh Hatalla hayak percaya toto dengan Tuhan sampai are oloh omba Tuhan.

²⁵Limbah te Barnabas haguet akan Tarsus manggau Saulus.

²⁶Limbah hasondau dengan Saulus, ie mimbit Saulus akan Antiokhia tuntang ije nyelo bulat ewen hinje dengan ungkup intu hete sambil majar are oloh. Intu Antiokhia te kare oloh percaya dengan Yesus te je panyolake inyewut oloh Kristen.

²⁷Hong katika te aton pire-pire nabi dumah bara Yerusalem akan Antiokhia.

²⁸ Bara marak ewen te aton ije biti je bagare Agabus. Awi sohon Roh Hatalla ie manujum iete hong hapus kalunen akan dumah wayah lau je paham. (Tuntang hal te puna manjadi kea katika Kaisar Klaudius marentah.)

²⁹Maka kakare murid Yesus te pakat uka mangirim sumbangan akan kare pahari je melai hong Yuda; genep biti mangirim sumbangan manumon kaolihe.

³⁰Gawi pakat te ilalus kea, palus Barnabas tuntang Saulus inyoho uka magah sumbangan te akan kare pamimpin ungkup.