Read Ngaju SARITAN GAWIN KARE RASUL 12 Bible Online

SARITAN GAWIN KARE RASUL 12 - Ngaju bible

SARITAN GAWIN KARE RASUL 12

¹Kurang labih katika te kea Raja Herodes[16] nampara mangapehe kare anak ungkup.

²Awi parentah ayue, Yakobus paharin Yohanes, impatei hapan padang.

³Katika Herodes mite taloh gawie te mampahanjak atei oloh Yehudi, ie mawi taloh je kilau te tinai; ie manyoho oloh manawan Petrus kea. Hal te manjadi hong Andau Pesta Rote Dia Iragi.

⁴ Limbah inawan, Petrus inamean akan huang penjara. Epat kawan tentara inyoho uka manjaga Petrus intu hete — hong ije kakawan aton epat biti tentara. Limbah pesta Paska hapus, harue Herodes handak mamutus perkaran Petrus hong bentok oloh are.

⁵Jadi Petrus inahan huang penjara; tapi kare anak ungkup harajur balakudoa ih hapan katoton ateie dengan Tuhan akan Petrus.

⁶Hong alem helo bara Herodes mimbit Petrus akan bentok oloh are, Petrus batiroh helat due pangawal. Ie injarat hapan due pasong. Intu bauntonggang penjara, kare pangawal beken kea kanjerae manjaga penjara.

⁷Te salenga malekat Tuhan mendeng intu hete tuntang ije kalawa manyingah huang kamar penjara te. Malekat te manggolak Petrus sampai ie misik. Palus malekat te hamauh, “Ayo bajeleng misik!” Hemben te kea rantai sanaman manjato bara lengen Petrus.

⁸Limbah te malekat te hamauh, “Kepan pakaiam tuntang njarat talin sapatum.” Maka Petrus balalu mangkepan pakaiae tuntang manjarat talin sapatue. Limbah te malekat te hamauh tinai, “Kepan jubahm tuntang nuntut aku.”

⁹Maka Petrus manuntut malekat te balua bara penjara. Tapi Petrus dia katawan taloh je iawi malekat te jete taloh je puna toto-toto manjadi. Petrus manyangka jete baya taloh paite bewei.

¹⁰Katika ewen jari mahalau eka oloh jaga je solake tuntang je kaduee, ewen sampai akan bauntonggang sanaman je palus manintu lewu. Bauntonggang te buap kabuate, palus ewen balua tuntang mananjong mahalau ije jalan korik. Intu hete salenga malekat te malihi Petrus.

¹¹Limbah te harue Petrus barendeng palus mangatawan taloh je jari manjadi buah ie, palus ie hamauh, “Toh aku katawan je Tuhan toto-toto manyoho malekat ayue uka maliwus aku bara kuasan Herodes tuntang bara taloh handiai je akan iawi bangsa oloh Yehudi dengangku.”

¹²Limbah ie mangatawan toto taloh te, Petrus haguet akan human Maria, indu Yohanes je inyewut kea Markus. Intu hete are oloh hapumpong tuntang balakudoa.

¹³Petrus manegah bauntonggang luar, palus ije biti pelayan bawi bagare Rode, dumah uka muap bauntonggang.

¹⁴Balalu ie mangasene auh Petrus. Tagal kahanjake, ie jele-jeleng tame haluli marak bauntonggang hindai iuap. Palus ie mansanan akan kare oloh intu hete, Petrus aton intu luar.

¹⁵“Gila ikau!” koan ewen. Tapi Rode jua-juan manyewut jete puna toto Petrus. Maka ewen hamauh, “Jete malekat ayue!”

¹⁶Pandehan te Petrus jua-juan kea manegah bauntonggang. Maka katika ewen muap bauntonggang, tuntang mite Petrus, ewen hengan toto.

¹⁷Petrus manenga tanda hapan lengee uka ewen suni, limbah te ie manyarita kilen ampie Tuhan mimbit ie balua bara penjara. Palus ie hamauh, “Sanan hal toh akan Yakobus tuntang kare pahari je beken kea.” Limbah te Petrus malihi eka te tuntang haguet akan eka beken.

¹⁸Andau jewue maka lembut karidu hong marak kare tentara pangawal. Ewen gogop toto tagal taloh je jari manjadi buah Petrus.

¹⁹Palus Herodes manyoho oloh manggau Petrus, tapi ewen jaton olih sondau ie. Jadi Herodes marentah uka kare pangawal te iisek palus impatei. Limbah te Herodes haguet bara Yuda tuntang melai pire-pire katahie intu Kaisarea.

²⁰Herodes balait toto dengan kare oloh Tirus tuntang Sidon. Tagal te ewen haya-hayak manalih manaharep ie. Sola-solake ewen mangatau Blastus, je mangapala istana Herodes, sampai ie omba mamihak ewen. Limbah ewen haguet manaharep Herodes, palus balaku badamai, basa lewun ewen te bahapang dengan panginan bara lewun Herodes.

²¹Hong sinde andau je jari inukas, Herodes mahapan pakaian kahaie palus mondok intu karusi karajaan tuntang nampara pidato intu taharep rayat.

²²Rayat je mahining auh te mangkariak, “Jetoh auh dewa, dia auh olon!”

²³Hemben te kea malekat Tuhan manampar Herodes, awi ie dia mahormat Hatalla. Herodes kinan awi handalai palus matei.

²⁴Maka auh Hatalla sasar tayap tuntang sasar dehen.

²⁵Limbah Barnabas tuntang Saulus mampajadi gawin ewen, ewen haluli bara[17] Yerusalem hayak mimbit Yohanes Markus dengan ewen.