Read Ngaju SARITAN GAWIN KARE RASUL 13 Bible Online

SARITAN GAWIN KARE RASUL 13 - Ngaju bible

SARITAN GAWIN KARE RASUL 13

¹Intu huang ungkup Antiokhia aton kare nabi tuntang kare guru, iete Barnabas, Simon je inggare Bilem, Lukius bara Kirene, Menahem je belom bara korik sampai hai hinje raja Herodes,[18] tuntang Saulus.

²Katika ewen metoh sombayang manyembah Tuhan tuntang puasa, Roh Hatalla hamauh dengan ewen, “Intih akangku Barnabas tuntang Saulus uka ewen malalus gawi je jari inatap akan ewen.”

³Limbah puasa tuntang balakudoa ewen mina lengen ewen hunjun Barnabas tuntang Saulus palus manyoho ewen haguet.

⁴Basa inyoho awi Roh Hatalla, Barnabas tuntang Saulus haguet akan Seleukia. Bara hete ewen balayar akan pulau Siprus.

⁵Katika sampai hong Salamis, ewen mambarita auh Hatalla hong kare huma sombayang Yehudi. Yohanes Markus mandohop ewen huang jalanan ewen.

⁶Hapus pulau te ingumbang ewen sampai Papos. Intu hete ewen hasondau dengan oloh Yehudi bagare Bar Yesus. Ie te tukang sihir je mangaku arepe nabi.

⁷Sergius Paulus, gubernur pulau te hasobat toto dengan tukang sihir te. Gubernur te ije biti oloh pintar harati. Ie mantehau Barnabas tuntang Saulus basa ie mipen handak mahining auh Hatalla.

⁸Tapi Barnabas tuntang Saulus inantang awi Elimas tukang sihir te, awi Elimas (Jete arae huang basa Yunani) manggau jalan uka gubernur te ela sampai percaya dengan Yesus.

⁹Tapi Saulus — je inyewut kea Paulus — inguasa awi Roh Hatalla, sampai ie manampayah tukang sihir te,

¹⁰palus hamauh, “O kapala tanjaro, anak kapapa! Ikau musoh kare taloh bahalap. Mbuhen ikau dia maku terai marusak rencana Hatalla uka manyalamat olon?

¹¹Ite toh, Tuhan kareh mahukum ikau! Ikau kareh manjadi babute, sampai ikau dia tau mite kalawan matanandau tinai katahin ije katika.” Hemben te kea Elimas mangkeme aton ambun je babilem manutup matae sampai ie mananjong gaya-gayap manggau oloh uka mangagalan ie.

¹²Katika gubernur te mite taloh je jari manjadi, ie percaya dengan Yesus; awi ie jungun toto tagal auh ajar tahiu Tuhan.

¹³Bara Papos, Paulus tuntang kare kawale balayar akan Perga hong Pampilia. Intu hete Yohanes Markus malihi ewen, palus haluli akan Yerusalem.

¹⁴Bara Perga ewen marajur jalanae akan Antiokhia hong Pisidia, limbah te hong andau Sabat ewen haguet tuntang mondok huang huma sombayang.

¹⁵Limbah Surat Moses tuntang Surat Kare Nabi imbasa, kare pamimpin huma sombayang te manyoho oloh misek dengan Paulus tuntang kare kawale, “Pahari handiai, amon ain pahari aton ije auh nasehat akan kare oloh toh, takan ih manyampai auh nasehat te.”

¹⁶Maka Paulus mendeng palus manenga tanda hapan lengee, limbah te ie hamauh, “Paharingku handiai bangsa Israel tuntang kare pahari handiai je beken kea hetoh je mamenda Hatalla! Keleh hining auhku:

¹⁷ Hatalla ain bangsa Israel jari mintih tato hiang itah, tuntang manjadian bangsa toh bangsa je hai metoh ewen manamuei hong tanah Misir. Limbah te, hapan kuasae je hai, Hatalla mimbit ewen balua bara Misir.

¹⁸ Ie sabar atei Aie manaharep ampin kare tingkah ewen[19] hong padang pasir epat puluh nyelo katahie.

¹⁹ Uju bangsa oloh impalomose hong daerah Kanaan uka mambagi-bagi daerah te akan bangsa Israel mangat daerah te manjadi daerah ain ewen.

²⁰ Taloh samandiai te manjadi epat ratus lime puluh nyelo katahie. Limbah ewen mambagi daerah Kanaan te,[20] Hatalla manenga akan ewen kare hakim. Hakim je pangkarahiae iete nabi Samuel.

²¹ Rahian tinai ewen balaku ije biti raja. Hatalla manenga akan ewen Saul anak Kis bara suku Benyamin uka manjadi rajan ewen epat puluh nyelo katahie.

²² Limbah Hatalla manindar ie bara kadudukae, Hatalla mangkat tinai Dawid manjadi rajan ewen. Tuntang toh ie taloh je insanan Hatalla tahiu Dawid, ‘Aku jari mandino Dawid anak Isai te ije biti oloh je manyanang atei-Ku. Ie te oloh je malalus kahandak-Ku.’

²³Bara turonan Dawid te Hatalla manatap akan bangsa Israel ije Raja Panyalamat, kilau je jari injanjie. Tuntang Yesus te Ie Raja Panyalamat te.

²⁴ Helo bara Yesus nampara malalus gawie, Yohanes jari mantehau kare oloh Israel uka hobah bara dosan ewen tuntang impandoi.

²⁵ Tuntang katika gawie tokep hapus Yohanes hamauh dengan kare oloh, ‘Eweh kea aku toh manumon koan keton? Aku toh dia ie oloh je ientai keton. Ingat oloh te kareh dumah limbah aku; aku toh, aloh mengkak talin sapatun Ayue mahin jaton patut Akae.’

²⁶Pahari handiai turonan Abraham, tuntang kare pahari handiai je beken intu hetoh je mamenda Hatalla! Hatalla jari mangirim akan itah barita salamat te;

²⁷basa kare oloh je melai hong Yerusalem tuntang kare pamimpin ewen dia mangatawan Ie te je bagare panyalamat te. Ewen dia harati auh ajar kare nabi je imbasa genep andau Sabat, sampai ewen mahukum Yesus. Tapi tagal ewen mawi taloh je macam te, maka tagal ewen te kea taloh je inujum awi kare nabi manjadi tulus.

²⁸ Aloh ewen dia olih sondau taloh en-en je tau mawi Ie ihukum hapan pampatei, mahin kea ewen balaku dengan Pilatus uka Ie impatei.

²⁹ Tuntang limbah ewen jari mahapus kare taloh gawin ewen mawi Ie kilau je jari inyurat huang Surat Barasih, ewen mampamohon hantue bara kayu sampalaki, palus mingkes Ie huang kubur.

³⁰Tapi Hatalla mambelom Ie haluli bara pampatei.

³¹ Limbah te pire-pire andau katahie Ie mamparahan arepe akan kare oloh je jari dumah hayak dengae bara Galilea akan Yerusalem. Ewen te je wayah toh manjadi saksi tahiu Ie akan bangsa Israel.

³²Jadi toh, ikei manyampai Barita Bahalap te akan keton: Taloh je jari injanji Hatalla akan tato-hiang itah,

³³ jete jari ilalus intu itah awie mambelom Yesus haluli bara pampatei. Basa huang Mazmur je kadue aton tarasurat, ‘Ikau toh anak-Ku, hong andau toh Aku manjadi Bapa Ayum.’

³⁴ Hatalla jari mambelom Ie haluli bara pampatei. Toh Ie dia mangkeme pampatei tinai intu huang kubur, tahiu hal te Hatalla hamauh, ‘Aku kareh manenga Akam janji je barasih, je pasti kareh inggenep, je jari injanji-Ku akan Dawid.’

³⁵ Kalote kea hong ayat beken inyewut, ‘Ikau kareh dia manalua rewar Aim je baketep te maram huang kubur.’

³⁶Dawid jari matei tuntang ingubur kea hinje dengan tato-hiange, limbah Ie malalus kare taloh je inyoho Hatalla Ie mawie. Hantun Dawid mahin jari hancor lepah urase.

³⁷Tapi Yesus, je imbelom haluli awi Hatalla bara pampatei, Yesus te dia hancor lepah.

³⁸Tagal te pahari handiai, keton musti katawan iete mahalau Yesus toh barita ampun dosa insanan akan keton; keton musti katawan iete gagenep oloh je percaya dengae, iliwus bara kare dosae je dia olih impuas mahalau kare parentah Hatalla je inyampai awi Moses.

³⁹

⁴⁰Jete sababe keton musti manantuani bua-buah ela sampai buah keton[21] taloh je insanan awi kare nabi,

⁴¹ ‘Nantuani bua-buah, o kare keton je rajin mahina! Keton kareh hengan, palus matei! Basa hong jaman jetoh Aku kanjerangku malalus taloh je dia keton handak percayae, aloh aton oloh manarange akan keton.’ ”

⁴²Katika Paulus tuntang Barnabas malihi huma sombayang te, kare oloh intu huma sombayang te balaku ewen haluli tinai huang andau Sabat je rahian, uka manarang labih are tahiu kare hal te.

⁴³Limbah kare oloh balua bara huma sombayang te, Paulus tuntang Barnabas inuntut awi are oloh Yehudi tuntang oloh bangsa beken je jari tame agama Yehudi. Maka kare rasul te manasehat ewen harajur harap dengan asin Hatalla.

⁴⁴Hong andau Sabat je rahian tinai, bilak uras oloh hong lewu te dumah mahining auh Tuhan.

⁴⁵Katika kare oloh Yehudi mite kare oloh are te, ewen bahiri toto ateie. Ewen mahina Paulus tuntang malawan taloh handiai je insanae.

⁴⁶Tapi Paulus tuntang Barnabas sasar bahanyi haream hakotak tarus-tarang. Ewen hamauh, “Auh Hatalla puna musti inyampai helo akan keton. Tapi awi keton dia maku manarimae, keton jari manukas kabuat keton dia patut manarima pambelom je bujur tuntang katatahie. Tuntang toh ikei malihi keton tuntang manalih bangsa beken.

⁴⁷ Basa jetoh parentah Tuhan akan ikei; Tuhan hamauh, ‘Aku jari manukas keton manjadi kalawa akan kare bangsa beken je dia Yehudi, mangat keton mimbit salamat akan hapus kalunen.’ ”

⁴⁸Katika kare bangsa beken je dia Yehudi mahining jete, ewen hanjak toto, palus manara auh Tuhan. Tuntang kare oloh je jari inukas awi Hatalla uka mandino pambelom je bujur tuntang katatahie, maka kare oloh te palus percaya.

⁴⁹Maka auh Tuhan tayap akan hete-hete hong hapus daerah te.

⁵⁰Tapi kare oloh hai hong lewu te tuntang kare oloh bawi bara utus gantong je mikeh dengan Hatalla, buah pangaruh awi kare oloh Yehudi. Ewen mampalembut kamusoh dengan Paulus tuntang Barnabas, tuntang maharak ewen due bara daerah te.

⁵¹ Maka kare rasul te mangibas kawo bara pain ewen intu taharep kare oloh te kilau pampingat, palus haguet akan Ikonium.

⁵²Kare murid hong Antiokhia paham hanjak tuntang inguasa awi Roh Hatalla.