Read Ngaju SARITAN GAWIN KARE RASUL 14 Bible Online

SARITAN GAWIN KARE RASUL 14 - Ngaju bible

SARITAN GAWIN KARE RASUL 14

¹Paulus tuntang Barnabas buah hal je sama kilau te kea hong Ikonium. Ewen haguet kea akan huma sombayang Yehudi tuntang hakotak intu hete kalote ampie sampai are oloh Yehudi tuntang oloh je dia Yehudi percaya dengan Yesus.

²Tapi kare oloh Yehudi je dia maku percaya, mampangaruh kare oloh je dia Yehudi, sampai mawi ewen manyingi kare oloh je percaya dengan Yesus.

³Tagal te Paulus tuntang Barnabas melai tahi intu hete. Tuntang dengan kahanyie ewen hakotak tahiu Tuhan. Maka Tuhan kea mawi bukti je barita ain ewen tahiu asin Aie te toto; Ie manenga kuasa akan ewen uka malalus kare taloh heran tuntang kare hal je dia puji helo.

⁴Tapi oloh lewu te hakalawan sama arepe; aton je omba pihak oloh Yehudi tapi aton kea je omba pihak kare rasul te.

⁵Palus kare oloh Yehudi tuntang kare pamimpin ewen haya-hayak dengan kare oloh je dia Yehudi pakat uka mangapehe tuntang mamedak kare rasul te hapan batu.

⁶Tapi kare rasul te mangatawan hal te, palus ewen mangejau arepe akan Listra tuntang Derbe, iete kare lewu hong Liakonia, tuntang akan daerah hakaliling hete.

⁷Intu hete ewen mambarita tinai Barita Bahalap te.

⁸Hong Listra aton ije biti oloh hatue je lumpuh paie bara metoh ie inakan, sampai ie dia puji tau mananjong, awi paie paham balemo.

⁹Oloh te mondok intu hete mahining Paulus hakotak. Paulus mite je oloh te percaya tuntang tagal te ie tau impakeleh. Maka Paulus manampayah ie

¹⁰tuntang hapan auh hai Paulus hamauh, “Keleh ikau mendeng!” Oloh te manangkajok mendeng palus mananjong.

¹¹Katika oloh are mite taloh je jari ilalus awi Paulus, ewen mangkariak huang basa Liakonia, “Kare dewa jari mohon akan kalunen hapan bitin olon.”

¹²Palus ewen manggare Barnabas te Zeus, tuntang Paulus inggare ewen Hermes, basa ie te je hakotak.

¹³Imam dewa Zeus, je aton humae intu baun lewu, dumah mimbit kare sapi hatuee tuntang kare kambang akan bauntonggang lewu. Ie handak omba dengan oloh are maluput parapahe akan kare rasul te.

¹⁴Katika Barnabas tuntang Paulus mahining taloh je handak ilalus awi oloh are te, ewen marabit pakaiae sambil hadari akan bentok oloh are te, palus mangkariak,

¹⁵ “Hau, mbuhen keton malalus taloh toh? Ikei toh olon kea sama kilau pahari. Ikei aton intu hetoh uka mangabar Barita Bahalap akan keton uka keton malihi kare taloh je dia baguna toh tuntang dumah manalih Hatalla je belom, je manjapa langit tuntang petak, tuntang tasik tuntang kare taloh je aton intu huange.

¹⁶Hong katika je halau Hatalla manalua kare bangsa belom manumon kahandak ewen kabuat-kabuat.

¹⁷Tapi Ie dia kalapean manenga bukti tahiu Arepe, iete malalus taloh bahalap. Ie manenga akan keton ujan bara langit tuntang hasil petak intu wayahe. Ie manenga panginan akan keton tuntang manyanang atei keton.”

¹⁸Tapi mahapan kare auh te mahin bahali kea kare rasul te mambalang kare oloh te maluput parapah akan ewen.

¹⁹Pire-pire oloh Yehudi je dumah akan Listra bara Antiokhia hong Pisidia tuntang Ikonium, manantiring oloh are te sampai oloh te mamihak ewen. Ewen mamedak Paulus hapan batu, limbah te mihir ie balua lewu. Ewen manyangka ie jari matei.

²⁰Tapi katika kare oloh je percaya intu hete mendeng mangaliling ie, ie hingkat tuntang tame haluli akan lewu. Andau jewue ie haguet akan Derbe haya-hayak dengan Barnabas.

²¹Intu Derbe, Paulus tuntang Barnabas mangabar Barita Bahalap te tuntang are oloh manjadi percaya dengan Yesus. Limbah te ewen haluli akan Listra, limbah te akan Ikonium, palus akan Antiokhia hong Pisidia.

²²Hong kare lewu te ewen mampaabas atei kare murid Yesus tuntang manasehat kare murid Ayue uka tetep percaya dengan Yesus. “Itah musti buah kapehe helo, harun itah tau mangkeme kahanjak hong Lewu Taheta ain Hatalla,” kalote auh kare rasul te majar kare murid Yesus hong kare lewu te.

²³Tuntang intu genep ungkup, Paulus tuntang Barnabas mangkat kare pamimpin akan kare ungkup te. Palus hapan lakudoa tuntang puasa, ewen manyarah kare pamimpin te akan Tuhan je imercaya awi ewen te.

²⁴Limbah te Paulus tuntang Barnabas marajur jalanae mahalau daerah Pisidia tuntang sampai akan Pampilia.

²⁵Tuntang limbah ewen mambarita auh Hatalla intu Perga, ewen haguet akan Atalia.

²⁶Bara hete ewen balayar haluli akan Antiokhia. Jete ie lewu eka ewen bihin inyarah akan asin Hatalla, uka ewen malalus gawi je wayah toh ewen jari mahapuse.

²⁷Katika sampai hong Antiokhia, ewen mamumpong kare oloh bara ungkup te, palus manyarita taloh handiai te je jari ilalus awi Hatalla mahalau ewen. Ewen manyarita kea tahiu ampin Hatalla muap jalan uka kare oloh je dia Yehudi percaya dengan Yesus.

²⁸Hong lewu te Paulus tuntang Barnabas melai tahi kea dengan kare oloh percaya.