Read Ngaju SARITAN GAWIN KARE RASUL 15 Bible Online

SARITAN GAWIN KARE RASUL 15 - Ngaju bible

SARITAN GAWIN KARE RASUL 15

¹ Pire-pire oloh Yuda dumah akan Antiokhia tuntang majar kare oloh percaya hong Antiokhia te, koae, amon ewen dia inyunat manumon hukum Moses, ewen dia tau inyalamat.

²Paulus tuntang Barnabas paham malawan auh tirok kare oloh te. Kajariae inukas uka Paulus tuntang Barnabas dengan pire-pire oloh beken bara Antiokhia haguet akan Yerusalem uka manahiu hal te dengan kare rasul tuntang kare pamimpin intu hete.

³Ungkup hong Antiokhia magah ewen sampai akan luar lewu, limbah te ewen haguet mahalau Poinike tuntang Samaria. Intu hete ewen manyarita kilen ampie kare oloh je dia Yehudi jari manyarah arepe akan Hatalla. Barita te paham mampahanjak kare oloh je percaya hong eka te.

⁴Katika ewen sampai hong Yerusalem, ewen inambang dengan bahalap awi ungkup, awi kare rasul tuntang kare pamimpin. Palus ewen manyarita akan kare oloh te tahiu taloh handiai je jari ilalus Hatalla mahalau ewen.

⁵Tapi pire-pire oloh bara golongan Parisi je jari percaya, mendeng tuntang hamauh, “Kare oloh bangsa beken je jari percaya te musti inyunat tuntang inyoho manumon hukum Moses.”

⁶Palus kare rasul tuntang pamimpin hapumpong uka manahiu hal te.

⁷ Tahi toto ewen hapander. Kajariae Petrus mendeng tuntang hamauh, “Pahari handiai! Keton kabuat katawan, pire-pire katika je halau Hatalla mintih aku bara marak keton uka mansanan Barita Bahalap te akan kare oloh je dia Yehudi mangat ewen kea mahining tuntang percaya.

⁸ Tuntang Hatalla je mangasene atei olon jari mamparahan je ie manarima ewen; Ie mamparahan hal te awi Ie manenga akan ewen Roh Hatalla sama kilau je jari inenga akan itah kea.

⁹Hatalla dia mangabeken itah dengan ewen. Ie mamparasih atei ewen, awi ewen percaya.

¹⁰Nah, en sababe keton handak malawan Hatalla toh awi keton manenga parentah je babehat akan kare murid toh, padahal tato-hiang itah tuntang itah kabuat mahin dia olih malaluse?

¹¹Dia! Itah percaya tuntang inyalamat awi asin Tuhan Yesus; kalote kea ewen.”

¹²Maka oloh handiai je hapumpong hete benyem. Limbah te ewen mahining auh Barnabas tuntang Paulus je manyarita haluli kakare taloh heran tuntang kare taloh je dia puji manjadi helo je jari ilalus awi Hatalla mahalau ewen hong marak kare oloh bangsa beken je dia Yehudi.

¹³Limbah ewen jari mahapus kotake, Yakobus hamauh, “Pahari handiai! Coba hining auhku.

¹⁴Simon harue ih manarang kilen ampie solake Hatalla manantuani kare oloh je dia Yehudi, dengan maksud uka mintih bara marak kare oloh je beken je kareh manjadi ungkup Ayue,

¹⁵jete hakabuah dengan je jari inujum awi kare nabi. Basa aton tarasurat kalotoh,

¹⁶ ‘Limbah te Aku akan dumah tinai,’ koan Tuhan, ‘Aku kareh mamangun haluli human Dawid je jari baduroh, tuntang mangambuah kadurohe te, palus mampendenge haluli;

¹⁷uka oloh samandiai je batisa te manggau Tuhan, haya-hayak dengan bangsa oloh handiai je dia Yehudi je jari intehau-Ku uka manjadi oloh ayung-Ku.’ Kalote auh Tuhan,

¹⁸je jari mansanan hal te bara jaman horan.”

¹⁹“Jadi manumon tirok ayungku,” koan Yakobus, “itah dia tau manyusah kare oloh je dia Yehudi je manyarah arepe akan Hatalla.

²⁰ Tapi itah musti manampa surat akan ewen tuntang manasehat ewen uka ewen ela kuman panginan je jari inyarongan akan taloh, atawa kuman isin meto je matei inyekak, atawa kuman daha. Tuntang kea uka ewen mangejau arepe bara kare gawi harayap.

²¹Basa hukum Moses jari bara horan imbasa hong genep andau Sabat intu kare huma sombayang, tuntang imbarita hong kare lewu.”

²²Kare rasul tuntang kare pamimpin, haya-hayak dengan kare hapus anak ungkup te mamutus handak mintih pire-pire biti bara marak ewen je kareh inyoho manalih Antiokhia haya-hayak dengan Paulus tuntang Barnabas. Maka ewen mintih Silas tuntang Yudas je inyewut kea Barsabas. Kadadue oloh toh uras oloh je basewut hong marak kare oloh percaya hong Yerusalem.

²³Haya-hayak dengan kare oloh sarohan te ewen mangirim kea ije kalambar surat je auh intu huange te kalotoh, “Akan kare pahari samandiai je asale bara bangsa beken je dia Yehudi, je melai hong Antiokhia, Siria tuntang Kilikia. Tabe bara ikei, kare rasul tuntang kare pamimpin, iete kare paharin keton.

²⁴Ikei jari mahining je aton pire-pire oloh bara marak ikei je jari haguet manalih keton tuntang mampahancor hayak mambingung keton hapan auh ajar ewen. Padahal ikei dia manyoho ewen malalus hal te.

²⁵Jete sababe ikei jari barunding tuntang ikei samandiai pakat uka mintih pire-pire biti tuntang manyoho ewen manalih keton. Ewen kareh haguet haya-hayak dengan pahari Barnabas tuntang Paulus je inyinta ikei.

²⁶Kadadue oloh toh uras oloh je jari mayarah pambelome tagal Tuhan itah Yesus Kristus.

²⁷Jadi, ikei manyoho Yudas tuntang Silas manalih kare pahari. Ewen kabuat ih kareh manyampai akan keton hapan auh barita je tarasurat huang surat toh kea.

²⁸Roh Hatalla jari manyoho — tuntang ikei samandiai kea pakat — uka keton ela mananggong kare taloh je babehat bara kare kapatut gawi je perlu toh:

²⁹ela kuman panginan je jari inyarah akan taloh; ela kuman daha, ela kuman isin meto je matei inyekak, tuntang keleh mangejau arep bara kare taloh harayap. Amon keton mangejau arep bara kare hal te, keton jari malalus taloh bahalap. Tikas te, salamat!”

³⁰Limbah mansanan permisi, ewen je inyoho te haguet akan Antiokhia. Hong hete ewen mantehau hapus anak ungkup hapumpong palus manyampai surat te.

³¹Katika kare anak ungkup te mambasa surat te, ewen hanjak toto dengan auh surat te je mampahanjak atei ewen.

³²Yudas tuntang Silas te uras nabi kea, tahi ewen te hakotak dengan kare pahari oloh percaya hong Antiokhia te uka manenga auh je mampamenteng atei ewen.

³³Limbah Yudas tuntang Silas melai hete pire-pire katahie, kare oloh percaya hong Antiokhia te mangirim ewen haluli tuntang manyoho ewen manyampai tabe akan kare oloh je manyoho ewen. [

³⁴Tapi Silas manukas uka tetep melai hong Antiokhia.]

³⁵Paulus tuntang Barnabas kea melai pire-pire katahie hong Antiokhia. Hong hete ewen majar tuntang mambarita auh Tuhan haya-hayak dengan oloh are je beken.

³⁶Dia tahi limbah te Paulus hamauh dengan Barnabas, “Has itah haluli manyengok kare pahari je percaya dengan Yesus hong kakare lewu eka itah jari mambarita auh Tuhan; mangat itah mite kilen ampie kaadaan ewen.”

³⁷Barnabas mipen mimbit Yohanes Markus,

³⁸ tapi Paulus mangkeme dia bahalap mimbit Markus, je dia maku bagawi pakat dengan ewen tuntang jari malihi ewen hong Pampilia.

³⁹Maka Paulus tuntang Barnabas paham hakaridu sampai kajariae ewen hapisah: Barnabas mimbit Markus tuntang balayar dengae akan Siprus.

⁴⁰Paulus mimbit Silas haguet dengae limbah kare pahari intu Antiokhia te manyarah ewen akan asin Tuhan.

⁴¹Ewen kea mangaliling Siria tuntang Kilikia; intu hete ewen mampaabas kare ungkup.