Read Ngaju SARITAN GAWIN KARE RASUL 16 Bible Online

SARITAN GAWIN KARE RASUL 16 - Ngaju bible

SARITAN GAWIN KARE RASUL 16

¹Paulus marajur panjalanae akan Derbe, limbah te akan Listra. Intu hete aton ije biti murid Yesus je bagare Timoteus. Indue oloh Yehudi, je percaya dengan Yesus; tapi bapae oloh Yunani.

²Bara marak kare oloh percaya je melai hong Listra tuntang Ikonium, Timoteus ingasene puna ie oloh bahalap.

³Paulus handak mangat Timoteus omba ie; tagal te ie manyunat Timoteus. Ie malalus jete awi kare oloh Yehudi hong daerah te uras katawan je bapa Timoteus te oloh Yunani.

⁴Hong genep lewu je inalih ewen, ewen manyampai akan kare oloh percaya kare kaputusan je jari inukas awi kare rasul tuntang kare pamimpin hong Yerusalem, ewen manasehat kare pahari je jari percaya uka manumon kare atoran te.

⁵Maka kare ungkup te sasar dehen kapercayae, tuntang genep andau sasar mandahang karee.

⁶Roh Hatalla dia manyoho Paulus tuntang Silas mambarita auh Hatalla hong propinsi Asia. Jadi jalanan ewen te irajur akan Prigia tuntang Galatia.

⁷Katika sampai hong helat watas dengan Misia, ewen mancoba tame akan propinsi Bitinia, tapi Roh Yesus mangahana ewen akan hete.

⁸jadi ewen manyaroroi[22] Misia tuntang balalu akan Troas.

⁹Alem te tinai hong Troas, Paulus mite ije taloh paite. Hong tampayahe te ie mite ije biti oloh Makedonia mendeng intu hila baue hayak balaku nyame-nyame uka ie haguet akan Makedonia mangat mandohop ewen.

¹⁰Limbah Paulus mite taloh paite te, ikei balalu tata-tatap uka haguet akan Makedonia. Basa huang kapercaya, ikei marima Hatalla manyoho ikei mansanan Barita Bahalap te akan kare oloh hong hete.

¹¹Ikei malihi Troas tuntang balalu balayar akan Samotrake, tuntang andau jewue akan Neapolis.

¹²Bara hete ikei akan Pilippi, ije lewu hong wilayah je pangkasolake hong Makedonia.[23] Pilippi te jajahan karajaan Roma. Intu hete ikei melai pire-pire andau.

¹³Hong andau Sabat ikei haguet akan saran sungei intu luar bauntonggang lewu, awi ikei mangkeme intu hete aton eka sombayang akan oloh Yehudi. Palus ikei mondok tuntang pande-pander dengan kare oloh bawi je hapumpong hong eka te.

¹⁴Ije bara ewen te tukang jual benang ungu, arae Lidia, asale bara Tiatira. Ie sinta Hatalla, maka Tuhan manggerek ateie sampai ie manarima taloh je iajar Paulus.

¹⁵Lidia tuntang kare oloh hapus humae impandoi, ie marawei ikei. Ie hamauh, “Amon puna pahari mangkeme aku puna toto-toto jari percaya dengan Yesus, has keleh manyandehan intu humangku.” Palus ie hajajuan ikei uka manumon auh palakue.

¹⁶Hong sinde andau katika ikei haguet akan eka balakudoa, ikei hasondau dengan ije biti oloh bawi; ie te jipen. Oloh bawi te inguasa awi roh setan je tau manujum kare kajadian je akan manjadi rahian andau. Awie manujum nasib oloh, oloh te mimbit are ontong akan tempoe.

¹⁷Oloh bawi te manuntut Paulus tuntang ikei kea, hayak teha-tehau, “Kare oloh toh jipen Hatalla Je Pangkahai! Ewen dumah uka mansanan akan kare pahari kilen ampie cara keton tau salamat!”

¹⁸Pire-pire andau katahie oloh bawi te harajur teha-tehau kilau te. Paulus balalu nihau kasabare, sampai ie tampaliau palus hamauh dengan roh te, “Huang aran Tuhan Yesus Kristus aku manyoho ikau balua bara oloh bawi toh!” Hemben te kea roh te malihi oloh bawi te.

¹⁹Katika kare tempoe mangkeme ewen jaton jalan tinai uka dinon duit, ewen manawan Paulus tuntang Silas, palus mihir ewen due akan alun-alun manaharep oloh je berwajib.

²⁰Ewen mimbit Paulus dengan Silas manaharep kare pajabat pamarentah Roma, limbah te hamauh, “Oloh toh oloh Yehudi. Ewen manderoh hong lewun itah.

²¹Ewen manantiring oloh uka malalus hadat je hakalawan dengan kare atoran ain itah oloh Roma. Itah dia olih manarima atawa manumon hadat jete!”

²²Oloh are mahin omba mamok Paulus tuntang Silas; tuntang kare pajabat pamarentah marabit pakaian bara bitin kadadue rasul te palus manyoho oloh mahewes ewen due hapan cambuk.

²³Limbah ewen ihewes paham, ewen inamean akan huang penjara. Kapala penjara inyoho uka manjaga ewen toto-toto.

²⁴Tagal parentah te, kapala penjara te manahan ewen intu kamar penjara je paling huang, tuntang mamangkur pain ewen hapan balok.

²⁵Kurang labih bentok alem Paulus tuntang Silas metoh balakudoa tuntang manyanyi nyanyi tara akan Hatalla. Kare oloh tahanan je beken mahin manyeneh ewen manyanyi.

²⁶Maka petak manantekas hagerek paham sampai laseh penda penjara te mahin hongge. Uras bauntonggang penjara te buap tuntang kare rantai je hapan mamasong kare oloh tahanan mahin bengkak.

²⁷Kapala penjara te misik tarewen. Katika ie mite kare bauntonggang penjara te buap, ie manyilak padang handak mampatei arepe awi ie manyangka kare oloh tahanan te jari uras hadari.

²⁸Tapi Paulus mangkariak salepah angate, “Ela mampatei arepm! Ikei magon aton intu hetoh!”

²⁹Kapala penjara te balaku sumbo palus hadari akan huang, tuntang hayak hagenjeh ie hajarungkup intu taharep Paulus tuntang Silas.

³⁰Limbah te ie mimbit ewen balua tuntang hamauh, “O kare Tuan, en je musti iawiku mangat aku inyalamat?”

³¹Paulus tuntang Silas tombah, “Keleh percaya dengan Tuhan Yesus! Ikau kareh salamat — ikau tuntang kakare oloh je intu humam!”

³²Palus Paulus tuntang Silas manarang auh Tuhan akan kapala penjara te tuntang akan oloh handiai je aton intu humae.

³³Hong bentok alem te kea kapala penjara te mimbit ewen palus marasih kare himang ewen. Maka ie tuntang oloh handiai je intu humae balalu impandoi.

³⁴Limbah te ie mimbit Paulus tuntang Silas akan humae tuntang manyarongan panginan akan ewen. Ie tuntang hapus keluargae hanjak toto basa ewen toh percaya dengan Hatalla.

³⁵Hanjewu jewue tinai, kare pajabat pamarentah Roma manyoho Polisi akan penjara uka manyampai parentah mangat Paulus tuntang Silas ilapas.

³⁶Kapala penjara te mansanan hal te akan Paulus. Ie hamauh, “O kare Tuan, kare pajabat pamarentah jari manenga parentah uka malapas kare Tuan. Toh tuan-tuan tau buli, Salamat jalan!”

³⁷Tapi Paulus hamauh dengan kare petugas polisi te, “Ikei warga negara Roma. Jaton mahalau sidang, ikei jari ihewes hapan cambuk intu bentok umum tuntang inamean akan huang penjara. Tuntang toh ewen manyoho ikei haguet suni-suni? Ikei dia maku! Soho kare pajabat pamarentah te dumah akan hetoh malapas ikei.”

³⁸Kare kepala polisi te malapor hal te akan kare pajabat pamarentah Roma. Katika kare pajabat te mahining Paulus ewen due Silas te warga negara Roma, ewen manjadi mikeh.

³⁹Palus ewen haguet balaku maap dengan Paulus tuntang Silas, limbah te magah ewen due balua bara penjara, hayak balaku uka ewen haguet bara lewu te.

⁴⁰Paulus tuntang Silas malihi penjara te palus haguet akan human Lidia. Limbah hasondau dengan kare oloh percaya hong hete, tuntang manenga semangat akan ewen, Paulus tuntang Silas haguet.