Read Ngaju SARITAN GAWIN KARE RASUL 18 Bible Online

SARITAN GAWIN KARE RASUL 18 - Ngaju bible

SARITAN GAWIN KARE RASUL 18

¹Limbah te Paulus malihi Atena tuntang haguet akan Korintus.

²Intu hete ie hasondau dengan ije biti oloh Yehudi bagare Akwila, asale bara Pontus. Akwila harue kea dumah bara Italia dengan kabalie Priskila. Ewen dumah akan Korintus awi Kaisar Klaudius jari manyoho kakare oloh Yehudi balua bara Roma. Paulus haguet manalih maja ewen due,

³palus melai intu hete dengan ewen tuntang bagawi hinje dengan ewen, awi gawin satiar ewen te sama dengan Paulus, iete manampa kemah.

⁴Tapi hong genep andau Sabat Paulus haguet hapander-sarita huang huma sombayang mangat kare oloh Yehudi tuntang kare oloh Yunani tau percaya dengan Yesus.

⁵Limbah Silas tuntang Timoteus dumah bara Makedonia, Paulus mangguna kare katikae hapa mangabar barita bara Hatalla akan kare oloh Yehudi je Yesus te Raja Panyalamat je injanji awi Hatalla.

⁶Tapi awi kare oloh harajur malawan tuntang manida, maka Paulus mangibas kawo bara pakaiae kilau tanda uka mampingat ewen tahiu kasalan ewen. Ie hamauh, “Amon keton calaka, jete kasalan keton kabuat! Aku lapas tangan! Nampara bara wayah toh aku manalih oloh je dia Yehudi.”

⁷Palus Paulus malihi ewen tuntang haguet melai intu huma je hila silan huma sombayang te. Huma te human oloh je dia Yehudi, tapi oloh te manyembah Hatalla. Aran oloh te Titus Yustus.

⁸Tapi Krispus kapala huma sombayang te tuntang hapus keluargae percaya dengan Tuhan Yesus. Tuntang are kare oloh Korintus je beken mahining barita je inyampai awi Paulus, tuntang ewen percaya dengan Yesus palus impandoi.

⁹Sinde hong hamalem, hong ije taloh paite, Tuhan hamauh dengan Paulus, “Ela mikeh! Hakotak ih tarus tuntang ela suni.

¹⁰Basa Aku mampahayak ikau. Ije biti mahin jaton oloh tau malalus kapapa mawi ikau, awi are oloh hong lewu toh jari manjadi oloh Ayung-Ku.”

¹¹Tagal te Paulus melai hong Korintus ije satengah nyelo katahie tuntang majar auh Hatalla akan ewen.

¹²Katika Galio manjadi gubernur Akhaya, kare oloh Yehudi bulat malawan Paulus tuntang mimbit ie akan pangadilan.

¹³Ewen mangado ie kalotoh auhe, “Oloh toh manantiring oloh are uka manyembah Hatalla mahapan cara je hakalawan dengan hukum Moses!”

¹⁴Sana Paulus handak tombah, Galio jari hamauh dengan kare oloh Yehudi, “O kare oloh Yehudi! Amon taloh je ingado keton toh tahiu gawi papa atawa gawi malanggar, puna patut ih aku sabar mahining auh kadun keton toh.

¹⁵Tapi toh, jetoh kalahin kotak pander tahiu kare aran tuntang kare atoran ain keton kabuat! Jadi keton ih mauruse sampai lepah. Aku kaberatan mamutus kare perkara je macam toh!”

¹⁶Palus Galio maharak ewen balua.

¹⁷Maka ewen manawan Sostenes, kapala huma sombayang te, tuntang mamukul ie intu taharep meja pangadilan. Tapi Galio dia paduli hal te.

¹⁸ Limbah te Paulus magon tahi melai hong Korintus. Rahian tinai ie manyewut salamat melai akan kare oloh percaya hong hete, palus balayar dengan Priskila tuntang Akwila akan Siria. Hong Kengkrea, Paulus manggunting balaue je jari inaluae manjadi panjang awi hajat aie dengan Tuhan. [25]

¹⁹Katika sampai hong Epesus, Paulus malihi Priskila tuntang Akwila, palus tame akan huma sombayang tuntang hapander-sarita dengan kare oloh intu hete.

²⁰Ewen balaku uka ie melai labih tahi hindai dengan ewen, tapi ie dia maku.

²¹Aloh kalote, katika handak haguet, ie hamauh, “Amon Hatalla manyoho, aku handak haluli tinai akan hetoh.” Limbah hamauh kalote, ie haguet bara Epesus.

²²Limbah mohon intu Kaisarea, ie haguet akan Yerusalem uka manabe kare ungkup intu hete, palus miar akan Antiokhia.

²³Limbah pire-pire katahie melai intu hete, ie haguet tinai manalih maja daerah Galatia tuntang Prigia uka mampaabas kapercayan kare oloh Kristen.

²⁴Pandehan te, dumah ije biti oloh Yehudi bara Aleksandria, arae Apolos. Ie pintar hakotak tuntang harati toto tahiu auh huang Surat Barasih,

²⁵tuntang jari iajar uka mangasene auh ajar tahiu Yesus. Maka hapan kahandak je hai ie majar dengan titip tahiu Yesus, aloh ie baya harue mangasene pampandoi Yohanes bewei.

²⁶Dengan kahanyie Apolos nampara hakotak hong huma sombayang tuntang katika Priskila tuntang Akwila mahining auh ajare, ewen mimbit ie akan huma. Intu hete ewen manarang akae je labih kana hindai tahiu rencana ain Hatalla uka manyalamat olon mahalau Yesus.

²⁷Rahian tinai Apolos handak haguet akan Akhaya. Maka kare oloh je percaya dengan Yesus hong Epesus manyurat akan kare pahari, oloh percaya kea hong Akhaya mangat ewen tau manarima Apolos. Tuntang katika Apolos sampai hong Akhaya, maka gitan toto pandohop ayue paham baguna akan kare oloh je awi asin Hatalla jari percaya dengan Yesus.

²⁸Basa impahayak awi pangaruhe je paham, Apolos mampakalah kare oloh Yehudi huang kare soal-jawab intu bentok umum. Tuntang ie mambuktie mahapan kare ayat bara Surat Barasih tahiu Yesus Raja Panyalamat je injanji.