Read Ngaju SARITAN GAWIN KARE RASUL 19 Bible Online

SARITAN GAWIN KARE RASUL 19 - Ngaju bible

SARITAN GAWIN KARE RASUL 19

¹Pandehan Apolos aton hong Korintus, Paulus metohe mangumbang pedalaman daerah te palus sampai hong Epesus. Intu hete ie hasondau dengan pire-pire oloh je jari percaya dengan Yesus.

²Ie misek dengan ewen, “En jari kare pahari manarima Roh Hatalla katika keton percaya dengan Yesus?” Ewen tombah, “Hindai. Mahining tahiu Roh Hatalla te mahin hindai puji.”

³“Amon kalote, hapan pampandoi en keton impandoi?” koan Paulus misek. “Hapan pampandoi Yohanes,” koan ewen tombah.

⁴ Palus Paulus hamauh, “Yohanes mampandoi oloh uka mamparahan je oloh te jari hobah bara kare dosae. Tapi hemben te kea Yohanes mansanan akan kare oloh Israel iete ewen te musti percaya dengan oloh je kareh dumah rahian bara ie, ie te Yesus.”

⁵Katika ewen mahining jete, ewen impandoi huang aran Yesus.

⁶Tuntang katika Paulus mina lengee intu hunjun ewen, Roh Hatalla manguasa ewen, palus ewen nampara hakotak hong kare basa je aneh hayak manyampai barita bara Hatalla.

⁷Jumlah ewen te samandiai aton kurang labih due walas biti.

⁸Katahin telo bulan Paulus harajur hakotak huang kahanyie dengan kare oloh hong huma sombayang tuntang hapander-sarita dengan ewen uka mayakin ewen tahiu kilen ampie Hatalla marentah kilau Raja.

⁹Tapi pire-pire bara kare oloh te batekang ateie tuntang dia maku percaya. Intu taharep oloh handiai je hapumpong hete ewen manida auh ajar tahiu rencana Hatalla uka manyalamat olon mahalau Yesus. Tagal te Paulus malihi ewen palus haguet dengan kare murid Yesus akan eka kuliah Tiranus. Intu hete genep andau ie mawi tanya-jawab dengan kare oloh. [26]

¹⁰Katahin due nyelo ie malalus hal te raju-rajur sampai kakare oloh je melai hong propinsi Asia, aloh oloh Yehudi atawa oloh bangsa beken, rata mahining auh Tuhan.

¹¹Hatalla manampa taloh heran je dia laluen ampie mahalau Paulus.

¹²Amon oloh mimbit saputangan atawa benang peteng kahang je puji ihapan Paulus palus oloh mahapan jete akan oloh haban, maka panyakit ewen te nihau tuntang roh setan mahin balua bara ewen.

¹³Aton pire-pire dukun Yehudi je haguet akan hete-hete, maharak roh papa bara kare oloh. Kare dukun te mancoba kea mahapan aran Tuhan Yesus uka maharak kare roh setan te, “Huang aran Yesus je imbarita awi Paulus te, aku maharak keton!”

¹⁴Aton uju anak hatue ain ije biti imam kapala, bagare Skewa, je mawi taloh kilau te.

¹⁵Tapi roh setan te hamauh dengan ewen, “Aku kasene Yesus tuntang Paulus mahin kasenangku, tapi keton toh eweh?”

¹⁶Palus oloh je irasuk setan te manangkero tuntang manangkarap ewen hayak basiak toto ampie sampai ewen hadari bara huma te marak bahimang tuntang halowai, awi pakaian ewen irabit bara bitin ewen.

¹⁷Kakare oloh Yehudi tuntang bangsa beken je melai intu Epesus mahining tahiu kajadian te, palus ewen manjadi mikeh. Maka aran Tuhan Yesus sasar basewut tuntang inara oloh.

¹⁸Are oloh je jari percaya dengan Yesus dumah mangaku hong taharep oloh are tahiu kare gawin ewen hong katika je jari halau.

¹⁹Tuntang ewen je mawi kare kaji, mamumpong kare buku kajin ewen tuntang mamapui jete intu taharep oloh are. Regan kare buku te amon injumlah samandiaie aton kurang labih lime puluh koyan duit perak. [27]

²⁰Kalote mahapan cara je tamam te auh Tuhan[28] sasar tayap tuntang pangaruhe sasar dehen.

²¹Limbah kare kajadian te, Paulus mamutus[29] uka haguet akan Makedonia tuntang Akhaya palus miar akan Yerusalem. “Limbah akan hete,” koan Paulus, “aku musti haguet akan Roma kea.”

²²Maka ie manyoho due biti bara kare oloh je melai dengae, ie te Timoteus tuntang Erastus uka haguet akan Makedonia pandehan ie melai pire-pire katahie hindai hong propinsi Asia.

²³Kurang labih hong katika te maka lembut karidu je paham hong Epesus tagal auh ajar tahiu Yesus.

²⁴Basa hong lewu te aton ije biti tukang perak je bagare Demetrius je manampa pasah dewa Artemis. Satiar oloh te mimbit hasil je hai akan kare gawie.

²⁵Tagal te ie mamumpong kare oloh je bagawi akae sama-sama dengan kare panggawi tukang perak je beken te, palus ie hamauh, “Pahari handiai! Pahari katawan itah mandino hasil bara gawi toh.

²⁶Nah, toh pahari jari mite tuntang mahining kabuat taloh je iawi oloh je bagare Paulus te. Ie mansanan kare dewa je inampa awi olon, samasinde dia dewa. Tuntang ie jari bahasil mimbit are oloh percaya dengan auh ajare, dia baya intu Epesus toh bewei, tapi handak hapus daerah Asia toh kea.

²⁷Bahayae toh iete satiar itah toh kareh mandino aran je dia bahalap. Tuntang dia baya jete, tapi human dewa Artemis kea kareh inawah oloh tuntang kahaie irusak oloh; padahal ie te dewa je inyembah awi oloh handiai hong Asia tuntang hapus kalunen!”

²⁸Sana kare oloh te mahining jete, atei ewen manjadi balasot, palus ewen mangkariak, “Belom ikau Artemis, dewa bawi ain oloh Epesus!”

²⁹Maka karidu te miar sampai akan hapus lewu. Limbah te kare kawan parusoh te manawan Gayus tuntang Aristarkhus, iete kare oloh Makedonia je omba mandengan Paulus huang jalanae, palus mihir ewen akan lapangan lewu te.

³⁰Paulus handak tame manalih ewen tapi kare oloh je percaya dengan Yesus hong hete mangahana ie.

³¹Pire-pire oloh hai propinsi Asia te je hasobat dengan Paulus, mahin manyoho kea oloh uka mansanan akan Paulus mangat ela ie mamparahan arepe intu lapangan te.

³²Pandehan te kare oloh je hapumpong hong lapangan te manjadi rusoh. Aton je mangkariak kalotoh, aton je mangkariak kalote, basa tapa-are bara ewen te dia katawan akan en ewen te hapumpong hete.

³³Belahe bara ewen te manyangka Aleksander je mawi buku sabab te, basa ie je inggian akan baun oloh Yehudi. Maka Aleksander manenga tanda hapan lengee balaku katika uka mambela arepe hong taharep kare oloh te.

³⁴Tapi sana ewen mite ie te oloh Yehudi, dere-derep ewen te mangkariak hai auhe, “Belom ikau Artemis, dewa bawi ain oloh Epesus!”

³⁵Kajariae sekretaris lewu te olih kea mampasuni oloh are te. Ie hamauh, “Oloh lewu Epesus! Genep biti uras katawan je Epesus toh lewu je mahaga human dewa Artemis tuntang batu keramat je manjato bara langit.

³⁶Ije biti mahin jaton oloh je tau mambantah hal te. Tagal te keleh itah benyem tuntang ela malalus taloh hapan cara je kamaha.

³⁷Kare oloh toh iimbit keton akan hetoh dia tagal awi ewen jari marampok human dewa atawa awi ewen jari mahina dewan itah.

³⁸Amon Demetrius tuntang kare oloh je bagawi akae te aton taloh je handak ingadoe mawi oloh, keleh ewen mimbit perkara te akan pangadilan. Pangadilan puna tatap-sadia akan hal te tuntang kare pajabat pamarentah mahin harajur aton.

³⁹Tapi amon magon aton hindai taloh beken je ingahandak keton, jete musti impahapus huang rapat umum je sah.

⁴⁰Basa taloh je manjadi hong andau toh tau mawi bahaya akan itah. Itah tau indawa oloh mawi pamberontakan, awi itah jaton bara buku sabab tau mambujur arep itah tahiu karidu toh.”

⁴¹Limbah mansanan auh te samandiai, sekretaris lewu te manyoho oloh are te buli.