Read Ngaju SARITAN GAWIN KARE RASUL 20 Bible Online

SARITAN GAWIN KARE RASUL 20 - Ngaju bible

SARITAN GAWIN KARE RASUL 20

¹Limbah kaadaan hong Epesus te benyem haluli, Paulus mamumpong ungkup tuntang manenga semangat akan ewen. Limbah te ie manyewut salamat melai palus marajur jalanae akan Makedonia.

²Ie manalih kare daerah Makedonia tuntang are manenga nasehat akan kare oloh je percaya dengan Yesus hong hete mangat manenga semangat akan ewen. Limbah te ie haguet akan Yunani.

³Telo bulan katahie ie melai intu hete. Palus katika ie metoh manatap arepe handak balayar akan Siria, aton kabar oloh Yunani handak mampatei ie. Tagal te ie mamutus uka haluli mahalau Makedonia.

⁴Sopater anak Pirus asal bara Berea haguet haya-hayak dengae; kalote kea Aristarkhus tuntang Sekundus oloh Tesalonika, tuntang Gayus oloh Derbe. Tuntang kea Timoteus, Tikhikus tuntang Tropimus, kare oloh bara Propinsi Asia.

⁵Ewen helo bara ikei palus mentai ikei hong Troas.

⁶Limbah Pesta Rote Dia Iragi, ikei balayar malihi Pilippi. Lime andau limbah te ikei hapumpong tinai dengan ewen hong Troas. Intu hete ikei melai ije minggo katahie.

⁷Alem minggo[30] ikei hapumpong uka kuman haya-hayak sama kilau oloh hampahari. Paulus pande-pander dengan kare oloh, basa andau jewue tinai ie handak haguet. Sampai bentok alem Paulus magon kea hakotak.

⁸Hong kamar huma susun je hunjun ikei hapumpong te, aton are sumbo.

⁹Ije biti pemuda bagare Eutikhus mondok intu baunsengok. Awi Paulus jaton tende-tende kea hakotak, pemuda te palus mangantok toto sampai ie tapatiroh hong baunsengok te, palus manjato akan penda bara susun je kateloe. Metoh ewen manggatang ie, ie matei.

¹⁰Tapi Paulus mohon akan penda mampalihang arepe hunjun pemuda te tuntang mamalok ie. Paulus hamauh, “Ela mikeh, ie magon belom!”

¹¹Rahian tinai Paulus mambagi rote tuntang kuman haya-hayak. Limbah tahi hakotak dengan kare oloh sampai hanjewu, Paulus haguet.

¹²Kare oloh mimbit pemuda te buli belom akan humae. Ewen paham hanjak tuntang paham iampong.

¹³Ikei haguet akan kapal palus balayar helo akan Asos uka manduan Paulus akan kapal intu hete. Ie jari mator kalote awi ie akan hete mahalau jalan hunjun petak.

¹⁴Limbah hasondau hong Asos, Paulus bajeleng lumpat kapal palus ikei balayar akan Metilene.

¹⁵Bara hete ikei balayar tinai, tuntang andau jewue ikei sampai hong eka je hatandipah dengan Khios. Limbah andau jewue tinai ikei sampai intu Samos tuntang ije andau limbah te hong Miletus.

¹⁶Paulus jari manukas uka dia tende hong Epesus, mangat ela manganan katika hong daerah Asia. Saoli-olih ie handak bajeleng sampai hong Yerusalem hong andau Pesta Pentakosta.

¹⁷Bara Miletus Paulus mangirim kabar akan Epesus uka balaku kare pamimpin ungkup hete mangat manyondau ie.

¹⁸Katika ewen sampai, Paulus hamauh dengan ewen, “Pahari handiai katawan kilen ampie aku belom katahin toh hong marak keton bara andau je solake aku sampai hong Asia.

¹⁹Dengan karandah atei tuntang hapan kare danum mata aku bagawi akan Tuhan hong marak kare kapehe je buah aku awi rencana papa ain are oloh Yehudi.

²⁰Pahari katawan je aku dia langkamen mansanan akan keton taloh je baguna akan keton. Aku majar keton huang kare pumpong oloh are tuntang huang kare huma.

²¹Aloh akan kare oloh Yehudi kalote kea akan kare oloh bangsa beken aku harajur manenga pampingat uka ewen hobah bara kare dosan ewen tuntang dumah manalih Hatalla, tuntang percaya dengan Tuhan Yesus.

²²Toh, awi handak manumon parentah Roh Hatalla, aku haguet akan Yerusalem. Tuntang aku dia katawan en taloh je akan manjadi buah aku hong hete.

²³Aku baya katawan hong genep lewu, Roh Hatalla jari tarang batantu mansanan akangku, iete aku kareh tame penjara tuntang akan buah kapehe.

²⁴ Tapi aku dia paduli dengan pambelom ayungku toh asal aku tau mahapus gawi je imercaya Tuhan Yesus akangku tuntang asal aku baketep sampai hong lawin pambelomku mangat mangabar Barita Bahalap te tahiu asin Hatalla.

²⁵Aku jari maja manalih kare pahari handiai tuntang jari mambarita kea tahiu kilen ampie Hatalla marentah kilau Raja. Toh aku mangkeme dia akan hasondau tinai dengan kare pahari.

²⁶Tagal te aku tukas toto angatku hamauh dengan keton hong andau toh iete amon aton ije biti kareh binasa, jete dia sala aku.

²⁷Dia puji aku hadari bara gawingku uka manarang akan keton kakare rencana ain Hatalla.

²⁸Keleh keton manjaga arep tuntang manjaga kea hapus ungkup je jari inyarah awi Roh Hatalla akan keton uka keton manjagae; basa keton jari iangkat manjadi pangawas akan ungkup te. Keleh keton manjaga ungkup Hatalla[31] te kilau sakatik manjaga tabirie, awi Hatalla jari manjadian ungkup te manjadi Ayue kabuat mahalau pampatei Anak Ayue kabuat.[32]

²⁹Limbah pangguetku toh pasti kareh dumah kare meto je basiak akan bentok keton. Tuntang kare oloh je injaga keton te manjadi panginan kare meto basiak te.

³⁰Malahan marak kare pahari kabuat mahin kareh lembut kare oloh je mangabar Barita je dia bujur. Ewen mawie kalote uka kare oloh je jari percaya dengan Yesus manjadi layau omba ewen.

³¹Tagal te rende-rendeng keton! Ingat, telo nyelo katahie hapan are danum mata, handau hamalem aku dia puji tende majar genep bitin keton.

³²Toh aku manyarah keton akan Hatalla mangat Ie je mahaga keton tuntang mangat keton mimbing barita asin Hatalla. Hatalla tempon kuasa uka mampaabas keton tuntang manenga akan keton kare berkat je jari inatap Awie akan hapus ungkup Ayue.

³³Hindai puji aku mipen duit atawa pakaian bara eweh bewei.

³⁴Pahari kabuat katawan hapan kaabasku kabuat bagawi hapaku manutup kare kaperluan ayungku tuntang kare kawalku je omba aku.

³⁵Hong kakare perkara aku jari manenga sonto akan keton iete awiku paham bagawi kilau toh, itah musti mandohop oloh je dia abas. Karana itah musti mingat kare taloh je jari insanan Tuhan Yesus kabuat, ‘Labih mangat manenga bara manarima.’ ”

³⁶Limbah Paulus jari lepah hakotak, ie mandeko utute hayak dengan ewen samandiai palus balakudoa.

³⁷Ewen uras manangis sambil mamangkut Paulus tuntang manyewut salamat jalan.

³⁸Ewen kapehe atei je mambatang awi Paulus hamauh ewen dia akan mite ie tinai. Palus ewen magah ie sampai akan kapal.