Read Ngaju SARITAN GAWIN KARE RASUL 21 Bible Online

SARITAN GAWIN KARE RASUL 21 - Ngaju bible

SARITAN GAWIN KARE RASUL 21

¹Ikei balaku permisi dengan kare pamimpin ungkup Epesus te, limbah te ikei malihi ewen. Palus ikei balayar langsung akan pulau Kos; tuntang andau jewue tinai ikei sampai hong pulau Rodos. Bara hete ikei balayar tarus akan palabohan Patara.

²Intu Patara ikei dinon kapal je handak akan Poinike. Maka ikei lumpat kapal te palus haguet

³tuntang balayar sampai ikei mite pulau Siprus hila silan ikei; tapi ikei balayar tarus manintu Siria. Ikei lumpat hong Tirus, basa intu hete kapal je impahayak ikei te handak mungkar puate.

⁴Intu eka te ikei haguet maja manalih kare oloh je percaya dengan Yesus, palus melai dengan ewen katahin ije minggo. Awi pansanan bara Roh Hatalla ewen manasehat Paulus uka ela haguet akan Yerusalem.

⁵Tapi sana katika akan ikei jari lepah melai intu hete, ikei malihi ewen tuntang marajur jalanan ikei. Ewen samandiai haya-hayak dengan kare anak-sawae magah ikei sampai akan luar lewu. Intu hete hong saran pantai, ikei samandiai mandeko utut tuntang balakudoa.

⁶Limbah te ikei hatabe, palus ikei lumpat kapal tuntang ewen mahin buli akan humae.

⁷Ikei balayar tinai bara Tirus sampai akan Ptolemais. Intu hete ikei haguet maja manalih kare pahari je percaya uka manabe ewen, palus melai jandau dengan ewen.

⁸ Andau jewue ikei batolak tinai, palus sampai hong Kaisarea. Intu hete ikei haguet manalih pambarita je bagare Pilippus, palus melai intu humae. Ie te ije biti bara uju ewen je iintih hong Yerusalem.

⁹Epat biti anak bawi ayue te jari mandino panenga bara Hatalla uka mangabar barita bara Hatalla.

¹⁰ Limbah pire-pire katahie ikei intu hete, maka dumah bara Yuda ije biti nabi je bagare Agabus.

¹¹Ie dumah manalih ikei palus manduan peteng kahang Paulus. Mahapan peteng kahang te ie mameteng paie tuntang lengee kabuat palus hamauh, “Jetoh auh je insanan awi Roh Hatalla: Oloh je tempon peteng kahang toh kareh imeteng kilau toh hong Yerusalem awi oloh Yehudi tuntang inyarah akan kare oloh je dia Yehudi.”

¹²Katika ikei mahining jete, ikei tuntang kakare pahari je melai hong Kaisarea te balaku nyame-nyame dengan Paulus uka ie ela haguet akan Yerusalem.

¹³Tapi ie hamauh, “En gunae pahari manangis kalotoh sampai mawi ateiku hancor? Aku jari tatap dia baya uka inawan hong kanih, tapi tatap sadia kea aloh sampai matei tagal Tuhan Yesus.”

¹⁴Paulus dia maku mahining auh ikei, maka ikei terai mangahana ie. “Keleh kahandak Tuhan bewei je manjadi,” koan ikei.

¹⁵Limbah melai intu hete pire-pire katahie, ikei manatap kare ramon ikei, palus haguet akan Yerusalem.

¹⁶Pire-pire pahari bara Kaisarea haguet kea haya-hayak dengan ikei mangat magah ikei akan human Manason,[33] basa intu huma te ih ikei akan manyandehan. (Manason te ije biti oloh Siprus je jari tahi manjadi murid Yesus.)

¹⁷Katika ikei sampai hong Yerusalem, kare pahari intu hete manambang ikei dengan sanang atei.

¹⁸Andau jewue Paulus haguet haya-hayak dengan ikei maja manalih Yakobus; kakare pamimpin ungkup aton intu hete kea.

¹⁹Limbah tabe dengan ewen, Paulus manyarita akan ewen taloh handiai je jari ilalus Hatalla mahalau ie hong marak kare oloh je dia Yehudi.

²⁰Limbah mahining saritan Paulus te, ewen samandiai manara Hatalla. Limbah te ewen hamauh dengan Paulus, “Pahari Paulus! Pahari pasti katawan je jari aton bakoya-koyan oloh Yehudi je percaya dengan Yesus. Ewen handiai te iete kare oloh je baketep mamenda atoran Moses.

²¹Pahari manasehat ewen mangat ewen dia manyunat kare anak ewen atawa manumon kare hadat Yehudi.

²²Toh kare oloh Yehudi je percaya te batantu kareh mahining pahari jari aton intu hetoh. Jadi, toh kilen ampie?

²³ Je bahalap iete keleh pahari manumon nasehat ikei. Aton epat biti oloh intu hetoh je jari manampa janji dengan Tuhan.

²⁴Nah, keleh pahari haguet manampa gawi marasih arep haya-hayak dengan ewen, tuntang mananggong ongkos ewen mangat balau ewen tau inggunting.[34] Dengan kalote kareh gitan awi oloh samandiai taloh je ihining ewen tahiu pahari dia toto, basa pahari kabuat kea manumon atoran Moses.

²⁵ Tapi tahiu oloh je beken Yehudi je jari percaya dengan Yesus, ikei jari mangirim surat akan ewen tahiu rencana ikei iete: ewen dia tau kuman panginan je jari iluput akan taloh, dia tau kuman daha, atawa kuman meto je matei inyekak; tuntang dia tau mawi kare gawi je harayap.”

²⁶Maka Paulus haguet dengan epat biti oloh te palus bagawi marasih arep haya-hayak dengan ewen andau jewue tinai. Limbah te ewen tame akan Human Tuhan mangat mansanan pire andau hindai harue gawi marasih te hapus tuntang parapah akan genep bitin ewen te iluput.

²⁷Amon katika uju andau te jari lepah, pire-pire oloh Yehudi bara Asia mite Paulus hong Human Tuhan. Palus ewen manantiring oloh are, limbah te ewen manekap Paulus

²⁸sambil mangkariak, “O, Oloh Israel, dohop! Toh ie oloh je haguet akan hete-hete majar oloh handiai malawan bangsa Israel, malawan atoran Moses tuntang malawan Human Tuhan toh. Tuntang toh ie malahan mimbit kare oloh je dia Yehudi mangat tame akan huang Human Tuhan tuntang mamapa eka je barasih toh!” (

²⁹ Ewen hakotak kalote awi ewen jari mite Tropimus oloh Epesus te hong lewu haya-hayak dengan Paulus; tuntang ewen manyangka Paulus jari mimbit ie akan huang Human Tuhan.)

³⁰Hapus lewu manjadi rusoh tuntang kakare oloh dari-daria hakarimpong. Ewen manokep Paulus tuntang mihir ie balua bara Human Tuhan. Hemben te kea bauntonggang Human Tuhan iatep.

³¹Metoh kare parusoh te handak mampatei Paulus, oloh mansanan akan komandan pasukan Roma hapus lewu rusoh.

³²Balalu komandan te manduan pire-pire perwira tuntang prajurit palus bajeleng haguet dengan ewen akan eka je ridu te. Katika oloh are te mite komandan te dengan pasukae, ewen tende mawi Paulus.

³³Komandan te manalih Paulus palus manokep Paulus, tuntang manyoho oloh marantai ie. Limbah te komandan te misek tahiu Paulus te tuntang en je jari iawie.

³⁴Belahe kare oloh te tombah kalotoh tuntang belahe tinai tombah kalote. Kaadaan te paham rusoh sampai komandan te dia tau mangatawan en sapunae taloh je jari manjadi. Tagal te ie marentah oloh uka mimbit Paulus akan markas.

³⁵Katika ewen mimbit ie sampai tangga, kare parusoh te mamok manyangit toto sampai Paulus musti inggatang awi kare prajurit.

³⁶Kare parusoh te manuntut ewen bara hila likut sambil mangkariak, “Patei ie!”

³⁷Sana ie handak tame akan huang markas, Paulus hamauh dengan komandan te, “Tau aku hakotak hanjulo dengan Tuan?” “En ikau tau basa Yunani?” koan komandan te misek.

³⁸“Amon kalote ikau beken oloh Misir je andau te mawi pamberontakan palus mimbit epat koyan biti parusoh je mahapan senjata tame akan padang pasir?”

³⁹Paulus tombah, “Aku oloh Yehudi; aku oloh penduduk lewu Tarsus, lewu je mambatang hong Kilikia. Aku balaku permisi handak hakotak dengan kare oloh te.”

⁴⁰Maka limbah Paulus inenga katika hakotak, Paulus mendeng intu tangga, palus manenga tanda hapan lengee. Oloh samandiai balalu benyem. Limbah te Paulus hakotak dengan ewen hapan basa Ibrani, Paulus hamauh,