Read Ngaju SARITAN GAWIN KARE RASUL 22 Bible Online

SARITAN GAWIN KARE RASUL 22 - Ngaju bible

SARITAN GAWIN KARE RASUL 22

¹“Bapa-bapa tuntang kare pahari handiai! Aku handak manyampai pambelaan ayungku akan keton. Coba hining!”

²Katika ewen mahining Paulus hakotak hapan basa Ibrani, ewen manjadi labih benyem hindai. Maka Paulus marajur auhe.

³ “Aku oloh Yehudi,” koan Paulus. “Aku inakan hong Tarsus hong lewu Kilikia, tapi aku bara kakorikku melai hetoh hong Yerusalem tuntang indidik toto-toto awi Gamaliel, guru hai te, tahiu atoran je inenga Moses akan tato hiang itah. Sama kilau kare pahari handiai intu hetoh andau toh, aku mahin paham bagawi akan Hatalla.

⁴ Aku mangapehe sampai mampatei kare murid je omba auh ajar taheta te. Ewen samandiai bawi hatue inawangku tuntang inameangku akan huang penjara.

⁵Imam hai kabuat tuntang hapus Majelis Agama tau manenga kasaksian je aku toh dia mananjaro. Basa ewen te je jari manenga akangku surat pengantar je ialamat akan kare oloh Yehudi hong Damaskus. Hapan surat te aku tau manawan intu hete kare oloh je percaya dengan auh ajar te, tuntang mimbit ewen akan Yerusalem mangat ihukum.”

⁶“Katika aku metoh hong jalan tuntang handak sampai Damaskus, hong bentok andau, kalawa je tarang toto salenga mamancar bara langit hakaliling aku.

⁷Aku balongkang akan petak palus aku mahining ije auh hamauh dengangku, ‘Saulus, Saulus! Mbuhen ikau mangapehe Aku?’

⁸Palus aku misek, ‘Eweh Ikau, Tuhan?’ ‘Aku toh Yesus oloh Nasaret te je ingapehem,’ koae tombah.

⁹Kare oloh je aton intu hete je haya-hayak dengangku, mite kea kalawa te, tapi ewen dia mahining auh je hakotak dengangku.

¹⁰Palus aku misek tinai, ‘En je musti iawiku Tuhan?’ Tuhan tombah, ‘Hingkat ikau, tuntang tame akan Damaskus. Intu hete kareh tau insanan akam tahiu taloh handiai je ingahandak Hatalla ikau mawie.’

¹¹Aku manjadi babute tagal kalawa je manyilau te. Jadi kare kawalku mangagalan aku tame akan Damaskus.

¹²Intu hete aton ije biti oloh bagare Ananias. Ie te ije biti oloh barasih je baketep malalus hukum Moses. Kakare oloh Yehudi je melai hong Damaskus paham mahormat ie.

¹³Ie dumah manyengok aku, palus mendeng habambai dengangku tuntang hamauh, ‘Pahari Saulus, keleh toh ikau mite haluli!’ Hemben te kea aku manggatang baungku, palus mite ie.

¹⁴Limbah te ie hamauh dengangku, ‘Hatalla tato hiang itah jari mintih ikau mangatawan kahandak Ayue, tuntang mite Yesus, Ije Bujur te, ije malalus kahandak Hatalla hayak mahining auh Yesus kabuat.

¹⁵Ikau kareh manjadi saksi uka mambarita akan oloh handiai taloh je jari gitam tuntang ihiningm.

¹⁶Toh ela hindai mentai tahi-tahi. Keleh hingkat tuntang sarah arepm uka impandoi. Keleh ikau mantehau Tuhan mangat ikau lapas bara kare dosam.’ ”

¹⁷“Aku haluli akan Yerusalem, tuntang katika aku metoh balakudoa hong Human Tuhan, aku inguasa awi Roh Hatalla.

¹⁸Aku mite Tuhan; ie hamauh dengangku, ‘Jeleng haguet bara Yerusalem, basa kare oloh intu hetoh dia handak manarima kasaksiam tahiu Aku.’

¹⁹Aku hamauh, ‘Tuhan, ewen katawan toto je aku jari tame akan kare huma sombayang uka manawan ewen tuntang mawi mangapehe kare oloh je percaya dengan Tuhan.

²⁰ Kalote kea katika saksi Ayum Stepanus impatei, aku kabuat aton intu hete tuntang mangahandak pampatei te. Malahan aku manjaga kare pakaian oloh je mampatei ie.’

²¹Tapi Tuhan hamauh tinai dengangku, ‘Haguet ih, basa Aku kareh manyoho ikau haguet akan eka je kejau manalih kare oloh je dia Yehudi.’ ”

²²Kare oloh magon manyeneh Paulus hakotak, tapi hong kalimat je pangkarahiae ewen mangkariak sakalepah belaie, “Patei oloh je kilau kau. Ie dia patut belom!”

²³Sambil mangkariak ewen mangibas jubah ewen, tuntang manawor kawo.

²⁴Maka komandan pasukan Roma te manyoho uka Paulus iimbit akan markas mangat ie iriksa intu hete hapan kakaras uka mangatawan en sababe kare oloh Yehudi mangkariak kalote taharep ie.

²⁵Tapi katika Paulus jari imasong tuntang ihewes hapan cambuk, Paulus hamauh dengan perwira je mendeng intu hete, “En puna tau mahewes ije biti warga karajaan Roma hapan cambuk helo bara ie imbit akan pengadilan?”

²⁶Mahining jete perwira te haguet manalih komandan pasukan tuntang hamauh, “En toh je akan iawi bapa? Oloh te warga negara Roma!”

²⁷Maka komandan te haguet manalih Paulus tuntang misek, “Coba sanan, en ikau toh warga negara Roma!” “Iyoh,” koan Paulus, “aku warga negara Roma.”

²⁸Komandan te hamauh tinai, “Aku manjadi warga negara Roma awiku are toto mambayar!” Paulus tombah, “Tapi aku inakan kilau warga negara Roma.”

²⁹Hemben te kea kare anggota tentara je handak mariksa Paulus te mundur tuntang komandan te mahin mikeh awi ie jari mamasong Paulus, padahal Paulus warga negara Roma.

³⁰Komandan pasukan Roma te handak toto mangatawan en sapunae je mawi kare oloh Yehudi manyalan Paulus. Tagal te andau jewue ie mantehau kare imam kapala tuntang Majelis Agama uka hapumpong. Palus Paulus ilapas bara pasonge, limbah te iimbit manaharep ewen samandiai.