Read Ngaju SARITAN GAWIN KARE RASUL 25 Bible Online

SARITAN GAWIN KARE RASUL 25 - Ngaju bible

SARITAN GAWIN KARE RASUL 25

¹Telo andau limbah Pestus sampai hong tanah te, ie haguet bara Kaisarea akan Yerusalem.

²Intu hete kare imam kapala tuntang kare pamimpin Yehudi manyampai akae auh kadun ewen mawi Paulus. Ewen bajuju mangatau Pestus

³uka awi kahalap ateie dengan ewen, ie maku manyoho oloh mimbit Paulus akan Yerusalem; basa ewen jari pakat uka mampatei ie hong benteng jalan.

⁴Tapi Pestus tombah, “Paulus metoh toh inahan hong Kaisarea; tuntang dia tahi hindai aku mahin akan kanih.

⁵Jadi, keleh kare oloh je basewut hong marak keton haguet haya-hayak dengangku akan Kaisarea tuntang mawi perkara huang kanih, amon puna ie jari mawi taloh sala.”

⁶Limbah melai hong Yerusalem kurang labih hanya atawa sapuluh andau tinai Pestus haluli akan Kaisarea. Andau jewue ie mawi sidang pangadilan tuntang marentah uka Paulus iimbit manaharep.

⁷Katika Paulus sampai, kare oloh Yehudi je jari dumah bara Yerusalem mendeng hong kalilinge tuntang manyampai kare auh dawa je babehat mawi ie. Tapi ewen dia tau mambukti kare auh dawan ewen te.

⁸Hong pambelaan ayue Paulus hamauh, “Aku jaton mawi taloh je sala taharep Human Tuhan atawa taharep hukum Moses atawa taharep Kaisar Roma.”

⁹Tapi Pestus handak manduan atei oloh Yehudi. Maka ie misek dengan Paulus, “En maku ikau akan Yerusalem mangat inyidang hong kanih intu taharepku tahiu kare dawan ewen te?”

¹⁰Paulus tombah, “Aku metoh toh mendeng intu taharep pangadilan Kaisar Roma; tuntang hong hete ih aku musti inyidang. Tuan kabuat katawan je aku dia basala taharep oloh Yehudi.

¹¹Amon aku jari malanggar hukum tuntang mawi taloh je patut ihukum matei, aku pahias matei. Tapi amon kare dawan ewen dia toto, ije biti mahin jaton oloh tau manyarah aku akan ewen. Aku balaku inyidang hong pangadilan Kaisar!”

¹²Limbah barunding dengan kare panasehat ayue, Pestus hamauh, “Ikau balaku inyidang hong pangadilan Kaisar, jadi ikau musti haguet manaharep Kaisar.”

¹³Dia pire-pire katahie tinai, Raja Agripa tuntang Bernike dumah akan Kaisarea uka manabe manyalamat Pestus.

¹⁴Limbah pire-pire andau ewen aton intu hete, Pestus manarang perkaran Paulus akan Raja Agripa. Pestus hamauh, “Intu hetoh aton ije biti tahanan je ilihi awi Peliks.

¹⁵Katika aku aton hong Yerusalem, kare imam kapala tuntang kare pamimpin Yehudi manyampai kadun ewen mawi oloh te tuntang balaku aku uka mamutus mahukum ie.

¹⁶Tapi koangku tombah, oloh Roma dia tau manyarah kalote bewei ije biti oloh je kana dawa uka ihukum, amon oloh je buah dawa te hindai hataharep dengan kare oloh je mandawa ie, tuntang akae inenga katika uka mambela arepe.

¹⁷Jadi, katika ewen dumah akan hetoh, aku dia mentai tahi-tahi. Andau jewue aku balalu mawi sidang pangadilan tuntang marentah uka oloh te iimbit manaharep.

¹⁸Katika kare oloh je mandawa ie mendeng mayampai auh kadun ewen, ewen jaton manyampai auh dawa je papa kilau je ingiraku ewen handak manyampaie.

¹⁹Ewen baya hakabeken auh tiroke tahiu agaman ewen kabuat tuntang tahiu ije biti oloh je bagare Yesus. Oloh te jari matei tapi Paulus bajuju manyewut oloh te belom.

²⁰Awi aku bingung kilen ampie aku tau mandino kare katarangan tahiu kare perkara te, aku misek dengan Paulus en ie maku haguet akan Yerusalem tuntang inyidang intu hete akan perkara te.

²¹Tapi Paulus balaku naik banding; ie balaku mangat ie tetep melai intu tahanan sampai perkarae imutus awi Kaisar. Tagal te aku marentah uka ie inahan magon sampai aku aton katikaku mangirim ie akan Kaisar.”

²²Palus Agripa hamauh dengan Pestus, “Aku kabuat mahin handak mahining oloh te.” “Jewu Tuan tau mahining ie,” koan Pestus tombah.

²³Andau jewue Agripa tuntang Bernike dumah hapan upacara hai. Ewen tame eka sidang haya-hayak dengan kare pembesar angkatan bersenjata tuntang kare oloh je basewut hong lewu te. Awi parentah Pestus, Paulus iimbit tame.

²⁴Palus Pestus hamauh, “Raja Agripa tuntang kare oloh handiai je aton dumah! Oloh toh jari ingadu akangku awi salepah bangsa oloh Yehudi, je aton hong Yerusalem tuntang je aton hong hetoh. Ewen manuntut hayak mangkariak je ie toh dia patut inalua belom.

²⁵Tapi ije mahin jaton aku sondau taloh gawie je mawi ie tau ihukum matei. Tuntang basa ie kabuat jari balaku perkarae inyidang hong pangadilan Kaisar, aku jari mamutus uka mangirim ie akan Kaisar.

²⁶Tapi aku hindai mandino katarangan je batantu bara ie uka tau inyurat huang suratku akan Kaisar. Jete bukue aku mimbit ie hataharep dengan kare Tuan samandiai je mambatang dengan Je Paham Ihormat Tuan Raja Agripa! Kahandakku iete uka limbah gawin itah mariksa ie toh, aku tau dinon taloh en-en je tau inyurat.

²⁷Basa manumon pangkemeku, dia lalau buah mangirim ije biti oloh tahanan kalote bewei tapi jaton mansanan kare kasalan je indawa oloh mawi ie.”