Read Ngaju SARITAN GAWIN KARE RASUL 27 Bible Online

SARITAN GAWIN KARE RASUL 27 - Ngaju bible

SARITAN GAWIN KARE RASUL 27

¹Limbah imutus, je ikei musti balayar akan Italia, Paulus tuntang pire-pire oloh tahanan je beken inyarah akan Yulius, perwira pasukan tentara Roma je inyewut “Resimen Kaisar”.

²Ikei lumpat akan kapal je dumah bara Adramitium, limbah te haguet hapan kapal te je jari tatap balayar akan kare palabohan hong propinsi Asia. Aristarkhus, ije biti oloh Makedonia je dumah bara Tesalonika, balayar kea haya-hayak dengan ikei.

³Andau jewue ikei sampai hong Sidon. Paulus te iurus dengan bahalap toto awi Yulius. Ie tau maja kare kawale mangat ewen tau manenga akae kare taloh je perlu akae.

⁴Bara hete ikei marajur pelayaran ikei. Awi kius riwut hakalawan tintue dengan kapal, ikei balayar manyaroroi saran pantai pulau Siprus je bakalindong isut bara riwut.

⁵Limbah te ikei dimpah laut je hataharep dengan Kilikia tuntang Pampilia palus sampai intu Mira hong tanah Likia.

⁶Intu hete perwira te dinon ije kapal bara Aleksandria je handak balayar akan Italia. Maka ie mamindah ikei akan kapal te.

⁷Pire-pire andau katahie ikei balayar barangkah toto, tuntang kajariae hajajuae ih ikei sampai hong lewu Knidus. Rahian tinai awi riwut magon papa, ikei dia olih marajur jalanan balayar te akan tintue je solake. Maka ikei balayar akan salatan pulau Kreta mahalau Tanjong Salmone mangat intu hete ikei ingalindong awi riwut.

⁸Ikei balayar manyaroroi saran pantai pulau te marak paham kahalie sampai kajariae ikei sampai hong ije eka je bagare Palabohan Bahalap, dia pire kakejaue bara lewu Lasea.

⁹Hong katika te, Andau Pesta Kadamai[36] ain oloh Yehudi jari mahalau. Jari are katika ikei je nihau, sampai katika uka balayar dengan aman jaton hindai. Tagal te Paulus manenga nasehat akan ewen kalotoh,

¹⁰“Pahari handiai, manumon tirok ayungku, bahaya toto itah toh balayar tarus. Itah akan buah karugi hai, dia baya akan puat tuntang akan kapal itah bewei, tapi arep itah mahin tau nihau.”

¹¹Tapi perwira te labih percaya dengan jurumudi tuntang kapten kapal bara dengan kare auh Paulus.

¹²Palabohan intu hete puna dia bahalap akan kare kapal melai hete hong wayah sadingen. Awi te tapa-are oloh kapal pakat uka balayar tinai malihi palabohan te basa ewen handak manggau jalan manyampai Peniks tuntang melai intu hete katahin wayah sadingen. Peniks te palabohan hong Kreta je manaharep barat daya tuntang barat laut.[37]

¹³Hong katika te riwut salatan kiu-kius lowah. Maka oloh kapal manyangka ewen jari olih balayar tinai. Jadi ewen manggatang sauh palus balayar manyaroroi pantai pulau Kreta.

¹⁴Tapi dia tahi tinai riwut barat — iete riwut je inyewut riwut Timor Laut — manampur bara hila hunjun petak,

¹⁵tuntang manampur kapal ikei. Awi kapal dia mungkin balayar tarus malawan riwut, maka ikei jaton katawan auh tuntang manalua ih kapal bahantong inamput riwut.

¹⁶Ikei bakalindong isut, katika ikei mahalau hila salatan pulau Kauda je korik te. Intu hete dengan kahalie ikei olih manguasa sekoci kapal ikei.

¹⁷Limbah sekoci te impalumpat akan kapal, kapal te kabuat indehen hapan tali je imeteng mambilit kapal te. Awi mikeh sangkarah hong busong Sirtis je teah, layar impamohon palus kapal inalua mampahayak riwut.

¹⁸Riwut tarus mamok, sampai andau jewue puat kapal nampara inganan akan laut.

¹⁹Andau jewue tinai kare oloh kapal te manganan tinai kare pakakas kapal akan laut hapan lengen ewen kabuat.

²⁰Pire-pire andau katahie ikei jaton mite matanandau tuntang bintang, tuntang riwut mahin raju-rajur mamok. Kajariae nihau kaharap ikei mangat tau salamat.

²¹Pire-pire katahie kare oloh te dia kuman. Maka Paulus mendeng hong bentok ewen palus hamauh, “Pahari handiai! Jaka keton jari manumon nasehatku tuntang dia balayar bara Kreta, itah dia buah kakare karusak tuntang karugi toh.

²²Tapi toh mahin aku paham balaku uka keton ela korik atei. Jaton ije bara pahari je akan matei; itah baya akan nihau kapal toh ih.

²³Basa alem ndau, malekat Hatalla je inyembahku, iete Hatalla je tempon aku, dumah manalih aku.

²⁴Malekat te hamauh, ‘Ela mikeh Paulus! Basa ikau akan manaharep Kaisar. Tuntang tagal kahalap atei Hatalla dengam, kakare oloh je balayar dengam kareh salamat tagal ikau.’

²⁵Awi te, pahari handiai, ela pahari korik atei! Basa aku percaya dengan Hatalla, iete, taloh handiai akan manjadi sama kilau je jari insanan Awie akangku.

²⁶Tapi kareh itah akan sangkarah hong pantai ije pulau.”

²⁷Hong alem je kaepat-walas ikei magon lapu-laput intu tasik Adria. Kurang labih bentok alem oloh kapal mangkeme kapal metohe manokep saran petak.

²⁸Jadi ewen muloh tali hapan batu mangat maukur kandalem laut. Ampie kandalem eka te handak sampai epat puluh meter. Dia tahi limbah te ewen maukure tinai, tuntang mandino kandalem laut hong eka te tokep telo puluh meter.

²⁹Ewen mikeh kapal tau sangkarah hong batu karang, jadi ewen mampamohon epat kabawak sauh bara hila likut kapal, palus maharap mudahan jele-jeleng hanjewu.

³⁰Kare oloh kapal mancoba benye-benyem handak mandari arepe bara kapal te. Ewen mampamohon sekoci akan danum kilau jaka ewen handak mampamohon sauh bara hila baun kapal.

³¹Tapi Paulus hamauh dengan perwira tuntang kare prajurit je intu huang kapal te, “Amon kare oloh pagawai toh dia melai intu kapal, kare pahari samandiai uras dia tau salamat.”

³²Tagal te kare prajurit te manetek talin sekoci te, sampai sekoci te bahantong.

³³Helo bara matan andau lembut, Paulus manenga tirok uka ewen handiai uras kuman. Paulus hamauh, “Jari epat walas andau katahie kare pahari uras mentai marak kikeh tuntang jaton kuman taloh en-en.

³⁴Aku mausul keleh kuman isut. Jete bahalap akan keton, mangat keton abas tinai. Basa pahari handiai uras akan salamat tuntang jaton tapas taloh en-en.”

³⁵Limbah ie hamauh kalote, Paulus manduan rote palus manarimakasih akan Tuhan intu taharep ewen samandiai. Limbah ie mambagi rote te, ie balalu kuman.

³⁶Maka ewen haluli barigas tuntang omba kuman kea.

³⁷Oloh handiai je aton hong kapal te aton due ratus uju puluh jahawen[38] biti.

³⁸Limbah ewen uras rata kuman manumon kasukupe, ewen manjakah puat gandom akan laut mangat kapal manjadi mahian.

³⁹Metoh andau jari balawa pagawai kapal mite saran petak, tapi ewen jaton katawan hong kueh eka te. Ewen mite ije telok dengan saran pantai. Jadi ewen handak mampatende kapal intu hete jaka tau.

⁴⁰Maka kare talin sauh te inalua ih leteng akan tasik. Hayak te kea ewen mengkak tali je injarat hong kamburi. Limbah te ewen mampandai layar hila baun kapal mangat riwut mahimon kapal te miar manalih pantai.

⁴¹Tapi kapal te sangkarah awi busong. Hila haluan kapal sangkarah tuntang dia hagerek, tapi hila kamburie hancor inampur galombang je karas.

⁴²Kare prajurit hong kapal te handak mampatei kakare oloh tahanan, awi ewen mikeh ela-ela kareh aton je hanangoi akan saran tuntang hadari.

⁴³Tapi perwira te mangahana kahandak ewen te awi ie handak manyalamat Paulus. Ie manyoho kakare oloh je tau hanangoi sewu helo tuntang hanangoi akan saran pantai;

⁴⁴kare oloh je beken musti manuntut hayak bahapang hapan kare papan atawa kare kiwak kapal te. Dengan jalan kalote ikei handiai salamat sampai akan saran.