Read Ngaju SARITAN GAWIN KARE RASUL 3 Bible Online

SARITAN GAWIN KARE RASUL 3 - Ngaju bible

SARITAN GAWIN KARE RASUL 3

¹Sinde andau Petrus dengan Yohanes haguet akan Human Tuhan pukul telo halemei, iete katika akan balakudoa.

²Intu hete aton bauntonggang je inyewut “Bauntonggang Kabungas”. Intu hete kea aton oloh hatue je lumpuh bara metoh inakan. Genep andau oloh te iimbit akan hete mangat ie manyadakah dengan kare oloh je tame akan Human Tuhan.

³Katika oloh te mite Petrus tuntang Yohanes tame akan Human Tuhan, ie balaku sadakah dengan ewen.

⁴Maka ewen mananture ie, limbah te Petrus hamauh, “Tampayah ikei!”

⁵Palus oloh te manantuani ewen hayak maharap uka mandino taloh en-en bara ewen.

⁶Tapi Petrus hamauh dengae, “Aku jaton baduit samasinde. Tapi taloh je aton huang aku jete je handak inengaku akam: Hapan kuasan Yesus Kristus oloh Nasaret te, keleh ikau mananjong!”

⁷Palus Petrus mimbing lenge gantau ain oloh lumpuh te tuntang mandohop ie hingkat. Hemben te kea pain oloh te tuntang buku lalinge manjadi gancang.

⁸Palus ie manangkajok mendeng, tuntang nampara mananjong akan kanih-kate. Limbah te tinai ie tame akan Human Tuhan haya-hayak dengan Petrus tuntang Yohanes, sambil mananjong tuntang manangkajok tuntang manara Hatalla.

⁹Kakare oloh mite ie mananjong tuntang manara Hatalla.

¹⁰Palus ewen mangatawan je ie te tukang sadakah je bahut mondok intu “Bauntonggang Kabungas” hong Human Tuhan. Ewen hengan toto tuntang jungun mite taloh je manjadi akae.

¹¹Oloh te palus manuntut Petrus tuntang Yohanes. Tuntang metoh ewen batelo sampai intu tambiran je inyewut “Tambiran Salomo”, kakare oloh dumah mangarimpong ewen awi hengan.

¹²Katika Petrus mite kare oloh te, ie hamauh dengan ewen, “O kare oloh Israel, mbuhen kare pahari hengan dengan hal toh? Mbuhen kare pahari manampayah ikei tarus? En kare pahari manyangka oloh toh tau mananjong awi aton kuasa huang ikei atawa awi ikei mamenda Hatalla?

¹³ Hatalla je inyembah awi Abraham, Isaak, Yakob, Hatallan tato-hiang itah, Hatalla te jari mampahai Reware, iete Yesus. Yesus te je inyarah kare pahari akan pihak panguasa, tuntang je ilawan awi kare pahari intu taharep Pilatus, katika Pilatus handak malapas Ie.

¹⁴ Ie te barasih tuntang bahalap, tapi kare pahari malawan Ie tuntang hajajuan uka Pilatus malapas ije biti oloh pamuno akan kare pahari.

¹⁵Kare pahari mampatei Ie, padahal Ie te haream ije batang pambelom akan oloh samandiai. Tuntang Hatalla jari mambelom Ie tinai bara pampatei. Ikei jari manyaksi kabuat hal te.

¹⁶Kare pahari jari mite tuntang manyaksi taloh je manjadi dengan oloh lumpuh toh. Ie jari manjadi abas tuntang barigas haluli awi ie percaya dengan Yesus tuntang kuasan Aie. Basa awi percaya dengan Yesus maka oloh toh jari keleh haluli intu taharep kare pahari handiai.

¹⁷Pahari samandiai! Toh aku katawan taloh je iawi kare pahari tuntang kare pamimpin pahari dengan Yesus, jete ilalus awi pahari jaton katawan taloh je iawi pahari metoh te.

¹⁸Tagal te maka manjadi kea taloh je jari insanan awi Hatalla horan mahalau kare nabi Ayue, iete Raja Panyalamat je injanji te musti buah kapehe.

¹⁹Tuntang tagal te kare pahari, keleh hobah bara kare dosan pahari tuntang haluli manalih Hatalla, mangat Ie mampuas pahari bara kare dosan pahari.

²⁰Tuhan kareh dumah manalih pahari tuntang pahari kareh mangkeme karigas huang roh. Tuntang Tuhan kareh manyoho Yesus dumah manalih pahari, karana Ie jari inantu awi Hatalla manjadi Raja Panyalamat akan pahari.

²¹Ie musti melai huang sorga sampai Hatalla manjadian taloh handiai te taheta kilau je insanan awi Hatalla mahalau kare nabi Ayue hong jaman horan.

²² Moses puji hamauh, ‘Hatalla Tuhan keton kareh manyoho ije biti nabi bara bangsa ain keton kabuat, manalih keton, sama kilau Ie manyoho aku.[4] Keton musti mahining taloh samandiai je insanan awi nabi te akan keton.

²³ Oloh je dia paduli taloh je insanan awi nabi te, oloh te kareh inganan bara ungkup ain Hatalla tuntang imbinasa.’

²⁴Kare nabi je puji manyampai barita bara Hatalla, nampara bara Nabi Samuel tuntang kare nabi je beken je dumah rahian, uras ewen te mambarita tahiu jaman jetoh.

²⁵ Kare janji bara Hatalla je inyampai awi kare nabi aton akan kare pahari. Huang janji je inampa Hatalla dengan tato hiang pahari, Hatalla hamauh dengan Abraham kalotoh, ‘Bara turonam aku kareh mamberkat kakare bangsa oloh hong kalunen.’ Janji te akan pahari kea.

²⁶Jete bukue Hatalla mintih reware, palus manyoho Ie dumah manalih kare pahari labih helo, mangat Ie mamberkat pahari. Cara je ihapae mamberkat iete dengan manjadian kare pahari samandiai hobah bara cara belom pahari je papa.”