Read Ngaju SARITAN GAWIN KARE RASUL 4 Bible Online

SARITAN GAWIN KARE RASUL 4 - Ngaju bible

SARITAN GAWIN KARE RASUL 4

¹Metoh Petrus tuntang Yohanes magon hakotak dengan kare oloh te, kare imam kapala[5] tuntang kapala pangawal Human Tuhan hayak dengan kare oloh Saduki dumah manalih Petrus tuntang Yohanes.

²Ewen balait awi Petrus tuntang Yohanes mansanan akan kare oloh, je Yesus te jari belom haluli bara pampatei. Tuntang jete mambukti je oloh matei kareh belom haluli.

³Maka ewen manawan kadadue rasul te palus manamean ewen akan huang penjara. Tuntang awi andau jari hamalem, maka Petrus tuntang Yohanes inahan intu hete sampai andau jewue tinai.

⁴Tapi kare oloh je jari mahining auh ajar kare rasul te, are je percaya. Maka jumlah ewen te mandahang sampai manjadi kurang labih lime koyan biti.

⁵Andau jewue tinai kare tokoh Majelis Agama, kare pamimpin Yehudi tuntang kare guru agama hapumpong intu Yerusalem.

⁶Ewen hasondau dengan Imam Hai Hanas, tuntang Kayapas, Yohanes, Aleksander, tuntang oloh handiai je bara baris imam hai te.

⁷Petrus tuntang Yohanes iimbit manaharep ewen, palus ewen misek, “Kilen ampie carae keton mampakeleh oloh lumpuh te? Hapan kaabas en atawa hapan kuasa bara eweh keton malalus te?”

⁸Petrus je inguasa awi Roh Hatalla, tombah, “O kare Tuan pamimpin bangsa tuntang kare Tuan anggota Majelis!

⁹Andau toh ikei inyidang awi malalus gawi bahalap uka mandohop ije biti oloh lumpuh, tuntang awi kare Tuan handak katawan kilen ampie oloh te impakeleh.

¹⁰Nah, kare Tuan handiai musti katawan tuntang hapus bangsa Israel mahin musti katawan je oloh toh mendeng hetoh metoh biti-berenge barigas intu taharep kare Tuan, tagal kaabas tuntang kuasa bara Yesus Kristus oloh Nasaret te. Kare Tuan jari manyampalaki Yesus te, tapi Hatalla jari mambelom Ie haluli.

¹¹ Yesus toh je imaksud awi ayat jetoh huang Surat Barasih, ‘Batu je inganan awi kare keton tukang bangunan, jete manjadi batu je paling mambatang.’

¹²Mahalau Yesus bewei oloh inyalamat. Basa hong hapus kalunen bara marak olon jaton ije biti je jari mandino kuasa bara Hatalla uka manyalamat itah.”

¹³Kare anggota sidang Pangadilan te hengan mite kahanyi Petrus tuntang Yohanes. Mahin hindai metoh ewen katawan je kadadue rasul te uras oloh biasa je jaton sakolae. Balalu ewen katawan kadadue rasul te iete kare oloh je omba Yesus.

¹⁴Tapi ewen dia tau hamauh en-en, awi oloh je jari impakeleh te aton mendeng intu hete intu taharep ewen haya-hayak dengan Petrus tuntang Yohanes.

¹⁵Maka ewen manyoho kadadue rasul te balua bara kamar sidang, limbah te ewen barunding.

¹⁶Ewen hamauh, “En taloh je iawi itah akan kare oloh toh? Uras oloh je melai hong Yerusalem jari katawan tahiu taloh heran je dia puji helo toh, je ilalus awi ewen due. Itah dia olih malawan jete.

¹⁷Tapi uka hal toh ela tayap sasar kejau hindai hong marak kare oloh, keleh itah mampingat ewen due hapan auh karas uka ewen samasinde dia tau tinai hakotak dengan eweh bewei hayak mahapan aran Yesus.”

¹⁸Maka ewen mantehau kadadue rasul te tame haluli tuntang mansanan akan ewen samasinde dia tau hindai manyewut atawa majar mahapan aran Yesus.

¹⁹Tapi Petrus tuntang Yohanes tombah, “Keleh keton manirok kabuat en je buah intu taharep Hatalla: manumon parentah kare Tuan atawa manumon parentah Hatalla.

²⁰Basa ikei dia tau tende hakotak tahiu taloh je gitan tuntang ihining ikei kabuat.”

²¹Kare anggota sidang te jaton dinon alasan en-en hapan ewen mahukum Petrus tuntang Yohanes. Jadi ewen mampingat kadadue rasul te, palus malapas kadadue ewen te, awi oloh handiai uras manara Hatalla tagal kajadian te.

²²Oloh je mangkeme karigas je baka hera-heran te jari epat puluh nyelo umure.

²³Limbah Petrus tuntang Yohanes ilapas, ewen haluli manalih kare kawal ewen tuntang manyarita taloh handiai je insanan awi kare imam kapala tuntang kare pamimpin Yehudi te akan ewen.

²⁴ Limbah kare kawal ewen te mahining jete, ewen haya-hayak hinje ateie balakudoa intu Hatalla. Ewen hamauh, “Tuhan, ikau ih je manjadian langit tuntang petak tuntang tasik dengan kare taloh huange.

²⁵ Hapan Roh Aim ikau puji hakotak dengan tato hiang ikei, Dawid, iete rewar Ayum; Ikau hamauh, ‘Mbuhen kare oloh je dia mangasene Tuhan, balait; mbuhen kare bangsa oloh mawi rencana je dia baguna?

²⁶Kare raja hong kalunen tatap handak parang, tuntang kare pamimpin bulat ateie malawan Tuhan tuntang Raja Panyalamat.’

²⁷ Basa Herodes tuntang Pontius Pilatus jari hapumpong dengan kare oloh je dia kasene Tuhan tuntang dengan kare oloh Israel intu lewu toh. Ewen hapumpong uka malawan Yesus Rewar Ayum je baketep ateie te, je jari iangkat Awim manjadi Raja Panyalamat.

²⁸Ewen bulat ateie uka malalus kare taloh handiai, je jari inukas bara solake taloh te akan manjadi. Tuntang ikau manukas jete huang kuasa tuntang kahandak Ayum kabuat.

²⁹Toh, Tuhan, keleh mite kilen ampie ewen mampingat ikei. Tuntang soho ikei, kare jipe Aim toh, mansanan barita Aim te hayak jaton mikeh.

³⁰Tenga pandohop Aim mangat oloh haban impakeleh tuntang kare taloh heran hayak kare taloh je dia puji helo manjadi mahalau kuasa tuntang kaabas huang aran Yesus, Rewar Aim je barasih te.”

³¹Limbah ewen jari hapus balakudoa, eka ewen hapumpong te hongge. Ewen samandiai inguasa awi Roh Hatalla, tuntang nampara hakotak huang kahanyie je toto tahiu barita bara Hatalla.

³² Kakare oloh je jari percaya te belom hinje ateie tuntang tirok ateie. Jaton ije biti bara ewen te je mitong kare ramoe kilau ayue kabuat. Kare taloh handiai je ain ewen, ewen mahapae sama-sama.

³³Hapan kuasa je hai, kare rasul te manenga kasaksian je Yesus te jari belom haluli. Maka Hatalla mamberkat ewen paham.

³⁴Tuntang ije biti mahin jaton bara ewen te je katapasan taloh en-en. Basa ewen je aton tempon petak atawa huma, jari manjual petake atawa humae te; balalu duit bara regan ramoe te imbit ewen

³⁵tuntang ewen manyarahe akan kare rasul. Limbah te duite imbagi akan genep biti je puna toto-toto tapas.

³⁶Kalote kea dengan Yosep. Ie kea jari manjual petak ayue, palus duit regan petak te imbite tuntang inyarahe akan kare rasul. Yosep toh ije biti oloh turonan Lewi bara Siprus; kare rasul manyewut ie kea Barnabas (je rimae Pamampong).