Read Ngaju SARITAN GAWIN KARE RASUL 5 Bible Online

SARITAN GAWIN KARE RASUL 5 - Ngaju bible

SARITAN GAWIN KARE RASUL 5

¹Tapi aton ije biti oloh hatue bagare Ananias. Ie dengan kabalie je bagare Sapira, jari kea manjual ije kalambar petak ain ewen.

²Duit bara regan petak te belahe inyangkae akan arepe kabuat tuntang je beken tinai inyarahe akan kare rasul. Gawie kalote te ingatawan awi kabalie.

³Maka Petrus hamauh dengae, “Ananias, mbuhen ikau manalua setan manguasa ateim, sampai ikau mananjaro Roh Hatalla, awim suni-suni manahan akan arepm kabuat ije bagian bara duit regan kare petak te?

⁴Petak te puna ayum helo bara ikau manjuale. Tuntang limbah petak te injual, duite magon ayum kea. Jadi mbuhen aton kahimat huang ateim uka mawi taloh kilau te? Ikau dia mananjaro olon tapi Hatalla!”

⁵Sana Ananias mahining kare auh te, ie balihang palus matei. Kakare oloh je mahining tahiu kajadian te manjadi mikeh.

⁶Maka kare oloh tabela dumah mambungkus hantun Ananias, palus mimbite akan luar uka mangubure.

⁷Kurang labih telo jam limbah te kabalie tame. Ie dia katawan taloh je harue manjadi.

⁸Petrus hamauh dengae, “Coba sanan akangku: En petak je injual keton due kabalim te, tikas kare toh ih regae?” “Toto, jete ih regae,” koan sawan Ananias tombah.

⁹Palus Petrus hamauh dengae, “Mbuhen ikau tuntang kabalim pakat uka maningkes Roh Tuhan? Hining toh! Kare oloh je mangubur kabalim jari haluli. Ewen akan mimbit ikau balua kea.”

¹⁰Hemben te kea sawan Ananias te balihang tuntang matei intu taharep Petrus. Tuntang metoh kare oloh tabela te tame, ewen sondau ie jari matei. Palus ewen mimbit hantue akan luar tuntang mangubur ie hila silan eka kabalie.

¹¹Maka uras kare oloh percaya te tuntang kare oloh je beken je mahining tahiu kajadian te, manjadi mikeh.

¹²Tagal gawin kare rasul maka are taloh heran tuntang kare hal je dia laluen manjadi hong marak oloh are. Dengan bulat ateie oloh percaya te uras hapumpong intu Tambiran Salomo hong Human Tuhan.

¹³Tuntang oloh luar jaton je bahanyi dumah hapumpong dengan kare oloh percaya te. Tapi kare oloh percaya te paham ihormat awi oloh are.

¹⁴Tuntang sasar tahi sasar are oloh je percaya dengan Tuhan, aloh hatue kalote kea oloh bawi.

¹⁵Kalote ampie taloh je manjadi, sampai kare oloh haban iingkes hunjun ekae batiroh atawa amak, palus iimbit akan jalan, uka ewen paling isut tau takana kangkalingen Petrus, amon Petrus mahalau intu hete.

¹⁶Maka kare oloh dumah-dumaha bara kare lewu hakaliling Yerusalem. Ewen mimbit kare oloh haban tuntang je irasuk awi roh papa. Tuntang kare oloh te samandiai impakeleh.

¹⁷Kajariae imam hai tuntang kare oloh ayue iete kare oloh golongan Saduki nampara mawi tindakan awi kahirin atei ewen.

¹⁸Kare rasul inawan, palus inamean akan huang penjara umum.

¹⁹Tapi hamalem te, ije biti malekat Tuhan muap kare bauntonggang penjara palus mimbit kare rasul te balua. Malekat te hamauh dengan kare rasul te,

²⁰“Keleh keton haguet tuntang mendeng intu Human Tuhan tuntang sanan akan kare oloh tahiu pambelom je taheta toh.”

²¹Maka kare rasul te balalu manumon peteh malekat te. Hayak hanjewu ewen haguet akan Human Tuhan tuntang nampara majar intu hete. Pandehan te imam hai tuntang kare oloh ayue dumah, palus mawi sidang majelis dengan kare pamimpin Yehudi. Limbah te tinai ewen manyoho oloh haguet manduan kare rasul te bara penjara uka iimbit manaharep ewen.

²²Tapi katika kare oloh je inyoho te sampai intu penjara, ewen jaton sondau kare rasul intu hete. Jadi ewen haluli, palus mansanan hal te akan majelis.

²³“Katika ikei sampai hong penjara,” koan ewen dengan majelis, “bauntonggang penjara te bakunci bua-buah, tuntang kare pagawaie metohe bajaga intu bauntonggang. Tapi katika ikei muap bauntonggang te, ije mahin jaton ikei sondau oloh intu huange.”

²⁴Katika perwira pangawal Human Tuhan tuntang kare imam kapala mahining laporan te, ewen bingung tahiu kare rasul te tuntang mikeh dengan taloh je tau manjadi te.

²⁵Rahian tinai dumah ije biti oloh hatue mimbit barita kalotoh, “Hining toh! Kare oloh je inahan awi kare Tuan hong penjara te, metoh toh ewen majar oloh are hong Human Tuhan!”

²⁶Maka perwira pangawal Human Tuhan te haya-hayak dengan kare pagawai ayue, haguet manduan kare rasul te haluli. Tapi dia mahapan kakaras, awi ewen mikeh dengan oloh are; ela-ela oloh are te kareh mamedak ewen hapan batu.

²⁷Kare rasul te iimbit tame manaharep majelis. Palus imam hai mariksa ewen.

²⁸ Ie hamauh, “Ikei jari mangahana keton uka ela majar tahiu oloh te. Tapi toh tau keton mitee taloh je iawi keton! Keton manyiar auh ajar keton hong hapus Yerusalem, tuntang keton handak madawa ikei haream manyewut ikei toh je mawi sabab oloh te impatei.”

²⁹Petrus tuntang kare rasul je beken tombah, “Ikei musti manumon kahandak Hatalla tuntang dia manumon kahandak olon.

³⁰Yesus, je inyampalaki keton te, jari imbelom haluli bara pampatei awi Hatallan tato hiang itah.

³¹Tuntang Hatalla jari manenga Akae eka mondok tuntang kuasa je gantong kilau pamimpin tuntang Panyalamat; uka bangsa Israel inenga katika mangat hobah bara kare dosae tuntang mandino ampun dosa.

³²Katika toh aton kare saksi tahiu taloh samandiai te — ikei tuntang kea Roh Hatalla je inenga awi Hatalla akan kare oloh je manumon parentahe.”

³³Katika kare anggota majelis agama mahining jete ewen balait toto sampai ewen pakat uka mampatei kare rasul te.

³⁴Tapi bara kare anggota majelis te aton ije biti oloh Parisi bagare Gamaliel. Ie te guru agama je paham ihormat awi oloh samandiai. Ie mendeng palus manyoho oloh mimbit kare rasul te balua hanjulo.

³⁵Limbah te ie hamauh dengan majelis agama te, “Pahari handiai kare oloh Israel! Keleh inirok bua-buah tahiu kare taloh je handak ilalus awi kare pahari dengan kare oloh toh.

³⁶Basa horan puji lembut Teudas, je manyewut arepe oloh hai, sampai kurang labih epat ratus biti oloh omba ie. Tapi ie impatei tuntang kare oloh ayue kasaburan, tuntang gawie te lilap.

³⁷Limbah te tinai, hong katika aton sensus, lembut tinai Yudas, oloh bara Galilea. Ganan pangaruh ayue, are kea oloh je omba ie. Tapi ie kea imuno, tuntang uras kare oloh ayue pisah darai.

³⁸Jadi dengan kajadian jetoh maka nasehat ayungku kalotoh: ela ih mawi taloh en-en taharep kare oloh toh, nalua ih ewen. Basa amon ajar tuntang gawin ewen toh bara olon, maka ajar toh tuntang gawin ewen te kareh lilap.

³⁹Tapi amon jete dumah bara Hatalla, maka kare pahari dia olih mampakalah ewen. Ela-ela kareh pahari malawan Hatalla haream.” Nasehat Gamaliel te inarima awi Majelis.

⁴⁰Maka kare rasul te intehau, palus ihewes hapan cambuk, limbah te ingahana majar tinai tahiu Yesus. Tuntang harun ewen ilapas.

⁴¹Kare rasul te malihi majelis agama dengan kahanjak basa Hatalla jari maanggap ewen patut uka mandino hinaan tagal Yesus.

⁴²Tuntang genep andau hong Human Tuhan tuntang intu kare human oloh, ewen harajur majar tuntang mambarita Barita Bahalap tahiu Yesus je Ie te Raja Panyalamat je injanji te.