Read Ngaju SARITAN GAWIN KARE RASUL 6 Bible Online

SARITAN GAWIN KARE RASUL 6 - Ngaju bible

SARITAN GAWIN KARE RASUL 6

¹Kare murid Yesus sasar tahi sasar are. Hong katika te kare murid Yehudi je mahapan basa Yunani, mangkeme dia sanang dengan kare murid je asale asli Yehudi. Oloh Yehudi je mahapan basa Yunani te hamauh, “Kare oloh bawi balon ikei jaton dinon pambagian bara bantuan balanja genep andau je imbagi akan kare oloh.”

²Tagal te kaduewalas rasul te mamumpong kare oloh percaya tuntang hamauh dengan ewen, “Dia bahalap amon ikei tende mambarita auh Hatalla, awi ikei musti maurus kare soal panginan.

³Jadi, keleh kare pahari mintih bara marak kare pahari uju biti oloh je basewut bahalap tuntang inguasa awi Roh Hatalla tuntang pintar-harati, je tau ikei manyohoe maurus kare soal toh;

⁴basa ikei baya handak balakudoa tuntang mambarita auh Hatalla bewei.”

⁵Oloh handiai te pakat manarima auh bara kare rasul te. Palus ewen mintih Stepanus, ije biti oloh je percaya toto dengan Yesus tuntang inguasa awi Roh Hatalla. Taintih kea: Pilippus, Prokhorus, Nikanor, Timon, Parmenas tuntang Nikolaus bara Antiokhia; ie dia oloh Yehudi, tapi ie jari tame agama Yehudi.

⁶Kauju oloh te iusul awi kare rasul, palus kare rasul te balakudoa tuntang balaku berkat Tuhan akan ewen.

⁷Maka kalote barita bara Hatalla tayap tuntang kare murid Yesus hong Yerusalem kea sasar mandahang karee. Tuntang are hindai kare imam je percaya dengan Yesus.

⁸Stepanus paham imberkat awi Hatalla, sampai ie mawi are taloh heran tuntang kare taloh je dia puji helo hong marak kare oloh.

⁹Tapi aton kare oloh je malawan ie; ewen te kare anggota huma sombayang je inyewut Huma Sombayang Kare Oloh Mardeka.[6] Kare anggota huma sombayang te iete kare oloh Yehudi bara Kirene tuntang Aleksandria. Ewen dengan kare oloh Yehudi bara Kilikia tuntang Asia hatakian auh dengan Stepanus.

¹⁰Tapi ewen dia olih manangkis kare taloh je inyewut awi Stepanus, awi Roh Hatalla jari manenga akae kapintar-kaharati hapae hakotak.

¹¹Tagal te ewen manyogok pire-pire oloh uka ewen hamauh, “Ikei mahining oloh te mahina Moses tuntang Hatalla!”

¹²Maka kalote ewen manantiring kare oloh tuntang kare pamimpin Yehudi, tuntang kare guru agama. Balalu ewen haguet manawan Stepanus, palus ewen mimbit ie manaharep Majelis Agama.

¹³Tuntang ewen mimbit kea kare saksi je manenga kare katarangan je dia toto tahiu Stepanus. Kare saksi te hamauh, “Oloh toh harajur mahina Human Tuhan je barasih tuntang mahina kare parentah Hatalla je inyampai awi Moses.

¹⁴Ikei jari mahining Ie hamauh, je Yesus bara Nasaret te akan manduroh Human Tuhan, palus mobah kare hadat je inuron Moses akan itah!”

¹⁵Kakare oloh je dumah huang sidang majelis agama te mananture Stepanus. Tuntang hong katika te baun Stepanus gitan kilau baun malekat.