Read Ngaju SARITAN GAWIN KARE RASUL 7 Bible Online

SARITAN GAWIN KARE RASUL 7 - Ngaju bible

SARITAN GAWIN KARE RASUL 7

¹Imam hai misek dengan Stepanus, “En kare taloh handiai je insanan awi kare oloh te toto?”

² Stepanus tombah, “Kare pahari handiai tuntang kare bapa-bapa! Toh keleh hining auhku! Helo bara tato hiang itah Abraham pindah akan Haran hong katika te magon melai intu Mesopotamia, Hatalla Je Pangkahai te dumah manalih ie

³tuntang hamauh, ‘Keleh ikau malihi lewum tuntang kare tundah-paharim. Keleh haguet akan lewu je kareh inunjokku akam.’

⁴ Maka Abraham haguet malihi lewu Kasdim, palus pindah akan Haran. Limbah bapa Abraham matei, Hatalla manyoho Abraham pindah akan daerah toh je eka kare pahari tuntang kare bapa melai wayah toh.

⁵ Hong katika te isut mahin jaton bara daerah toh je jari inenga Hatalla akan Abraham uka ie tau mawarise; kalombah lokap mahin jaton jari inenga akae. Tapi Hatalla hajanji ie kareh manenga jete akan Abraham uka Abraham tuntang turonan ayue tau mawaris jete. Metoh te Abraham jaton dinon anak.

⁶ Tapi kalotoh Hatalla jari hamauh dengae, ‘Turonam kareh melai kilau oloh tamuei hong lewun oloh beken. Kare oloh hong daerah te manjajah ewen tuntang tulas toto dengan ewen sampai epat ratus nyelo katahie.

⁷ Tapi aku kareh mahukum bangsa je mawi ewen kilau jipen,’ koan Hatalla, ‘tuntang ewen kareh balua bara lewu te tuntang akan manyembah Aku hong daerah jetoh.’

⁸ Limbah hamauh kalote peteng janji te indehen awi Hatalla hapan gawin sunat. Maka limbah Isaak, anak Abraham te inakan, Abraham manyunat ie metoh umure hanya andau. Limbah te Isaak manyunat kea anake, iete Yakob. Tuntang Yakob tinai manyunat kea due walas kare anake, iete je manjadi kare tato hiang bangsa oloh Yehudi.

⁹ Kare tato hiang itah te bahiri dengan Yosep, sampai ewen manjual ie manjadi jipen intu Misir. Tapi Hatalla mampahayak ie,

¹⁰ tuntang malapas ie bara kare kasusahe. Hatalla manenga akae kapintar tuntang kaharati katika ie manaharep Parao raja Misir, sampai Parao mangkat ie manjadi Gubernur daerah Misir tuntang kapala istana Parao.

¹¹ Limbah te dumah wayah lau je hai hong hapus tanah Misir tuntang Kanaan sampai oloh susah toto. Tato hiang itah jaton olih mandino panginan.

¹²Maka katika Yakob mahining intu Misir aton gandom, ie manyoho kare anake, iete tato hiang itah, manalih hete. Jete pangkasolake ewen akan hete.

¹³ Katika ewen haguet akan tingkat je kaduee, Yosep mansanan akan kare paharie je ie te Yosep. Katika te harue raja Misir katawan keluarga Yosep.

¹⁴ Limbah te tinai Yosep mangirim kabar akan bapae, iete Yakob, balaku dengae uka ie dengan kare keluargae samandiai pindah akan Misir — kare ewen te samandiai aton uju puluh lime biti.

¹⁵ Maka Yakob pindah akan Misir tuntang intu hete ie dengan tato hiang itah melai.

¹⁶ Rahian tinai hantun ewen iimbit akan Sikhem tuntang ingubur hong kuburan je jari imili hapan kare duit awi Abraham bara oloh Hemor intu Sikhem.

¹⁷ Katika jari tokep wayahe janjin Hatalla akan Abraham te tulus, bangsa itah hong Misir jari sasar are.

¹⁸Kajariae ije biti raja beken je dia mangasene Yosep, marentah hong Misir.

¹⁹ Raja te hapakoae ih dengan bangsa itah tuntang tulas dengan tato hiang itah. Ie mamaksa ewen manganan kare anak awau ewen je harue inakan uka inalua tuntang matei.

²⁰ Intu wayah te Moses inakan; ie te anak awau je bakena toto. Telo bulan katahie ie ihaga intu human bapae,

²¹ tuntang limbah te ie inganan. Putri ain Raja Parao manduan ie, palus mahaga ie kilau anak ayue kabuat.

²²Kakare macam ilmu bangsa oloh Misir iajar akae tuntang ie manjadi oloh je bara kuasa huang kotak tuntang gawie.

²³ Katika umur Moses epat puluh nyelo maka lembut tirok huang ateie uka haguet mite ampin bangsa ayue oloh Israel.

²⁴Palus ie mite ije biti bara ewen ingapehe awi ije biti oloh Misir; maka ie mandohop oloh je ingapehe te tuntang mampatei oloh Misir te.

²⁵Moses manyangka bangsa ayue tau harati je ie te ihapan awi Hatalla uka mambebas ewen. Tapi rahian tinai gitan je ewen te dia haratie.

²⁶Andau jewue tinai ie mite due biti oloh Israel hakalahi, palus ie manggau jalan uka mandamai ewen. Ie hamauh, ‘Pahari handiai, keton toh hampahari. Mbuhen keton kalahi?’

²⁷Tapi oloh je mawi kawale te manggian Moses akan sare palus hamauh, ‘Eweh mangkat ikau manjadi pamimpin tuntang hakim akan ikei?

²⁸En ikau handak mampatei aku kea kilau ikau mampatei oloh Misir te male?’

²⁹ Katika Moses mahining taloh je insanan awi oloh te, Moses hadari bara Misir palus melai intu daerah Midian. Intu hete ie mandino due anak.

³⁰ Epat puluh nyelo limbah te ije biti malekat dumah manalih Moses hong padang pasir tokep Bukit Sinai. Malekat te dumah huang apui intu rowut je hanyala.

³¹Moses hengan mite hal te, sampai ie haguet manalihe toke-tokep uka mangatawan en taloh te. Palus ie mahining auh Tuhan hamauh,

³²‘Aku toh Hatallan tato hiangm; Aku toh Hatallan Abraham, Isaak, tuntang Yakob.’ Moses hagenjeh awi kikehe sampai dia bahanyi tinai manampayah akan eka rowut te.

³³Limbah te Tuhan hamauh tinai, ‘Engkak sandal je ihapam te, awi petak je ekam mendeng te jete petak je barasih.

³⁴Aku jari mite tuntang manantuani ampin kapehen oloh ayung-Ku hong Misir. Aku jari mahining tarahing ewen tuntang Aku mohon uka maliwus ewen. Toh, kahetoh ikau! Aku handak manyoho ikau akan Misir.’

³⁵ Maka Moses jetoh je dia ingaku awi bangsa Israel tuntang je inolak hapan auh kalotoh, ‘Eweh je jari mangkat ikau manjadi pamimpin tuntang hakim akan ikei?’ Tapi ie te je inyoho Hatalla uka manjadi pamimpin tuntang panyalamat, awi pandohop bara malekat je dumah manalih ie intu rowut je hanyala te.

³⁶ Moses te kea je mamimpin bangsa Israel balua bara Misir awie manampa kare taloh heran tuntang kare taloh je dia puji bahut hong Misir, hong Tasik Raruju tuntang hong padang pasir katahin epat puluh nyelo.

³⁷ Moses jete kea je hamauh dengan bangsa Israel, ‘Hatalla handak manenga akan keton ije biti nabi je iintih bara marak keton kabuat, sama kilau ie mintih aku.’[7]

³⁸ Moses te kea je aton hong marak oloh Israel hong padang pasir, manjadi oloh helat akan malekat je hakotak dengae intu Bukit Sinai dengan tato hiang itah. Ie kea je manarima bara Hatalla barita je belom mangat inyampai akan itah.

³⁹Tapi aloh kalote tato hiang itah dia maku mamenda ie. Ewen manolak ie tuntang mipen haluli akan Misir.

⁴⁰ Ewen hamauh dengan Harun, ‘Nampa ih kare dewa akan ikei, mangat kare dewa te mamimpin ikei. Basa ikei jari dia katawan hindai taloh je manjadi buah Moses te je mimbit ikei balua bara Misir!’

⁴¹ Palus hong katika te ewen manampa ije hampatong anak sapi, limbah te ewen maluput parapah akan hampatong te tuntang mawi pesta hapan manyembah taloh je inampa awi ewen kabuat.

⁴² Maka Hatalla malihi ewen tuntang manalua ewen manyembah kare bintang intu langit. Jete hasaroroi dengan taloh je tarasurat huang surat kare nabi. Iete kalotoh, ‘O kare oloh Israel! Dia ie akang-Ku keton manyambalih tuntang mampatei meto katahin epat puluh nyelo hong padang pasir.

⁴³Pasah taloh ain Molok je imbit keton haya-hayak dengan hampatong meto je indewa keton, iete Repan; Jete ie hampatong je inampa keton uka inyembah. Tagal te aku kareh manganan keton sampai keja-kejau akan silan tanah Babilon.’

⁴⁴ Kemah eka Hatalla dumah manalih olon aton intu tato hiang itah hong padang pasir. Kemah te inampa awi parentah Hatalla akan Moses tuntang manumon sonto je imparahan Hatalla akan Moses.

⁴⁵ Limbah te tinai kemah te harajur iimbit awi tato hiang itah sampai katika ewen dengan Yosua haguet marabut daerah itah toh bara kuasan kare bangsa oloh je iharak Hatalla intu taharep ewen. Kemah te aton intu hete sampai jaman raja Dawid.

⁴⁶ Dawid mampahanjak atei Hatalla tuntang balaku dengae uka manyoho manampa ije huma akan Hatalla je inyembah Yakob[8] te.

⁴⁷ Tapi Salomo je mampendeng huma te akan Hatalla.

⁴⁸Tapi Hatalla Je Pangkahai dia melai intu huang huma je inampa awi olon; basa intu huang surat nabi tarasurat kalotoh,

⁴⁹ ‘Langit jete padadusang-Ku, tuntang petak galang paing-Ku. Human en je handak impendeng keton akang-Ku? Intu kueh eka-Ku malayan kaheka-Ku?

⁵⁰En dia Aku kabuat je manjadian taloh handiai?’ Kalote auh Hatalla.

⁵¹ Lalehan katekang atei kare pahari tuntang kalote kahalin keton mamenda Hatalla! Kare pahari sama kilau tato hiang pahari; harajur malawan Roh Hatalla! Pinding pahari badengen dengan auh Hatalla!

⁵²En aton nabi je ingapehe awi tato hiang pahari? Ewen mampatei kare sarohan Hatalla je horan jari mansanan je Rewar Hatalla Ije Bujur te kareh dumah. Tuntang toh kare pahari mandarhaka tuntang mampatei Rewar Hatalla te.

⁵³Kare malekat jari manyampai kare parentah Hatalla akan kare pahari, tapi kare pahari dia manumoe!”

⁵⁴Sana kare anggota majelis te mahining taloh handiai je insanan awi Stepanus, ewen kapehe ateie tuntang balait toto dengae.

⁵⁵Tapi Stepanus je inguasa awi Roh Hatalla, manampayah akan langit. Ie mite kahain Hatalla tuntang Yesus mendeng intu eka ije bara kuasa hila gataun Hatalla.

⁵⁶“Ite,” koan Stepanus, “aku mite sorga buap tuntang Anak Olon mendeng hila gantaun Hatalla!”

⁵⁷Kare anggota majelis te manutup pinding ewen sambil mangkariak, palus haya-hayak ewen mamok Stepanus.

⁵⁸Ewen mihir ie akan luar lewu limbah te mamedak ie hapan batu. Kare oloh je manyaksi kajadian te mampelai pakaian ewen intu ije biti oloh tabela je bagare Saulus.

⁵⁹Pandehan ewen mamedak Stepanus, Stepanus mangkariak, “Tuhan Yesus, tarima rohku!”

⁶⁰Palus ie mandeko utute sontop tuntang mangkariak dengan hai auhe, “Tuhan, ela ah mananggong dosa toh akan ewen!” Limbah hamauh kalote, ie palus matei.