Read Ngaju SARITAN GAWIN KARE RASUL 8 Bible Online

SARITAN GAWIN KARE RASUL 8 - Ngaju bible

SARITAN GAWIN KARE RASUL 8

¹Tuntang Saulus hanjak kea tagal pampatei te. Andau te kea ungkup hong Yerusalem nampara ingapehe. Kakare oloh percaya, kacuali kare rasul, kasaburan akan hapus daerah Yuda tuntang Samaria.

²Kare oloh je mikeh dengan Hatalla mangubur Stepanus tuntang manatum ie dengan kapehen atei ewen.

³ Tapi Saulus jua-juan kea manggau jalan mancalaka ungkup. Ie haguet manalih genep huma tuntang mihir kare oloh percaya akan luar, palus manamean ewen akan huang penjara.

⁴Kare oloh percaya je jari kasaburan te mambarita Barita Bahalap bara Hatalla te akan hete-hete.

⁵Pilippus haguet akan lewu[9] Samaria tuntang mambarita akan kare oloh intu hete tahiu Raja Panyalamat je injanji Hatalla.

⁶Katika kare oloh mahining Pilippus hakotak tuntang ewen mite kare taloh heran je iawie, are bara ewen je manantuani taloh je insanan awi Pilippus.

⁷Basa kare roh papa jari balua hayak mangkariak bara kare oloh je irasuk setan. Kare oloh lumpuh tuntang batimpang mahin are je impakeleh.

⁸Maka kare oloh hong lewu Samaria te hanjak toto.

⁹Hong lewu te aton ije biti oloh hatue bagare Simon, je jari pire-pire katahie mawi oloh Samaria marajin kare ilmu sihir ayue. Ie mansanan akan kare oloh je ie te oloh je labih tamam bara oloh beken.

¹⁰Maka kakare oloh hong lewu te bara kare ampin tingkat pambelome manantuani ie. “Oloh toh aton kuasa bara Hatalla je inyewut kilau ‘Kuasa hai’ te,” koan ewen.

¹¹Jari tahi toto ie mampalemo oloh hapan kakuatan sihire sampai ewen paham manantuani ie.

¹²Tapi Pilippus mambarita akan ewen Barita Bahalap tahiu kilen ampie Hatalla mampendeng pamarentahan Ayue, tuntang tahiu Yesus Kristus, Raja Panyalamat te. Maka ewen percaya dengan barita je inyampai Pilippus, palus ewen impandoi — aloh oloh hatue, kalote kea oloh bawi.

¹³Simon kabuat mahin percaya. Tuntang limbah impandoi, ie harajur omba Pilippus. Kare taloh heran je manjadi, mawi Simon baka hera-heran.

¹⁴Kare rasul hong Yerusalem mahining je kare oloh Samaria jari manarima auh Hatalla. Tagal te ewen manyoho Petrus tuntang Yohanes haguet akan hete.

¹⁵Katika Petrus tuntang Yohanes sampai hete, ewen balakudoa akan kare oloh Samaria te mangat ewen mandino Roh Hatalla.

¹⁶Basa Roh Hatalla hindai dumah manguasa aloh ije biti bara ewen te; ewen harun impandoi baya huang aran Yesus Kristus bewei.

¹⁷Palus Petrus tuntang Yohanes mina lengen ewen akan hunjun kare oloh Samaria te; maka ewen manarima Roh Hatalla.

¹⁸Simon puna mite lengen kare rasul te iingkes akan hunjun kare oloh te, Roh Hatalla inenga akan kare oloh te. Tagal te Simon mimbit duit manalih Petrus tuntang Yohanes,

¹⁹balalu hamauh, “Tenga akangku kuasa te kea mangat amon lengengku iingkes intu eweh bewei, oloh te kareh manarima Roh Hatalla.”

²⁰Tapi Petrus tombah, “Calaka ikau dengan duitm! Ikau manyangka panengan Hatalla tau imili hapan duit?

²¹Ikau jaton bara hak uka omba intu huang gawin ikei, basa ateim dia bujur intu taharep Hatalla.

²²Tagal te lihi ih kahandakm je papa te, tuntang laku dengan Tuhan mangat Ie mampun tirokm je papa te.

²³Basa aku katawan ikau kontep awi kahirin atei tuntang ihajipen awi kapapa.”

²⁴Palus Simon hamauh dengan Petrus tuntang Yohanes, “Dohop balaku dengan Tuhan uka jaton ije taloh je koan keton te manjadi buah aku.”

²⁵Limbah ewen manenga kasaksian tuntang mambarita auh Tuhan, Petrus tuntang Yohanes haluli akan Yerusalem, tuntang hong panjalanae ewen mangabar Barita Bahalap intu kare-kare lewu hong Samaria.

²⁶Ije biti malekat Tuhan hamauh dengan Pilippus, “Ayo haguet! Lius ikau akan hila salatan[10] akan jalan je tembus bara Yerusalem akan Gasa.” Jalan te benyem.[11]

²⁷Maka Pilippus balalu haguet. Hong katika te aton ije biti pagawai istana Etiopia je metoh hong panjalanae buli akan lewue. Oloh te ije biti pagawai hai je mimbing tanggong jawab dengan kakare panatau ain Kandake, Ratu hong lewu Etiopia. Oloh te jari haguet akan Yerusalem uka sombayang manyembah Hatalla tuntang metoh te ie buli mahapan karetae. Pandehan ie mondok huang karetae te, ie mambasa Surat Nabi Yesaya.

²⁹Roh Hatalla hamauh dengan Pilippus, “Talih manokep kareta te.”

³⁰Maka Pilippus haguet manokep kareta te, palus ie mahining oloh te mambasa Surat Yesaya. Pilippus misek dengae, “En Tuan harati taloh je imbasa Tuan te?”

³¹Oloh te tombah, “Kilen ampingku haratie, amon jaton oloh je manarang akangku?” Palus ie mimbit Pilippus mandai akan kareta tuntang mondok hayak dengae.

³² Kalotoh auh ayat je imbasae te, “Ie kilau tabiri je iimbit uka inyambalih, kilau anak tabiri je dia mahiau metoh bulue inggunting, kalote ie jaton mampalua auh samasinde.

³³Ie ihina tuntang iawi oloh dengan dia bujur. Hambaruan Ayue induan bara hunjun petak sampai ije biti mahin jaton oloh je tau manyarita tahiu turonae.”

³⁴Pagawai hai bara Etiopia te hamauh dengan Pilippus, “Coba sanan akangku, eweh je imaksud awi nabi toh? En arepe kabuat atawa oloh beken?”

³⁵Maka Pilippus palus manampara hakotak; ie mahapan kare ayat te kilau tamparan uka mambarita Barita Bahalap tahiu Yesus akan pagawai hai te.

³⁶Hong benteng jalan, ewen sampai intu ije eka je hadanum. Pagawai te hamauh, “Ite hete aton danum! Narai hindai je magon tapas hapan mampandoi aku?” [

³⁷Pilippus hamauh, “Amon Tuan percaya hapan salepah atei, Tuan tau impandoi.” “Aku percaya Yesus Kristus te Anak Hatalla,” koan pagawai hai bara Etiopia te.]

³⁸Palus ie manyoho karetae tende; limbah te ewen due, Pilippus tuntang pagawai te, mohon akan huang danum tuntang Pilippus mampandoi ie.

³⁹Katika ewen lembut, Roh Hatalla manduan Pilippus bara hete. Pagawai hai bara Etiopia te jaton mite ie tinai. Dengan kahanjake pagawai hai te marajur panjalanae.

⁴⁰Maka salenga ih Pilippus jari aton intu Asdod. Tuntang katika ie marajur pambulie, ie mangabar Barita Bahalap tahiu Yesus hong kakare lewu sampai ie dumah hong Kaisarea.