Read Ngaju ROMA 1 Bible Online

ROMA 1 - Ngaju bible

ROMA 1

¹Pahari handiai hong Roma je inyinta Hatalla tuntang je jari intehau awi Hatalla uka manjadi oloh Ayue. Hatalla jari mintih tuntang mangkat aku uka tantai mambarita Barita Bahalap bara Hatalla.

²Barita Bahalap te jari injanji awi Hatalla hong jaman horan mahalau kare nabi Ayue tuntang jari inyurat huang Surat Barasih.

³Barita Bahalap te tahiu Anak Hatalla, Tuhan itah Yesus Kristus. Secara olon Ie te turonan Dawid,

⁴tapi secara hatalla ie te puna toto Anak Hatalla. Jete gitan batantu awi kuasa je dia puji helo mahalau kamisike bara pampatei.

⁵Mahalau Ie kea Hatalla manenga akangku asi manjadi rasul, uka aku — mangat mahormat Kristus — mangagalan kare oloh bara kakare bangsa uka percaya tuntang baketep.

⁶Je imaksudku dengan kare bangsa iete keton je aton hong Roma; keton mahin jari intehau uka manjadi ungkup Yesus Kristus.

⁷Jete bukue aku manyurat akan keton. Keleh Hatalla Bapa itah tuntang Tuhan Yesus Kristus manenga berkat tuntang kadamai akan keton.

⁸Mahalau Yesus Kristus, helo-helo aku manyewut tarima kasih akan Hatalla tagal kare Pahari handiai; basa oloh hapus kalunen jari mahining je keton jari percaya toto dengan Kristus.

⁹Aku harajur mingat keton amon aku balakudoa. Hatalla saksie taloh je insanangku akan keton toh toto. Iete Hatalla je inempoku hapan salepah ateiku awiku mangabar Barita Bahalap tahiu Anak Ayue.

¹⁰Aku balaku nyame-nyame dengan Hatalla, keleh jaka Ie handak manyoho aku metoh toh maja manalih keton.

¹¹Basa aku mipen toto hasondau dengan keton mangat aku tau mambagi akan keton panenga bara Roh Hatalla hapa mampaabas keton.

¹²Maksudku iete awi itah jari sama-sama percaya dengan Yesus Kristus, maka itah tau habagi kaabas akan sama arep.

¹³ Pahari handiai! Aku handak mangat keton katawan jari kinjap aku bara kahandak uka maja manalih keton tapi harajur aton bewei halangae. Aku mipen uka hong marak keton kea gawingku aton hasile sama kilau hasil gawingku je jari aton hong marak kare oloh je dia Yehudi hong kare eka beken.

¹⁴Basa ayungku aton gawi je musti ilalusku akan kakare bangsa: Akan oloh bangsawan tuntang jipen, oloh je jari aton pandidikae tuntang je hindai aton pandidikae.

¹⁵Jete bukue aku handak toto mangabar Barita Bahalap te akan keton je melai hong Roma kea.

¹⁶ Aku percaya toto dengan Barita Bahalap te, awi barita te jete kuasa bara Hatalla uka manyalamat oloh handiai je percaya; je mambatang akan oloh Yehudi, tuntang akan bangsa beken kea.

¹⁷ Basa hapan Barita Bahalap te Hatalla mamparahan kilen ampin carae hubungan olon dengan Hatalla tau ingambuah haluli; carae te iete mahapan kapercaya dengan Hatalla, bara tamparae sampai kahapuse. Jete sama kilau je tarasurat huang Surat Barasih, “Oloh je percaya dengan Hatalla sampai hubungan ayue dengan Hatalla manjadi bahalap haluli, oloh te akan belom!” [1]

¹⁸Bara sorga Hatalla mamparahan kalaite dengan kakare dosa tuntang kapapan olon, basa kapapa mahambang olon mangasene auh ajar je toto tahiu Hatalla.

¹⁹Taloh je tau ingatawan oloh tahiu Hatalla jari tarang huang pangingat atei olon, basa Hatalla kabuat jari mangarinah jete akan olon.

²⁰Bara katika Hatalla manjapa kalunen, kare sipat Hatalla je dia gitan, iete ampin lagon Ayue kilau Hatalla tuntang kuasa je katatahie, jari olih olon haratie mahalau taloh handiai je jari injapa Awie. Jadi oloh samasinde jaton bara alasan hapae mambujur arepe.

²¹ Olon mangasene Hatalla, tapi olon dia mahormat Ie kilau Hatalla tuntang dia kea manarimakasih Akae. Huang katambalike olon manirok taloh je mia-mias; atei ewen manjadi kaput.

²²Ewen mangkeme arepe pintar-harati, padahal ewen humong.

²³ Dia ie Hatalla je katatahie je inyembah ewen malengkan kare hampatong je inampa manyonto ampin taloh-belom je tau matei; iete olon, burong, meto je hapai epat, tuntang meto je manggayar.

²⁴Tagal te Hatalla manalua ewen inguasa awi kipen atei ewen uka mawi taloh je harayap, sampai ewen malalus kare taloh je papa dengan sama arepe.

²⁵Hatalla je bujur, ingganti ewen hapan taloh je dia bujur. Ewen dia mayembah tuntang manempo Ie je manjapa taloh handiai malengkan taloh je injapa. Padahal Ie je manjapa te je ihormat-inara sampai katatahie! Amen.

²⁶Awi olon malalus taloh je kilau te, maka Hatalla manalua ewen manumon angat kipen ewen je randah. Kare oloh bawi ain ewen dia hindai mangguna kipen ewen dengan oloh hatue kilau je puna kapatute, malengkan mangguna kipen ewen te dengan sama bawi.

²⁷Oloh hatue mahin kalote kea; ewen dia hindai manumon cara je patut mawi hubungan dengan oloh bawi, malengkan manganji arepe dengan sama hatue. Oloh hatue malalus taloh je mampahawen dengan sama hatue, sampai ewen manarima baleh je ombet akae dengan gawin ewen je papa te.

²⁸Awi olon mangkeme dia perlu mangasene Hatalla, maka Hatalla manalua tirok ewen manjadi rusak, sampai ewen malalus kare taloh je dia tau ewen malaluse.

²⁹Atei ewen kontep dengan taloh handiai je papa, je dia bujur; kontep awi kakoho, kapapa tuntang kahiri; kontep awi kipen handak mampatei, kalahi, manipu tuntang mingkes kasingi. Ewen rajin manahiu oloh beken,

³⁰rajin mamapa aran oloh beken; ewen te bajoho tuntang kurang ajar, basingi dengan Hatalla[2] tuntang rajin layau kotake. Ewen apik manggau cara taheta uka mawi kapapa. Ewen rajin malawan oloh bakas;

³¹ewen dia maku harati auh oloh beken; ewen dia baketep tuntang tulas dengan sama arepe.

³²Ewen katawan, huang hukum Hatalla, oloh je malalus taloh handiai te patut ihukum matei. Aloh kalote kare hal te iawi ewen kea; tuntang ewen rajin haream amon oloh beken mawie kalote kea.