Read Ngaju ROMA 10 Bible Online

ROMA 10 - Ngaju bible

ROMA 10

¹Pahari handiai! Aku handak toto mangat bangsa ayungku inyalamat. Tuntang aku balakudoa toto-toto intu Hatalla akan ewen.

²Aku bahanyi hamauh je ewen te rajin toto manempo Hatalla. Tapi karajin ewen te jaton inggalang awi pangatawan je bara Hatalla.

³Ewen jaton mangatawan carae Hatalla manampa hubungan olon manjadi bahalap haluli Dengae. Tuntang awi ewen handak manumon cara ain ewen kabuat, maka ewen dia tundok dengan cara je inunjok awi Hatalla.

⁴Hukum agama jari ilalus awi Kristus. Jadi genep oloh je percaya dengan Kristus, hubungae dengan Hatalla manjadi bahalap haluli.

⁵ Moses manyurat, oloh je bahalap hubungae dengan Hatalla hunjun galang hukum agama, oloh te kareh belom awi taat dengan hukum agama te.

⁶ Tapi tahiu carae oloh mangambuah hubungae dengan Hatalla, Surat Barasih mansanan kalotoh, “Dia usah ih ikau hamauh huang ateim, ‘Eweh je handak mandai akan sorga?’ (rimae mimbit Kristus mohon),

⁷atawa ‘Eweh je handak mohon manalih lewun oloh matei?’ (rimae manggatang Kristus mandai bara pampatei).”

⁸Jete rimae kalotoh, “Barita bara Hatalla te tokep toto dengan keton; intu nyaman keton tuntang huang atei keton.” Jete barita je inyiar ikei; barita, je oloh musti percaya dengan Yesus Kristus.

⁹Basa amon pahari mangaku hapan nyame je “Yesus te Tuhan”, tuntang pahari percaya huang atei iete Hatalla jari mambelom Yesus bara pampatei, maka pahari akan salamat.

¹⁰Basa oloh je percaya te, percaya hapan ateie, sampai Hatalla manarima ie kilau oloh je bahalap hubungae dengan Hatalla. Tuntang hapan nyamae oloh mangaku, sampai ie inyalamat.

¹¹ Intu huang Surat Barasih tarasurat, “Oloh je percaya kareh dia impahawen.”

¹²Hal te manjadi buah oloh handiai, basa akan oloh Yehudi dengan akan oloh bangsa beken hal te jaton kabekee. Hatalla je tunggal te, ie te Tuhan akan oloh handiai. Ie manenga berkat je hakutoh akan oloh handiai je balaku dohop Dengae.

¹³ Huang Surat Barasih tarasurat, “Oloh handiai je mantehau Tuhan, kareh salamat.”

¹⁴Tapi kilen ampie ewen tau mantehau Tuhan amon ewen hindai percaya? Tuntang kilen ampie ewen tau percaya dengan Tuhan amon ewen hindai mahining tahiu Ie? Tuntang kea kilen ampie ewen tau mahining tahiu Tuhan, amon jaton oloh je mambaritae?

¹⁵ Tuntang kilen ampie oloh tau mimbit barita te amon ewen dia inyoho? Huang Surat Barasih inyurat kalotoh, “Lalehan kahalape panumah kare oloh je mimbit Barita Bahalap bara Hatalla!”

¹⁶ Tapi dia uras oloh manarima Barita Bahalap te. Basa Yesaya hamauh, “Tuhan, eweh kea je percaya dengan barita ain ikei?”

¹⁷Awi mahining barita maka kare oloh manjadi percaya, tuntang barita tau ihining, awi aton oloh je mambarita tahiu Kristus.

¹⁸ Tapi aku misek: En ewen te puna hindai mahining barita te? Pasti jadi! Basa huang Surat Barasih tarasurat kalotoh, “Auh ewen jari kumbang hong hapus kalunen, kare auh ewen jari sampai akan tapakan petak.”

¹⁹ Aku misek tinai: En bangsa Israel hindai mangatawan jete? Nauhe Moses ih je pangkaheloe tombah auh paisek te. Moses hamauh, “Kalotoh auh Hatalla, ‘Aku kareh mawi keton bahiri dengan bangsa beken je dia tame ungkup tuntang aku kareh mawi keton balait dengan bangsa beken je humong.’ ”

²⁰ Yesaya labih bahanyi hindai. Ie hamauh, “Kalotoh auh Hatalla, ‘Kare oloh je dia manggau Aku, jari sondau Aku; tuntang Aku mamparahan arep-Ku akan ewen je jaton misek tahiu Aku.’ ”

²¹ Tapi tahiu bangsa Israel Yesaya hamauh, “Kalotoh auh Hatalla, ‘Hapus andau Aku manjulok lengeng-Ku akan bangsa je badungil tuntang dia manumon.’ ”