Read Ngaju ROMA 11 Bible Online

ROMA 11 - Ngaju bible

ROMA 11

¹ Aku misek: En Hatalla jari manganan ungkup Ayue kabuat? Batantu dia! Aku kabuat ije biti oloh Israel turonan Abraham bara suku Benyamin.

²Dia! Hatalla dia manganan ungkup Ayue je jari iintih Awie bara solake. Kare pahari katawan kare taloh je tarasurat huang Surat Barasih tahiu Elia, katika ie mangado hal Israel akan Hatalla. Elia hamauh,

³ “Tuhan, kare oloh jari mampatei kare nabi Ayum tuntang mampahancor kare eka maluput parapah Akam. Baya batisa aku kabuat ih tuntang ewen handak mampatei aku kea.”

⁴ En auh tombah Hatalla akan Elia? Hatalla tombah, “Aku jari mampelai akan arep-Ku uju koyan biti oloh. Ewen hindai puji manyembah dewa Baal.”

⁵Kalote kea katika toh: Aton isut kare oloh je jari iintih tagal Asie.

⁶Ie mintih ewen awi Asie tapi dia awi gawin ewen. Basa amon paintih Hatalla te awi gawin olon, maka asin Hatalla te dia hindai asi je bujur.

⁷Jadi, kilen ampie toh? Ungkup Israel dia dinon taloh je inggau ewen. Oloh je mandinoe baya isut biti bewei je jari iintih Hatalla. Je beken uras manjadi oloh badungil taharep pantehau Hatalla.

⁸ Basa huang Surat Barasih inyurat kalotoh, “Hatalla mawi tirok tuntang atei ewen manjadi badungil; tuntang sampai katika toh matan ewen jaton tau mite tuntang pinding ewen jaton tau mahining.”

⁹ Dawid hamauh kea, “Nauhe kare pesta ain ewen te manjadi parangkep akan ewen kabuat, tuntang manjadi rumbak, eka ewen manjato tuntang hancor!

¹⁰Keleh tampayah matan ewen manjadi kaput mangat ewen dia tau mite; tuntang atei ewen manjadi bingkok sampai katatahie.”

¹¹Aku misek tinai: Katika oloh Yehudi lawo, en taloh te manjadi mangat ewen hancor? Dia samasinde! Tapi awi ewen badosa, maka bangsa oloh beken haream je inyalamat, sampai mawi atei oloh Yehudi bahiri dengan bangsa oloh beken te.

¹²Awi bangsa oloh Yehudi basala tuntang dia manumon kahandak Hatalla, maka kare bangsa beken imberkat Hatalla. Indahang tinai amon hubungan bangsa Yehudi dengan Hatalla manjadi bahalap haluli; batantu labih hai tinai berkat je handak inenga Hatalla!

¹³Tapi toh keleh aku hakotak dengan kare pahari je dia Yehudi! Katahin toh, kilau rasul akan kare bangsa je dia Yehudi, aku paham toto mampatamam gawingku.

¹⁴Aku harap aku tau mampalembut kahirin atei intu bangsa ayungku kabuat, mangat mahapan jalan jete aku tau manyalamat belahe bara ewen te.

¹⁵Awi ewen inolak Hatalla, maka hubungan kalunen toh dengan Hatalla manjadi bahalap haluli; mahin tinai amon ewen inarima Hatalla! Batantu jete sama rimae kilau oloh matei belom haluli!

¹⁶Amon ije kakiwak rote je solake inenga akan Hatalla, jete rimae rote ije kabawak te lepah inenga akan Hatalla kea. Tuntang amon uhat batang kayu te Hatalla je tempoe, jete rimae edae te mahin Ayue kea.

¹⁷Belahe bara kare edan batang saitun — iete kare oloh Yehudi — jari ingarat. Tuntang huang awan karat te incangkok edan batang saitun bara himba, ie te kare pahari je dia Yehudi. Pahari incangkok intu hete uka pahari mangkeme kamangat kare taloh handiai bara pambelom rohani ain kare oloh Yehudi.

¹⁸Tagal te ela ih keton manawah ewen je jari ingarat kilau edan te. Keton musti mingat je keton baya edan bewei. Tuntang edan dia manenga panginan akan uhat, tapi uhat je manenga panginan akan edan.

¹⁹Tapi pahari handak hamauh, “Iyoh, tapi kare edan te inetek mangat aku tau incangkok intu batang kayu te!”

²⁰Jete puna toto. Tapi ewen inganan awi ewen dia percaya, tapi pahari inarima awi pahari percaya. Jadi tagal jete ela pahari manjadi gantong atei: tapi keleh pahari mangkeme mikeh haream.

²¹Basa amon Hatalla dia mangkeme sayang manganan oloh Yehudi je kilau edan je asli te, ela manyangka Ie mangkeme sayang manganan pahari!

²²Jadi intu hetoh itah mite kapaham kahalap Hatalla tuntang Ie kea dia lue-luen kakarase. Ie puna karas toto dengan ewen je mawi dosa, tapi Ie bahalap ateie dengan pahari — asal pahari tetep belom dengan kahalap. Amon dia maka pahari kea tau inganan.

²³Tuntang tahiu kare oloh Yehudi te, amon ewen terai mawi arepe je dia percaya, maka ewen kareh inarima haluli; basa Hatalla aton kuasan Aie uka manarima ewen haluli.

²⁴Pahari je asale dia bara bangsa Yehudi, sama kilau edan batang saitun bara parak kayu. Nah, amon Pahari hakalawan dengan sipat pahari, tau incangkok intu batang saitun je asli, mahin tinai kare oloh Yehudi je inanding dengan kare edan batang saitun asli te. Batantu labih murah tinai akan Hatalla mangat halalian ewen intu batang saitun ain ewen kabuat.

²⁵Pahari handiai! Aku harap keton ela mangkeme jari mangatawan taloh handiai. Basa aton ije hal je ingahandak awi Hatalla, tapi je hindai ingatawan awi olon. Tuntang aku handak keton mangatawan jete; iete: belahe oloh Yehudi te batekang ateie, tapi dasar ewen te manjadi kalote baya sampai jumlah kare oloh je dia Yehudi je dumah manalih Hatalla jari sukup.

²⁶ Kalote maka kakare oloh Yehudi kareh salamat. Basa intu huang Surat Barasih inyurat kalotoh, “Raja Panyalamat kareh dumah bara Sion; ie handak mampuas kare kapapa bara turonan Yakob.

²⁷ Aku kareh mandehen janji toh dengan ewen hong katika Aku mampun kare dosan ewen.”

²⁸Awi oloh Yehudi dia maku manarima Barita Bahalap bara Hatalla, maka ewen manjadi musoh Hatalla; tuntang jete manjadi kaontong akan kare pahari je dia Yehudi. Tapi awi paintih Hatalla, maka kare oloh Yehudi te tetep inyinta awi Hatalla tagal tato hiang ewen.

²⁹Basa amon Hatalla mintih oloh tuntang mamberkat oloh te, Hatalla dia puji mambalang taloh je jari Ie mawie te.

³⁰Bihin keton dia taat dengan Hatalla. Tapi Hatalla jari mansanan je keton lapas bara kasalan, awi kare oloh Yehudi dia taat.

³¹Kalote kea dengan kare oloh Yehudi te. Hong katika toh ewen dia taat dengan Hatalla, mangat keton tau inyewut lapas bara kasalan. Tapi kareh ewen kea akan inyewut[15] lapas bara kasalan.

³²Basa Hatalla jari manalua salepah ungkup oloh kalunen inguasa awi kadungil, mangat Ie tau mamparahan Asie-Sintae dengan ewen samandiai.

³³ Toto tamam katatau Hatalla! Toto hai kapintar-kaharatin Aie tuntang pangatawan Aie! Eweh je tau manantuani kare taloh je inukas Awie? Eweh je tau harati cara je ihapan Awie malalus gawin Aie?

³⁴ Huang Surat Barasih tarasurat kalotoh, “Eweh je mangatawan tirok-atei Tuhan? Eweh je tau manenga nasehat Akae?

³⁵ Eweh je puji manenga taloh en-en akan Tuhan sampai Ie tau manuntut balehe?”

³⁶ Hatalla je manjapa kare taloh handiai. Asal taloh handiai uras bara Hatalla tuntang uras akan Hatalla. Tara akan Hatalla sampai katatahie! Amen.