Read Ngaju ROMA 13 Bible Online

ROMA 13 - Ngaju bible

ROMA 13

¹Genep oloh musti taat dengan pamarentah, awi dia aton pamarentah je dia mandino kuasa bara Hatalla. Tuntang pamarentah je aton wayah toh, malalus kuasa awi parentah Hatalla.

²Jete bukue oloh je malawan pamarentah sama ih kilau malawan taloh je inukas awi Hatalla. Tuntang oloh je mawie kalote kareh manarima hukuman.

³Basa oloh je mawi kahalap, dia usah mikeh dengan pamarentah. Baya oloh je mawi taloh papa je musti mikeh. Amon pahari handak uka pahari dia mangkeme mikeh dengan pamarentah, pahari musti mawi kahalap, maka pahari akan inara.

⁴Basa pamarentah te jipen Hatalla je bagawi akan kahalap keton. Tapi amon pahari malalus kapapa, puna pahari musti mikeh dengae, basa dia hayang bewei ie mimbing kuasa uka mahukum oloh. Ie te rewar Hatalla, je mimbit hukuman Hatalla mawi kare oloh je malalus kapapa.

⁵Jete bukue pahari musti taat dengan pamarentah — dia baya awi pahari dia handak buah hukum, tapi kea awi pangingat atei pahari.

⁶ Jete kea sababe mbuhen pahari mambayar pajak, basa pamarentah te pagawai Hatalla je tantai malalus gawi je ingabeken toh.

⁷Jadi keleh pahari mambayar akan pamarentah taloh je musti imbayar akae. Keleh mambayar pajak, amon pahari musti mambayar pajak; tuntang keleh pahari mambayar cukai amon cukai musti imbayar. Keleh marega ewen je musti irega tuntang mahormat ewen je musti ihormat.

⁸Ela butang taloh en-en dengan eweh bewei, kacuali butang asi dengan sama arep. Basa oloh je hasi sama arepe, oloh te jari malalus kakare hukum Moses.

⁹ Basa hukum agama Yehudi, iete ela habandong, ela mampatei, ela mipen manduan taloh je ain oloh beken; uras kare hukum te haya-hayak dengan kare hukum awang beken, jari imbulat manjadi ije hukum bewei, iete, “Keleh sinta sama arepm kilau ikau sinta arepm kabuat.”

¹⁰Oloh je sinta oloh beken, dia mungkin malalus kapapa mawi oloh te. Jadi oloh je masi dengan sama arepe jete oloh je jari manggenep kakare syarat hukum agama.

¹¹Beken bara taloh handiai te keton katawan je hong katika toh aton katika akan keton uka misik bara tiroh. Basa katikae akan itah inyalamat jari sasar tokep wayah toh bara metoh itah harun nampara percaya.

¹²Alem jari handak mahalau; tuntang dia tahi hindai andau balawa. Jadi, keleh itah terai malalus kare gawin kakaput. Itah musti manatap arep itah mahapan senjata kalawa.

¹³Itah musti malalus kare taloh je ihormat kilau je tau ilalus oloh metoh andau balawa; ela pesta barami malabien tikase, ela babusau. Ela mawi karayap, atawa dia bahadat. Ela hakalahi, atawa bahiri.

¹⁴Keleh Tuhan Yesus Kristus bewei je manukas taloh je musti ilalus keton. Tuntang ela manumon hadat oloh badosa je baya handak malalus kipee.