Read Ngaju ROMA 14 Bible Online

ROMA 14 - Ngaju bible

ROMA 14

¹ Oloh je langena kapercayae keleh inarima dengan bahalap hong marak keton. Ela hakalawan dengan kare auh ayue.

²Aton oloh je mangkeme ie te tau kuman en bewei. Tapi aton oloh beken je balemo kapercayae; ie mangkeme ie baya tau kuman kare sayur bewei.

³Oloh je kuman en bewei ela ie maanggap randah oloh je mintih panginan je ingahandake bewei; tuntang oloh je mintih panginan, ela kea manyalan oloh je kuman kare taloh handiai, basa Hatalla jari manarima ie.

⁴Eweh kea pahari te sampai pahari musti mahakim jipen oloh beken? En jipen te manjato atawa mendeng, jete urusan ain tempoe. Tuntang amon jipen te mendeng bujur, jete awi Tuhan olih mampendeng ie bujur.

⁵Aton oloh je mangkeme andau ije labih mambatang bara kare andau je beken, tapi oloh beken tinai mangkeme kare-kare andau te sama ih. Jadi, keleh genep bitin oloh manukas akan arepe kabuat.

⁶Oloh je mangkeme kare andau je inantu te mambatang, oloh te mawie kalote awi ie mahormat Tuhan. Oloh je kuman sepsimpan taloh kinan, ie mawie kalote awi mahormat Tuhan, awi ie manarimakasih akan Hatalla tagal panginan te. Kalote kea oloh je baya kuman panginan je iintih bewei; oloh te mahormat Tuhan tuntang manarimakasih akan Hatalla.

⁷Ije biti mahin jaton bara itah je belom akan arepe kabuat; tuntang ije biti mahin jaton bara itah je matei akan arepe kabuat.

⁸Amon itah belom, itah belom akan Tuhan. Tuntang amon itah matei, itah kea matei akan Tuhan. Jadi, belom atawa matei, itah toh ain Tuhan.

⁹Kristus jari matei tuntang belom tinai. Jete sababe Ie manjadi Tuhan akan kare oloh belom tuntang akan kare oloh je jari matei kea.

¹⁰ Jadi, Pahari samandiai! Akan en keton manyalan paharin keton je sama-sama ije kapercaya? Tuntang akan en pahari maanggap ie randah? Itah samandiai kareh manaharep Hatalla mangat ihakim.

¹¹ Huang Surat Barasih aton inyurat, “Toto haliai,” koan Tuhan, “gagenep oloh kareh mahingkep manyembah Aku intu taharep-Ku; tuntang genep bitin oloh kareh mangaku je Aku toh Hatalla.”

¹²Jadi genep bitin itah musti mananggong kajarian kare gawin itah akan Hatalla.

¹³Awi te ela itah manyalan sama arep itah. Tapi keleh manggau jalan uka keton ela mawi taloh je tau maningkes atawa mampalayang paharin keton je sama kapercayae.

¹⁴Awi kahinjengku dengan Tuhan Yesus aku yakin jaton taloh je pali; tapi hal te pali akan ije oloh, amon oloh te maanggap jete pali.

¹⁵Tapi amon pahari kuman taloh en-en sampai awi jete ije biti pahari je percaya kapehe ateie, maka pahari jari malalus jete dia tagal sinta. Amon Kristus matei akan ije biti oloh, maka ela manalua oloh te rusak awi taloh je kinan pahari.

¹⁶Tagal te amon aton taloh je bahalap huang keton, ela manalua oloh beken maanggap jete dia bahalap.

¹⁷Basa amon Hatalla marentah pambelom ije biti oloh, en je tau ie kumae atawa mihope, jete dia ie taloh je mambatang. Je mambatang iete oloh te manumon kahandak Hatalla, ateie sanang tuntang manarima kahanjak je inenga Roh Hatalla akae.

¹⁸Oloh je manempo Kristus tumon te, oloh te manyanang atei Hatalla, tuntang irega awi kare oloh beken.

¹⁹Tagal te tintun kahandak itah musti harajur uka[17] mampalembut kare taloh je mimbit kabuah tuntang mandohop sama arep itah.

²⁰Ela, tagal soal panginan, pahari marusak taloh je jari ilalus Hatalla. Kakare panginan puna buah akan indu kinan; tapi amon taloh je kinan pahari te mawi sabab oloh beken badosa, maka pahari basala.

²¹Labih bahalap dia usah kuman isin meto atawa mihop anggor atawa malalus taloh en bewei amon hal te manjadi sabab ije biti pahari je percaya manjadi badosa.

²²Taloh je imercaya pahari te, keleh pahari malalus jete intu taharep Hatalla bewei akan arep pahari kabuat. Oloh je jaton alasan uka mangkeme basala dengan taloh je ingkemee bujur, oloh te salamat.

²³Tapi oloh je mangkeme bembang kuman taloh en-en, tapi rahian kuman jete kea, oloh te inyalan awi Hatalla; basa oloh te dia malalus jete manumon kapercayae tahiu taloh je bujur tuntang je sala. Tuntang en bewei je ilalus oloh dia awi kapercaya jete dosa.