Read Ngaju ROMA 15 Bible Online

ROMA 15 - Ngaju bible

ROMA 15

¹Itah je buju-bujur percaya dengan taloh je imercaya itah, keleh sabar dengan kare kabehat atei ewen je balemo kapercayae. Ela itah handak manyanang arep itah kabuat bewei.

²Tapi genep bitin itah musti manyanang atei kare paharin itah akan indu kahalap ewen, mangat kapercaya sasar mandahang.

³ Basa Kristus mahin jaton manirok kasanang akan arepe kabuat. Huang Surat Barasih tarasurat kalotoh, “Kakare auh oloh je mamapa Ikau jari buah aku.”

⁴Kakare taloh je tarasurat huang Surat Barasih jete hapa majar itah. Basa auh ajar je inarima itah bara Surat Barasih mawi itah baketep tuntang abas sampai itah tau manaharep Hatalla.

⁵Keleh Hatalla te je manenga kaketep atei tuntang ampong akan olon, mandohop keton uka keton belom dengan hinje atei, manumon sonto ain Kristus Yesus.

⁶Huang kahinjen atei pahari handiai tau haya-hayak manarima Hatalla, Bapa Tuhan itah Yesus Kristus.

⁷Tagal te keleh kare pahari manarima sama arep dengan sanang atei sama kilau Kristus kea manarima keton uka manara Hatalla.

⁸Basa, keleh mingat, Kristus jari manyang oloh Yehudi uka mamparahan je Hatalla te puna toto malalus kare janjin Aie dengan tato hiang itah.

⁹ Yesus kea manjadian bangsa beken uka manara Hatalla tagal kahalap atei Aie dengan ewen. Huang Surat Barasih tarasurat kalotoh, “Tagal te aku handak manara Ikau intu bentok kare bangsa, aku kareh manyanyi tara akan aran Aim.”

¹⁰ Aton kea tarasurat kalotoh, “Keleh keton hanjak dengan ungkup ain Hatalla je iintih, o kare bangsa!”

¹¹ Tuntang jetoh kea, “Tara Hatalla ain kare bangsa oloh samandiai, keleh oloh handiai manara Ie!”

¹² Tuntang jetoh je insanan awi Yesaya, “Bara turonan Isai kareh lembut ije biti je tau marentah kare bangsa; Dengae te kea kare bangsa te bara kaharap.”

¹³Hatalla te eka kaharap keton. Keleh Ie manyuang atei keton hapan kakare kahanjak tuntang kadamai awi keton percaya Dengae, uka awi kuasan Roh Hatalla keton sasar harap dengan Hatalla.

¹⁴Paharingku samandiai! Aku percaya are toto taloh je bahalap intu keton. Keton mahin mangatawan kare taloh handiai tuntang tau majar sama arep keton kea.

¹⁵Tapi tahiu pire-pire hal, aku mampingat keton hapan katukas auhku huang surat toh, awi Hatalla jari manenga akangku gawi te.

¹⁶Ie jari manampa aku manjadi jipen Kristus Yesus uka inyoho akan kare bangsa oloh je dia Yehudi. Tuntang aku malaluse kilau imam, je mambarita Barita Bahalap bara Hatalla, mangat kare oloh je dia Yehudi manjadi kilau parapah akan Hatalla je tau inarima Awie. Keleh Roh Hatalla manampa ewen manjadi ije parapah je mambatang akan Hatalla.

¹⁷Jadi, awi aku jari ije dengan Kristus Yesus, maka aku tau mangkeme tamam tagal gawingku je akan Hatalla.

¹⁸Aku bahanyi hakotak kalote baya tahiu taloh je jari ilalus Kristus mahalau aku je mawi kare oloh je dia Yehudi taat dengan Hatalla. Aku malalus jete hapan kare kotak tuntang hapan gawi,

¹⁹je impahayak awi kare taloh heran tuntang taloh je dia puji helo; uras taloh te manjadi awi kuasan Roh Hatalla. Barita Bahalap tahiu Kristus jari imbaritaku lepah akan kare oloh, nampara bara Yerusalem sampai akan Ilirikum.

²⁰Kahimat ateiku iete mangabar Barita Bahalap bara Hatalla hong kare eka intu kueh oloh hindai mahining tahiu Kristus. Awi aku dia handak mamangun gawi hunjun galang je iingkes oloh beken.

²¹ Huang Surat Barasih tarasurat, “Kare oloh je hindai puji manarima barita tahiu Ie, kareh mite; tuntang ewen je hindai puji mahining, kareh harati.”

²² Jete bukue aku jari kinjap ihambang uka maja manalih keton.

²³Tapi toh gawingku hong kare eka te jari hapus. Banyelo-nyelo katahie aku handak manalih keton.

²⁴Kareh amon aku mahalau lewun keton intu panjalanangku akan Spanyol, aku harap tau hasondau dengan keton tuntang hanjak hanjulo dengan keton. Limbah te aku harap keton tau mandohop aku akan jalanangku manalih Spanyol te.

²⁵ Tapi toh aku handak akan Yerusalem uka mimbit bantuan akan ungkup ain Hatalla intu hete.

²⁶Basa kare ungkup hong Makedonia tuntang Akhaya jari pakat uka manenga sumbangan akan kare pahari je belom susah intu marak ungkup ain Hatalla hong Yerusalem.

²⁷ Dengan sanang atei ewen manukas uka malalus jete. Puna dengan katotoe ewen patut mandohop kare pahari je belom susah hong Yerusalem te; basa puna bara kare oloh Yehudi kea ih kare oloh je dia Yehudi te jari manarima kare berkat bara Hatalla. Jadi, kare oloh je dia Yehudi te patut kea mandohop kare oloh Yehudi dengan kare berkat ramon kalunen.

²⁸Amon aku jari lepah mahapus gawingku toh, tuntang manyarah akan ewen hong Yerusalem sumbangan je jari inampunan te, maka aku kareh haguet manalih Spanyol mahalau lewun keton.

²⁹Amon aku dumah manalih keton, pasti aku dumah dengan are berkat bara Kristus akan keton.

³⁰Tagal Tuhan itah Yesus Kristus, tuntang tagal asi je inenga Roh Hatalla, aku balaku nyame-nyame dengan keton, keleh keton omba balakudoa toto-toto hayak dengangku intu Hatalla tagal aku.

³¹Keleh balakudoa mangat Hatalla malapas aku bara lengen kare oloh je dia percaya hong Yudea, tuntang mangat gawingku tau mimbit sumbangan akan Yerusalem inarima dengan sanang atei awi ungkup Hatalla intu hete.

³²Maka kalote, amon ingahandak Hatalla, aku tau dumah manalih keton dengan sanang atei. Tuntang aku kareh mangkeme iampong hong marak keton.

³³Keleh Hatalla, je manenga kasanang akan olon, mampahayak pahari handiai. Amen.