Read Ngaju ROMA 16 Bible Online

ROMA 16 - Ngaju bible

ROMA 16

¹Aku handak keton kasene dengan paharin itah, Febe. Ie mandohop ungkup hong Kengkrea.

²Tarima ie kilau ije biti oloh bara ungkup Tuhan. Puna kalote kare oloh ije percaya dengan Hatalla musti hatarima sama arepe. Dohop ie, amon ie balaku pandohop bara keton, awi ie kabuat jari mandohop are oloh — tatame aku kea.

³ Keleh manyampai tabengku akan Priskila tuntang Akwila, kare kawalku je sama-sama bagawi akan Kristus.

⁴Ewen karenga matei awie handak manyalamat aku. Aku batarimakasih dengan ewen — tuntang dia ie aku bewei, tapi uras ungkup kare bangsa beken je dia Yehudi kea manarimakasih dengan ewen.

⁵Nyampai kea tabengku akan ungkup je hapumpong intu human ewen. Tabe akan Epainetos je inyintaku. Ie te oloh je sola-solake hong Asia je percaya dengan Kristus.

⁶Tabengku kea akan Maria. Ie jari bagawi kalote kapahame akan keton.

⁷Nyampai kea tabengku akan Andronikus tuntang Yonias.[18] Ewen te ije suku dengangku tuntang puji tame penjara haya-hayak dengangku. Helo bara aku percaya dengan Kristus, ewen jari labih helo percaya. Ewen te basewut hong marak kare rasul.

⁸Tabe akan Amplias, je inyintaku basa ie jari sama-sama dengangku hinje dengan Tuhan.

⁹Nyampai tabengku akan Urbanus, kawal itah je bagawi haya-hayak dengan itah akan Kristus. Hormatku kea akan Stakhis je inyintaku.

¹⁰Tabe akan Apeles. Kaketep ateie dengan Kristus jari gitan buktie. Tabe kea akan keluarga Aristobulus,

¹¹tuntang akan Herodion. Ie te ije suku dengangku. Tabe kea akan kare pahari je sama huang kapercaya huang keluarga Narkisus.

¹²Tabengku akan Tripena tuntang Triposa je bagawi paham manyang Tuhan, tuntang akan Persis je inyintaku. Ie kea jari bagawi paham akan Tuhan.

¹³ Tabe akan Rupus tuntang indue, je akangku kilau induku kabuat. Rupus te oloh paintih Tuhan je paham inara.

¹⁴Nyampai tabengku akan Asinkritus, Plegon, Hermes, Patrobas, Hermes, tuntang pahari handiai je sama kapercaya je aton dengan ewen.

¹⁵Tabe akan Pilologus tuntang Yulia; akan Nereus tuntang paharie je bawi; akan Olimpas tuntang akan kakare oloh percaya je aton sama-sama dengan ewen.

¹⁶Keleh hatabe dengan kaheret atei kilau oloh hampahari sama-sama Kristen. Kakare ungkup Kristus manyampai taben ewen akan kare pahari handiai.

¹⁷Pahari handiai! Aku balaku nyame-nyame: bua-buah ih dengan kare oloh je mampalembut kapusit tuntang manderoh kapercayan oloh dengan Tuhan. Hal te hakalawan dengan taloh je jari iajar akan keton. Ngejau arep keton bara kare oloh kilau te.

¹⁸Basa kare oloh je mawi taloh kalote dia bagawi akan Kristus Tuhan itah, malengkan uka maluput angat kipen atei ewen kabuat. Dengan kataun ampie tuntang kare auh je manis, ewen mamikir kare oloh je dia katawan taloh en-en.

¹⁹Kakare oloh uras jari katawan kaketep atei keton dengan auh ajar tahiu Barita Bahalap je bara Hatalla. Tuntang aku hanjak tagal hal te tahiu keton. Aku handak uka keton pintar-harati hong kare taloh je bahalap, tuntang humong hong kare taloh je papa.

²⁰Hatalla je manenga kadamai akan olon, kareh bajeleng mingkes setan penda kuasan keton tuntang mamparotek ie. Keleh kare pahari harajur imberkat awi Yesus Kristus Tuhan itah![19]

²¹ Timoteus, kawalku, manyampai tabe akan keton. Kalote kea Lukius, Yanson tuntang Sosipatrus, ewen te ije suku dengangku.

²²Je manyurat surat toh iete aku, Tertius. Kilau oloh hampahari aku manyewut tabe salamat akan keton.

²³ Gayus mangirim tabe akan keton. Aku melai baramalem intu humae tuntang ungkup ikei kea sombayang intu hete. Erastus, kapala keuangan lewu, mangirim tabe akan keton. Kalote kea paharin itah Kwartus. [

²⁴Keleh Tuhan itah Yesus Kristus mamberkat pahari handiai. Amen.]

²⁵Tara akan Hatalla! Ie je kuasa mampaabas kapercayan pahari handiai hatontong dengan Barita Bahalap bara Hatalla je jari imbaritaku tahiu Yesus Kristus. Aku mangabar barita te sama kilau je imparahan awi Hatalla; iete tahiu rencana Hatalla je jari baratu-ratus nyelo katahie jaton oloh katawae.

²⁶Tapi toh, tagal parentah Hatalla je katatahie, rencana te jari imparahan tuntang insanan akan kare bangsa oloh samandiai mahalau kare surat nabi, uka ewen handiai percaya tuntang taat dengan Hatalla.

²⁷Ie te Hatalla je tunggal, Ie je paham kapintar-kaharatin Aie. Keleh Ie inggatang ganto-gantong sampai katatahie mahalau Yesus Kristus! Amen. [20] Hormat bara ikei, Paulus, rewar Kristus Yesus