Read Ngaju ROMA 2 Bible Online

ROMA 2 - Ngaju bible

ROMA 2

¹ Tagal te pahari handiai, eweh kea pahari sampai pahari handak manyalan oloh beken? Pahari dia olih en-en akan mambela arep! Basa amon pahari manyalan oloh beken padahal pahari kabuat je malalus gawi je sama kilau ewen, maka pahari mawi hukuman buah arep pahari kea.

²Itah katawan amon Hatalla mahukum oloh je mawi gawi sama kilau te, kaputusan Hatalla te bujur.

³Tapi keton, pahari handiai, keton kabuat kea malalus kare taloh je indawa keton mawi oloh beken! Tuntang keton manyangka keton olih lapas bara hukuman Hatalla?

⁴Atawa keton maanggap enteng atei Hatalla je pamasi tuntang kasabar Aie je paham hai te? Pasti keton katawan je Hatalla mamparahan kahalap atei Aie awi Ie handak uka keton hobah bara kare dosan keton.

⁵Tapi keton batekang atei keton tuntang dia maku hobah. Tagal te keton kabuat ih je mawi hukuman akan arep keton sasar babehat hong Andau Kiamat, amon Hatalla mamparahan kalaite tuntang manukas hukuman.

⁶ Awi Hatalla handak mambaleh genep bitin oloh tumon kare gawie.

⁷Hatalla manenga pambelom je bujur tuntang katatahie akan ewen je baketep toto malalus kahalap uka mandino taloh je tinduh, je paham ihormat tuntang je katatahie.

⁸Tapi kare oloh je manirok arepe kabuat tuntang dia maku mamenda Hatalla, tapi manumon taloh je papa, kare oloh te kareh buah kalait Hatalla je paham.

⁹Gagenep oloh je rajin mawi kapapa kareh buah kapehe tuntang kajake; oloh Yehudi helo, limbah te kare bangsa beken.

¹⁰Tapi oloh samandiai je rajin malalus kahalap kareh mandino katinduh tuntang hormat tuntang salamat bara Hatalla; oloh Yehudi helo, limbah te kare oloh bangsa beken.

¹¹ Basa Hatalla mawi gawie sama akan oloh handiai.

¹²Kare bangsa beken badosa marak jaton katawan hukum agama ain oloh Yehudi. Jadi ewen ihukum luar bara hukum te. Tapi kare oloh Yehudi badosa limbah mangatawan hukum te; tagal te ewen inuntut kea hagalang hukum te.

¹³Basa oloh bahalap haluli dengan Hatalla, dia awi oloh te jari mangatawan hukum agama ain oloh Yehudi, malengkan awi ie malalus taloh je tarasurat huang hukum te.

¹⁴Kare oloh bangsa beken dia mangatawan hukum agama ain oloh Yehudi. Tapi amon awi kahandak ewen kabuat ewen malalus taloh je irentah awi hukum te, atei ewen kabuat manjadi hukum akan ewen, aloh ewen dia mangatawan hukum agama ain oloh Yehudi.

¹⁵Hadat dasar ewen mamparahan taloh je irentah awi hukum te tarasurat intu huang atei ewen. Pangingat atei ewen mahin mambukti hal te, basa ewen kabuat kanateke inyalan tuntang kanateke imbujur awi tirok ewen.

¹⁶Kalote kea akan manjadi kareh hong andau je jari inukas te. Hong andau te — manumon Barita Bahalap je jari imbaritaku — mahalau Yesus Kristus, Hatalla kareh mahakim kare taloh je basilim je aton huang atei tuntang tirok oloh handiai.

¹⁷Tapi toh kilen auhe tahiu kare pahari kabuat? Pahari mangaku arep oloh Yehudi? Pahari bahapang dengan hukum agama Yehudi tuntang pahari mangekeme tamam tagal hubungan pahari dengan Hatalla.

¹⁸Pahari mandino kare tanda bara hukum te sampai pahari mangatawan kare kahandak Hatalla tuntang tau manukas je kueh taloh je bahalap.

¹⁹Pahari percaya je pahari te pamimpin oloh je babute tuntang kalawa akan ewen je melai huang kakaput;

²⁰Pahari manjadi tukang didik akan kare oloh je randah hadat dasare, tuntang manjadi guru akan kakare oloh je humong. Pahari percaya je huang hukum oloh Yehudi, pahari mandino kakare macam pangatawan tuntang auh ajar je bujur.

²¹Pahari majar oloh beken; nah, mbuhen pahari dia majar arep kabuat? Pahari majar uka oloh ela manakau, padahal pahari kabuat manakau!

²²Pahari majar oloh uka ela habandong, padahal pahari kabuat habandong! Pahari basingi dengan kare hampatong dewa, padahal pahari kabuat manduan kare ramon sarahan bara kare pasah taloh.

²³Pahari mangkeme tamam awi pahari aton mina hukum Moses, padahal pahari mahina Hatalla awi dia manumon hukum Ayue.

²⁴ Huang Surat Barasih tarasurat kalotoh, “Tagal keton, o kare oloh Yehudi, maka aran Hatalla manjadi papa hong marak kare bangsa beken.”

²⁵Amon pahari baketep mamenda hukum agama Yehudi, maka sunat pahari aton kea gunae. Tapi amon pahari dia tau mamenda kare auh je irentah huang hukum te, maka sunat pahari jaton baguna samasinde.

²⁶Amon ije biti oloh je dia Yehudi dia inyunat, mamenda hukum agama Yehudi, en dia Hatalla maanggap ie kilau oloh je jari inyunat?

²⁷Tuntang kare oloh je dia inyunat te kareh manyalan pahari oloh Yehudi, basa pahari mina hukum agama Yehudi tuntang inyunat, tapi pahari malanggar hukum te. Ewen dia inyunat, tapi ewen haream je mamenda hukum agama Yehudi.

²⁸Basa oloh Yehudi je bujur dia ie oloh je baya arae bewei Yehudi; tuntang oloh je toto-toto inyunat dia ie oloh je inyunat baya auh sewute bewei.

²⁹ Tapi oloh Yehudi je bujur iete oloh je ateie basuang hambaruan Yehudi; tuntang sunat je bujur iete sunat hong atei je iawi Roh Hatalla, dia je inyunat huang buku. Oloh je kilau te mandino tara bara Hatalla, tapi dia bara olon.