Read Ngaju ROMA 3 Bible Online

ROMA 3 - Ngaju bible

ROMA 3

¹Amon kalote, en kaontonge manjadi oloh Yehudi? Tuntang en gunae manumon atoran sunat?

²Batantu are gunae! Je mambatang, awi puna akan oloh Yehudi Hatalla mingkes kare auh Hatalla.

³Tapi kilen ampie amon aton belahe oloh Yehudi je dia baketep? En tagal te Hatalla manjadi dia baketep atei?

⁴ Batantu dia! Basa tarang batantu Hatalla te harajur bujur, aloh kea genep oloh te pananjaro. Huang Surat Barasih tarasurat, “Keleh ikau mangatawan bujur taloh je ingotakm, tuntang ikau manang metoh ikau ihakim.”

⁵Tapi amon kaadilan Hatalla manjadi sasar bakarinah awi itah malalus taloh je dia bujur, en taloh je handak ingotak itah? En Hatalla te dia adil amon Ie mahukum itah? (Auh paisek toh puna buah manumon cara kaolon.)

⁶Dia haliai! Basa amon Hatalla dia adil, kilen ampie Ie tau mahakim kalunen toh?

⁷Tapi amon tagal gawi je dia bujur, taloh je bujur tahiu Hatalla sasar hanjuju sampai ie inara, mbuhen oloh je nguan gawi papa te magon inyalan kilau oloh badosa?

⁸Tuntang mbuhen itah dia tau hamauh, “Keleh itah mawi kapapa mangat lembut kahalap?” Puna aton kare oloh je mahina aku awi koae aku jari hamauh kalote. Kare oloh je kilau te patut ih ihukum awi Hatalla.

⁹Nah, en pandudukan itah kilau oloh Yehudi labih bahalap bara bangsa beken? Dia samasinde![3] Aku jari mansanan aloh oloh Yehudi kalote kea oloh bangsa beken, uras jari inguasa awi dosa.

¹⁰ Kilau je tarasurat huang Surat Barasih, “Ije mahin jaton oloh je bujur,

¹¹Ije mahin jaton oloh je harati, tuntang ije mahin jaton oloh je manyembah Hatalla.

¹²Oloh samandiai jari mangejau arepe bara Hatalla; ewen samandiai jari layang. Ije biti mahin jaton je malalus taloh je bujur; ije biti mahin jaton!

¹³ Balengkong ewen kilau kubur je habangah. Tirok pikir ewen mahasor bara jelan ewen, tuntang totok biwih ewen manyambur auh papa mawi oloh beken, kilau wisan handipe.

¹⁴ Nyaman ewen kontep awi sapa tuntang auh kotok mawi oloh.

¹⁵ Tanjong ewen balias kilau handak mangapehe tuntang mampatei oloh.

¹⁶Kahancor tuntang kasusah inawor ewen hete-hete.

¹⁷Matan ewen babute tahiu jalan pambelom je sanang mangat,

¹⁸ tuntang dia mahormat Hatalla.”

¹⁹Toh itah katawan iete kakare taloh je tarasurat huang hukum agama Yehudi, jete akan kare oloh je aton hong penda parentah hukum te. Maka kalote ije biti mahin jaton oloh je tau manenga alasan en-en hindai tuntang hapus kalunen tau inuntut awi Hatalla.

²⁰ Basa ije biti mahin jaton oloh olih hakadamai dengan Hatalla awi oloh te malalus kare taloh je aton huang hukum agama. Katambalike, hukum agama te baya mamparahan akan olon je olon te badosa.

²¹Tapi toh Hatalla jari mamparahan jalan kilen ampie oloh tau badamai tinai Dengae; tuntang cara jete jaton hubungae dengan hukum agama Yehudi. Kare surat Moses tuntang surat kare nabi puna mangarinah hal te,

²² iete Hatalla mawi olon badamai Dengae, baya amon oloh percaya dengan Yesus Kristus. Hatalla mawi jete akan oloh handiai je percaya dengan Kristus; basa jaton kabekee:

²³Oloh handiai jari badosa tuntang kejau bara Hatalla je handak manyalamat ewen.

²⁴Baya asin Hatalla bewei je inengae kakai bewei, hubungan olon dengan Hatalla manjadi bahalap haluli; carae iete: olon iliwus awi Kristus Yesus.

²⁵Hatalla mangorban Kristus Yesus uka awi pampatei Aie te olon insanan liwus bara kasalan amon ewen percaya Dengae. Hatalla mawie kalote uka mamparahan kaadilan Ayue. Basa hong wayah je jari halau Hatalla jari mawi Arepe sabar dengan kare dosan olon, sampai Ie jaton mahukum ewen.

²⁶Tapi toh Ie manduan tindakan malawan dosa uka mamparahan kaadilan Ayue. Dengan cara te Ie mamparahan Arepe puna bujur; tuntang gagenep oloh je percaya dengan Yesus, iawi Hatalla kilau oloh je jari badamai haluli dengan Hatalla.

²⁷Tagal te jaton tinai alasan akan itah uka mampatamam arep itah. Mbuhen kalote? En awi itah malalus taloh je aton huang hukum agama Yehudi? Dia. Tapi awi itah percaya.

²⁸Basa kasimpulae te kalotoh: oloh, manjadi badamai haluli dengan Hatalla, dia awi ie malalus taloh je aton huang hukum agama Yehudi, malengkan awi ie percaya dengan Yesus Kristus.

²⁹Atawa Hatalla te Hatallan oloh Yehudi bewei? En dia Ie Hatallan kare bangsa beken kea? Iyoh, puna Ie Hatallan bangsa beken kea!

³⁰ Basa Hatalla te baya ije. Ie ih je mawi kare oloh Yehudi olih badamai haluli dengan Hatalla awi ewen percaya. Tuntang Ie kea ih je mawi kare bangsa beken olih badamai haluli dengan Hatalla; jete kea mahin awi ewen percaya.

³¹En rimae jetoh awi itah percaya dengan Kristus itah balalu manganan hukum agama Yehudi? Dia sama sinde! Tagal kapercayan itah te, jete haream je mawi itah marega hukum te.