Read Ngaju ROMA 4 Bible Online

ROMA 4 - Ngaju bible

ROMA 4

¹Amon kalote, en koan itah tahiu Abraham, tato hiang itah te? Kilen ampie panyangkom ayue?

²Amon kare taloh je ilaluse mimbit Hatalla manarima ie kilau oloh je manyanang atei Hatalla, maka aton kea alasan akae uka mampatamam arepe. Tapi ie dia tau tama-tamam intu taharep Hatalla.

³ Huang Surat Barasih tarasurat, “Abraham percaya dengan Hatalla, tuntang tagal kapercayae te ie inarima Hatalla kilau oloh je manyanang atei Hatalla.”

⁴Oloh je bagawi manarima gajih; tuntang gajihe te ianggap kilau ije panenga basa jete hak ayue.

⁵Tapi aton oloh je dia bahapang dengan usahae kabuat; ie manyarah arepe akan Hatalla je mansanan oloh badosa lapas bara kasalan. Hunjun galang kapercaya te Hatalla manarima oloh te manjadi oloh je manyanang atei Hatalla.

⁶Kalote kea manumon tirok pikir Dawid; jete bukue ie manyampai auh salamat akan oloh je jari inarima awi Hatalla kilau oloh je manyanang atei Aie, aloh Hatalla dia manampayah kare gawin oloh te. Dawid hamauh kalotoh,

⁷ “Salamat oloh je kare kasalae iampun tuntang kare kasalae jari ingubur awi Hatalla!

⁸Salamat oloh je kare dosae jaton inuntut awi Tuhan!”

⁹En auh salamat jetoh baya inyampai manintu kare oloh je manumon atoran sunat bewei? Atawa akan kare oloh je dia manumon atoran sunat kea? Jari insanan ikei bara solake, iete Abraham inarima awi Hatalla awi ie manyanang atei Hatalla, awi Abraham percaya dengan Hatalla.

¹⁰Nah, hamparea Hatalla mangarinah hal te? Helo bara Abraham inyunat atawa limbahe? Puna helo bara ie inyunat, dia ie limbahe.

¹¹ Ie inyunat rahian, tuntang sunat ayue te baya kilau tanda je Hatalla jari manarima ie kilau oloh je mampahanjak atei Hatalla awi ie percaya dengan Hatalla. Ie inarima awi Hatalla metoh ie magon hindai manumon atoran sunat. Tuntang Abraham manjadi bapa manumon cara roh akan oloh handiai je percaya dengan Hatalla, tuntang je tagal te jari inarima awi Hatalla kilau oloh je manyanang atei Aie, aloh ewen dia manumon atoran sunat.

¹²Abraham kea kilau bapa rohani akan kare oloh je omba atoran sunat. Ie bapa rohani ewen dia baya awi ewen omba atoran sunat, tapi awi ewen kea belom hong kapercaya dengan Hatalla, sama kilau Abraham hong katika ie hindai belom omba atoran sunat.

¹³ Hatalla hajanji dengan Abraham tuntang dengan turonae, iete Abraham akan manjadi oloh je tempon kalunen toh. Hatalla hajanji kalote dia awi Abraham taat dengan hukum agama Yehudi, tapi awi ie percaya dengan Hatalla, awi ie manyanang atei Hatalla.

¹⁴ Basa amon baya kare oloh je taat dengan kare hukum agama Yehudi bewei je manarima taloh je injanji awi Hatalla, maka kapercaya dengan Hatalla jaton baguna samasinde, tuntang janjin Hatalla mahin dia baguna samasinde.

¹⁵Hukum agama Yehudi mampalembut hukuman Hatalla. Tapi amon hukum jaton, maka pelanggaran mahin jaton kea.

¹⁶ Jadi janjin Hatalla te inggalang awi kapercaya dengan Hatalla. Jete manjadi jaminan akan kakare turonan Abraham iete janji te inenga akan ewen kilau ije panenga je inenga bewei bara Hatalla; dia baya akan ewen je taat dengan hukum agama Yehudi bewei, tapi kea akan ewen je percaya dengan Hatalla sama kilau Abraham percaya Dengae. Basa Abraham te bapa itah samandiai secara roh.

¹⁷ Basa Hatalla hamauh kalotoh dengan Abraham, “Aku jari manjadian ikau manjadi bapa akan kare bangsa.” Kalote Hatalla manenga janji te akan Abraham. Tuntang Abraham percaya Dengae. Ie te Hatalla je mambelom oloh matei; ie te kea Hatalla je hapan auh Aie bewei mawi taloh je dia puji aton manjadi aton.

¹⁸ Abraham tetep kea percaya tuntang tetep harap aloh kaharap jari jaton hindai. Tagal te ie manjadi bapa ain are bangsa. Kilau je tarasurat huang Surat Barasih, “Turonam akan manjadi are toto.”

¹⁹ Abraham katika te katawan je ie dia olih hindai manuron turonae awi bitie jari dia olih en-en, awi umure jari tokep saratus nyelo, indahang tinai Sarah kabalie te tamanang. Mahin kapercayan Abraham jaton tendur.

²⁰Ie tetep percaya tuntang dia bembang dengan janjin Hatalla. Kapercayae manjadi sasar dehen haream, sampai ie manara-mahormat Hatalla.

²¹Ie percaya toto je Hatalla tau malalus taloh je jari injanji Hatalla akae.

²²Jete bukue Abraham inarima awi Hatalla awi ie manyanang atei Hatalla.

²³Auh kotak, “Inarima awi ie manyanang atei Hatalla” inyurat dia baya akan Abraham kabuate bewei,

²⁴tapi akan itah kea. Itah kea akan inarima awi itah mampahanjak atei Hatalla, basa itah percaya dengan Hatalla je mambelom Yesus, Tuhan itah, bara pampatei.

²⁵ Yesus te jari inyarah uka impatei tagal kare dosan itah; palus Ie imbelom haluli awi Hatalla uka itah badamai tinai dengan Hatalla.