Read Ngaju ROMA 6 Bible Online

ROMA 6 - Ngaju bible

ROMA 6

¹Amon kalote, en taloh je koan itah? En itah musti jua-juan mawi dosa mangat Hatalla sasar sinta itah?

²Batantu dia! Dosa dia tinai bara kuasa hunjun itah, jadi, kueh tau itah raju-rajur belom sambil mawi dosa?

³En kare pahari katawan je hong katika itah impandoi, itah impahinje dengan Kristus Yesus? Jetoh rimae itah impahinje Dengae huang pampatei Aie.

⁴ Hapan pampandoi te, itah ingubur hayak dengan Kristus tuntang omba matei haya-hayak Dengae, mangat sama kilau Kristus imbelom bara pampatei awi kuasan Bapa je tinduh-barasih, kalote kea itah tau mahoroi ije pambelom je taheta.

⁵Amon itah jari manjadi ije dengan Kristus awi itah omba matei hayak Dengae, itah kareh manjadi ije Dengae kea awi itah omba imbelom haluli sama kilau Ie.

⁶Itah mangatawan je sipat itah je usang kilau olon jari impatei haya-hayak dengan Kristus hong kayu sampalaki mangat kuasan sipat itah je badosa te impahancor; maka kalote itah dia hindai manjadi jipen dosa.

⁷Basa amon ije biti oloh matei, oloh te ilapas bara kuasan dosa.

⁸Amon itah jari matei hayak dengan Kristus, itah percaya itah kea akan belom hayak Dengae.

⁹Basa itah katawan Kristus jari imbelom bara pampatei tuntang Ie dia akan matei tinai, pampatei jari jaton hindai kuasae hunjun Ie.

¹⁰Pampatei je ingkeme Kristus iete pampatei akan dosa. Jete jari manjadi sinde bewei akan sampai katatahie. Tuntang pambelom je ihoroi wayah toh jete pambelom akan Hatalla.

¹¹Keton musti kea maanggap arep keton matei akan dosa, tapi belom hong hubungan je tokep dengan Hatalla mahalau Kristus Yesus.

¹²Ela tinai manalua dosa manguasa pambelom keton hong kalunen toh, uka pahari ela manumon kahandak pahari je papa.

¹³Ela kea pahari manyarah ramon bitin pahari akan kuasan dosa uka ingguna akan kahandak je papa. Tapi sarah bitin pahari akan Hatalla kilau oloh je jari iindah bara pampatei akan pambelom. Sarah arep keton lepa-lepah akan Hatalla mangat ihapan akan malalus kahandak Hatalla.

¹⁴Dosa dia tau manguasa keton, basa keton dia tinai belom penda hukum agama Yehudi tapi penda sintan Hatalla.

¹⁵Toh, en kajariae? En tau itah badosa basa itah dia hindai penda kuasan hukum agama Yehudi, malengkan penda kuasan sintan Hatalla? Dia samasinde!

¹⁶En keton katawan amon keton manyarah arep keton akan ije biti oloh uka malalus kahandake maka keton jadi jipen oloh je inumon keton auhe te — en te jipen dosa je mimbit keton akan pampatei, atawa jipen je taat dengan Hatalla, tuntang tagal te badamai haluli dengan Hatalla.

¹⁷Tapi tarima kasih akan Hatalla! Basa bihin keton manjadi jipen dosa, tapi toh keton hapan sakalepah atei mamenda auh ajar je bujur je jari inenga akan keton.

¹⁸Keton jari ilapas bara dosa, tuntang toh manjadi jipen akan kahandak Hatalla.

¹⁹Awi kaharatin keton magon balemo, aku mahapan paribasa jipen uka labih murah akan keton haratie. Bihin keton manyarah arep keton lepah kilau jipen akan kare taloh je papa akan kare kahandak je papa. Kalote kea metoh toh keleh keton manyarah arep keton lepah kilau jipen akan kahandak Hatalla iete tantai akan kare kahandak Hatalla.

²⁰Katika keton ihajipen awi dosa, keton dia inguasa awi kahandak Hatalla.

²¹Hong katika te en ontong je inarima keton bara kare taloh je wayah toh keton mahamen malaluse? Kare taloh gawi te baya mimbit pampatei!

²²Tapi toh keton jari ilapas bara dosa, tuntang manjadi jipen Hatalla. Kaontong keton iete belom baya akan Hatalla tuntang hal te mimbit pambelom je bujur tuntang katatahie.

²³Basa pampatei jete upah dosa; tapi pambelom je bujur tuntang katatahie hinje Kristus Yesus Tuhan itah jete panenga je inenga Hatalla kalote bewei.