Read Ngaju ROMA 7 Bible Online

ROMA 7 - Ngaju bible

ROMA 7

¹Pahari handiai! Pahari handiai jari mangasene hukum. Jadi, keton katawan je kuasan hukum te mahunjun oloh, jete manjadi baya katahin oloh te magon belom.

²Ije biti oloh bawi je aton banae, paribasae, leket dengan banae awi hukum katahin banae magon belom. Amon banae matei, sawae te lapas bara hukum je mameteng ie dengan kabalie.

³Amon oloh bawi te belom dengan oloh hatue beken katika banae magon belom, maka oloh bawi te inyewut habandong. Tapi amon banae matei, maka manumon cara hukum, oloh bawi te jari bebas. Tuntang amon ie kawin tinai dengan ije biti oloh hatue beken, maka ie dia habandong.

⁴Kalote kea hal je buah keton paharingku. Taharep hukum agama Yehudi keton jari matei, awi keton jari impahinje dengan bitin Kristus tuntang manjadi oloh Ayue je jari imbelom haluli bara pampatei. Ie imbelom bara pampatei mangat itah manjadi baguna akan Hatalla huang pambelom itah.

⁵Basa bihin itah belom manumon kare sipat olon. Hong katika te kare kahandak je badosa, je lembut awi aton hukum agama, marentah huang arep itah. Jete bukue itah malalus kare hal je kajariae akan pampatei.

⁶Tapi toh itah dia hindai injarat huang hukum agama Yehudi. Itah jari matei taharep hukum je bihin manguasa itah. Itah dia tinai manempo dengan cara je usang, manumon hukum je inyurat. Toh itah manempo manumon cara je taheta je imparahan awi Roh Hatalla akan itah.

⁷ Amon kalote en taloh je koan itah? En hukum agama Yehudi te papa? Batantu dia! Tapi hukum jete je majar aku mangasene dosa. Aku dia tau katawan en rimae je bakoho te, jaka dia hukum agama je manyewut “Ela bakoho.”

⁸Mahalau hukum agama, dosa sampet mampalembut kakare macam kipen je bakoho huang ateiku; basa amon hukum agama jaton, maka dosa mahin matei.

⁹Bihin aku mahin belom dia mahapan hukum agama. Tapi katika hukum agama lembut, dosa nampara belom

¹⁰tuntang aku matei. Maka hukum agama te je solake ingahandak uka manenga pambelom, salenga mimbit pampatei haream akangku.

¹¹ Awi mahalau hukum agama te, dosa sampet manipu tuntang mampatei aku.

¹²Hukum agama asale bara Hatalla, tuntang gagenep parentah huang hukum te panumahe bara Hatalla, jadi adil tuntang bahalap.

¹³Nah, en jete rimae je bahalap te mampadumah pampatei akangku? Batantu dia! Dosa te je mampadumah pampatei te. Awi mahapan je bahalap, dosa mimbit pampatei akangku, basa kare sipat dosa gitan tarang batantu. Mahalau kare parentah Hatalla, maka gitan toto kapaham kapapan dosa.

¹⁴Itah katawan hukum agama Yehudi asale bara Roh Hatalla; tapi aku toh oloh je balemo. Aku jari injual uka manjadi jipen dosa.

¹⁵ Basa aku kabuat dia harati taloh gawingku. Kare taloh je handak iawiku, jete dia aku mawie; tapi kare taloh je inyingiku, jete haream je iawiku.

¹⁶Nah, amon aku malalus taloh je hakalawan dengan kahandakku, jete rimae aku mangaku hukum agama Yehudi te bahalap.

¹⁷Jadi, sapunae dia ie aku hindai je malalus jete, malengkan dosa je manguasa aku.

¹⁸Aku katawan ije mahin jaton taloh je bahalap huang arepku; iete intu huang lagun ayungku kilau olon. Basa aton kahandak huang aku uka malalus kahalap, tapi aku dia olih malaluse.

¹⁹Aku jaton malalus taloh bahalap je handak ilalusku; katambalike aku malalus kare taloh je papa, je aku dia handak malaluse.

²⁰Amon aku malalus kare taloh je aku dia handak malaluse, jete rimae dia ie aku je malalus kare hal te malengkan dosa je manguasa aku.

²¹Jadi, aku manduan kasimpulan iete hukum jetoh je manguasa taloh handiai: iete amon aku handak malalus taloh je bahalap, maka baya taloh je papa ih je lembut huang aku.

²²Huang ateiku aku rajin dengan hukum Hatalla,

²³tapi aku katawan je huang arepku aton tinai hukum beken je mimbing taloh handiai — iete hukum je hakalawan dengan hukum je inarima awi tirok ateiku. Jete bukue aku leket intu hukum dosa je mimbing taloh handiai huang arepku.

²⁴Nah, ampin arepku toh iete kalotoh: aku baketep mamenda hukum Hatalla mahapan tirok ateiku, tapi hapan sipat kaolon ayungku aku manyarah dengan dosa. Lalehan kacalakae aku toh! Eweh handak manyalamat aku bara bitingku toh je mimbit aku akan pampatei? Tarima kasih akan Hatalla! Ie handak manyalamat aku mahalau Yesus Kristus.