Read Ngaju 1 KORINTUS 1 Bible Online

1 KORINTUS 1 - Ngaju bible

1 KORINTUS 1

¹ Pahari handiai ungkup Hatalla hong Korintus! Pahari jari intehau awi Hatalla uka manjadi ungkup Ayue awi pahari puna ain Kristus Yesus, haya-hayak dengan oloh handiai hong kueh bewei eka oloh je manyembah Tuhan itah Yesus Kristus, iete Tuhan ewen tuntang Tuhan itah kea. Aku Paulus, tuntang paharin itah Sostenes, maharap keleh Hatalla Bapa itah tuntang Tuhan Yesus Kristus manenga berkat tuntang kasanang akan keton. Aku manyurat surat toh kilau rasul Kristus Yesus, je iangkat awi Hatalla kabuat tuntang tagal kahandak Ayue kea.

⁴Aku harajur manarimakasih akan Hatalla tahiu keton, awi keton jari manarima asi bara Hatalla mahalau Kristus Yesus.

⁵Awi keton jari manjadi oloh ain Kristus, maka pambelom keton tatau huang kakare hal. Pangatawan keton tahiu taloh handiai paham handalem, tuntang keton pintar majar pangatawan te.

⁶Jete mamparahan je barita tahiu Kristus jari melai dehen huang atei keton,

⁷sampai ije mahin jaton keton tapas berkat, pandehan keton mentai Tuhan itah Yesus Kristus dumah tuntang gitan awi oloh handiai.

⁸Kristus kabuat kareh manjamin keton sampai kalepahe; uka hong andau ie dumah haluli, keton inyondau jaton bara kapapa.

⁹Hatalla puna toto tau imercaya. Ie te Hatalla je jari mantehau keton uka manjadi ije dengan Anake, iete Yesus Kristus Tuhan itah.

¹⁰Pahari handiai! Huang aran Tuhan itah Yesus Kristus, aku balaku uka keton handiai pakat ije atei; uka ela aton kapusit hong marak keton. Keleh keton hinje bulat, hinje tirok atei.

¹¹Basa kare oloh bara keluarga Kolos mansanan akangku je keton hakalawan sama arep keton.

¹² Je imaksudku iete hong marak keton aton belahe hamauh, “Aku omba Paulus,” aton kea je hamauh, “Aku omba Apolos,” je beken hamauh, “Aku omba Petrus,” je beken tinai hamauh, “Aku omba Kristus.”

¹³Dia mungkin Kristus te imbagi-bagi![1] Paulus dia matei inyampalaki akan keton! Keton mahin dia impandoi uka manjadi oloh ain Paulus.

¹⁴ Ontong, ije biti mahin jaton aku mampandoi keton, beken bara Krispus tuntang Gayus.

¹⁵Ela sampai aton ije biti hamauh je aku jari mampandoi ie mangat manjadi oloh ayungku. (

¹⁶ O, iyoh! Stepanus tuntang keluargae, puna aku je mampandoi ewen. Tapi beken bara te, manumon pangingatku, jaton tinai oloh beken je impandoiku.)

¹⁷Kristus manyoho aku dia uka mampandoi oloh, malengkan uka mangabar Barita Bahalap bara Hatalla; tuntang aku malalus jete mahin dia mahapan kataungku hakotak tumon cara olon, mangat kuasan pampatei Kristus intu kayu sampalaki te dia hayang.

¹⁸Basa akan kare oloh je manintu kabinasa, barita tahiu pampatei Kristus hong sampalaki te kilau taloh je tanjaro. Tapi akan itah je inyalamat awi Hatalla, barita te kilau mamparahan ampin Hatalla mansanan kuasan Aie.

¹⁹ Huang Surat Barasih Hatalla hamauh, “Kapintar-kaharatin oloh pintar kareh irusak-Ku, tuntang kaharatin kare oloh je gantong pangatawae kareh impanihau-Ku.”

²⁰ Nah, en gunae kare oloh pintar te? En gunae ewen je gantong pangatawae? En gunae kare tukang pikir ain kalunen toh? Hatalla jari mamparahan je kapintar-kaharatin kalunen jetoh puna kahumong bewei!

²¹Basa aloh kilen ampie kapintar olon, dia olih mangasene Hatalla mahapan kapintar ayue kabuat. Tapi awi Hatalla puna pintar-harati maka Ie pahias manyalamat kare oloh je percaya Dengae mahalau barita je insanan ikei je ianggap kahumong awi oloh kalunen.

²²Oloh Yehudi manggau taloh heran akan bukti, tuntang oloh Yunani manggau kapintar-kaharatin kalunen jetoh.

²³Tapi itah toh baya mambarita Kristus je matei intu kayu sampalaki. Barita te mangapehe atei oloh Yehudi, tuntang ianggap tanjaro awi kare oloh je dia Yehudi. Tuntang oloh je dia Yehudi maanggap jete kilau kahumong.

²⁴Tapi akan kare oloh je jari intehau awi Hatalla en ie oloh Yehudi atawa dia oloh Yehudi — barita te kilau mamparahan cara Hatalla mansanan kuasan Aie tuntang kapintar-kaharatin Ayue.

²⁵Basa taloh je humong ampie intu Hatalla, jete labih pintar-harati bara kapintar-kaharatin olon; tuntang taloh je ampie balemo intu Hatalla, jete labih dehen bara kaabas olon.

²⁶Pahari handiai! Coba ingat kilen ampie keadaan keton metoh Hatalla mantehau keton. Baya isut bewei bara keton je pintar-harati, je bara kuasa, atawa mondok intu pangkat gantong manumon tampayah olon.

²⁷Basa Hatalla puna tantai ihate mintih oloh je ianggap humong awi kalunen toh, mangat kare oloh pintar manjadi mahamen. Tuntang Hatalla mintih kea oloh je ianggap balemo awi kalunen jetoh, mangat kare oloh je menteng tuntang mamut manjadi mahamen.

²⁸Hatalla mintih oloh je ianggap randah, hina, tuntang oloh je ianggap jaton rimae haream awi kalunen jetoh, mangat Hatalla mampahancor taloh je ianggap tamam awi kalunen.

²⁹Awi kalote maka ije biti mahin jaton oloh tau mampatamam arepe intu taharep Hatalla.

³⁰Hatalla kabuat je mawie mangat pahari manjadi ije dengan Kristus. Mahalau Kristus, itah inampa manjadi pintar-harati. Tuntang mahalau Ie kea Hatalla manampa itah manjadi bahalap haluli Dengae, manampa itah manjadi ungkup Ayue je barasih tuntang Ie mempas itah.

³¹ Jadi, sama kilau je tarasurat huang Surat Barasih, “Oloh je handak tama-tamam, keleh ie tamam angate tagal taloh je ilalus Tuhan.”