Read Ngaju 1 KORINTUS 11 Bible Online

1 KORINTUS 11 - Ngaju bible

1 KORINTUS 11

¹ Keleh keton manyonto aku sama kilau aku kea manyonto Kristus.

²Aku manara keton awi keton harajur mingat aku tuntang manumon auh ajar je inengaku akan keton.

³Tapi aku handak uka keton mangatawan ije hal tinai, iete je manjadi kapala akan genep oloh hatue iete Kristus; je manjadi kapala akan sawae iete banae, tuntang je manjadi kapala akan Kristus iete Hatalla.

⁴Amon ije biti oloh hatue metoh ie balakudoa atawae metoh ie manyampai barita bara Hatalla intu taharep oloh are, ie mahapan tutup takolok, maka oloh te mahina Kristus.

⁵Tuntang amon ije biti oloh bawi metoh ie balakudoa atawa metoh ie manyampai barita bara Hatalla intu taharep oloh are ie dia mahapan tutup takolok, maka oloh bawi te mahina banae je manjadi kapala akae. Jete sama rimae kilau takolok oloh bawi te jari incukur.

⁶Basa amon ije biti oloh bawi dia handak mahapan tutup takolok, labih bahalap balaue te inggunting. Tapi amon ije biti oloh bawi incukur takoloke atawa inggunting balaue, maka jete gawi je mahina akae. Tagal te labih bahalap ie mahapan tutup takolok.

⁷ Oloh hatue dia usah mahapan tutup takolok, awi ie manyaramin ampin Hatalla tuntang kahain Hatalla. Tapi oloh bawi manyaramin kahain oloh hatue,

⁸ basa oloh hatue dia injadian bara oloh bawi, tapi oloh bawi te je injadian bara oloh hatue.

⁹Oloh hatue dia kea injadian akan gunan oloh bawi, tapi oloh bawi injadian akan gunan oloh hatue.

¹⁰Tagal te uka manyanang kare malekat, ije biti oloh bawi musti mahapan tutup takolok kilau tanda je ie te penda kuasan banae.

¹¹Aloh kalote, huang pambelom itah kilau oloh Kristen, oloh bawi dia mendeng kabuate, lapas bara oloh hatue, tuntang oloh hatue dia mendeng kabuate, lapas bara oloh bawi.

¹²Basa oloh bawi je solake injadian bara oloh hatue, tapi limbah te oloh hatue inakan bara oloh bawi; tuntang taloh handiai asale bara Hatalla.

¹³Coba kare pahari kabuat manimbang hal toh: en bahalap ije biti oloh bawi je balakudoa intu Hatalla hong taharep oloh are, dia mahapan tutup takolok?

¹⁴Tumon hadat helo, keton jari iajar, amon oloh hatue je habalau panjang, jete taloh je kurang patut.

¹⁵Tapi amon oloh bawi, balau inenga akae hapan manutup takoloke tuntang balau panjang jete eka karajie.

¹⁶Nah, amon aton oloh je handak hakalawan tahiu hal toh, maka ije ih taloh je tau aku mansanae iete aloh itah toh kalote kea kare ungkup Hatalla je beken, uras mahapan hadat jete huang ungkup; beken bara te jaton.

¹⁷Tahiu jetoh tinai, aku dia manara keton. Pumpong sombayang keton dia mampalua hasil je bahalap, malengkan hasil je dia bahalap.

¹⁸Ije pangkasolake aku mahining huang kare pumpong keton aton kare golongan je hakalawan sama arepe. Tuntang aku mangkeme kabar te aton katotoe.

¹⁹Puna ampie ih amon aton lembut kapusit hong marak keton, uka gitan kareh eweh oloh Kristen je bujur toto.

²⁰Tapi katika keton hapumpong, taloh je iawi keton te dia ie Panginan ain Tuhan.

²¹Awi metoh keton kuman, genep bitin keton hatakian manduan panginan ayu-ayue, sampai aton oloh je jaton mandino taloh en-en, marak awang beken malahan babusau haream.

²²Mbuhen kalote? En pahari jaton huma? Pahari tau kuman mihop intu hete! Atawa pahari handak mahina ungkup ain Hatalla tuntang mampahawen kare oloh je belom susah? En taloh je musti ingotakku akan keton? En aku musti manara keton? Dia! Aku dia handak samasinde manara keton.

²³Basa taloh je iajarku akan keton, jete inarimaku bara Tuhan kabuat: iete hong alem katika Yesus, Tuhan itah indarhaka oloh, Ie manduan rote,

²⁴tuntang limbah te manyewut tarimakasih akan Hatalla tagal rote te, Ie mangiwak-mangiwak rote te hapan lengee, palus hamauh, “Jetoh biting-Ku je inyarah akan keton. Lalus jetoh hapa mingat aku.”

²⁵ Kalote kea limbah jadi kuman, ie manduan cangkir anggor palus hamauh, “anggor jetoh iete janjin Hatalla je taheta, iresmi huang dahang-Ku. Gagenep keton mihop jetoh, lalus jete hapa mingat Aku.”

²⁶Puna gagenep keton kuman rote tuntang mihop anggor jetoh, keton mambarita pampatei Tuhan, sampai Ie dumah.

²⁷Tagal te, oloh je kuman rote ain Tuhan atawa mihop anggor ain Tuhan hapan cara je dia patut, oloh te badosa taharep Tuhan je jari mangorban bitie tuntang dahae.

²⁸Jadi, genep bitin oloh musti mariksa arepe helo, harun ie tau kuman rote tuntang mihop anggor te.

²⁹Basa amon oloh kuman rote tuntang mihop anggor sambil jaton paduli panginan te aton hubungae dengan Tuhan, oloh te kuman tuntang mihop baya manarima hukuman Hatalla akan arepe kabuat.

³⁰Jete sababe are oloh bara marak keton je haban tuntang balemo, tuntang are kea je matei.

³¹Tapi amon itah mariksa arep itah labih helo, itah kareh dia buah hukuman Hatalla.

³²Tapi amon itah ihukum Hatalla, Ie kareh mawi itah hapan cambuk, uka itah ela buah hukum haya-hayak dengan kalunen toh.

³³Tagal te pahari handiai, amon keton hapumpong tuntang kuman Panginan ain Tuhan, keton musti hatunggu sama arep keton.

³⁴Amon aton keton je balau, ie musti kuman helo intu huma. Amon keton mawi hal toh, kare pumpong sombayang keton kareh dia mampadumah hukuman bara Hatalla akan keton. Tahiu kare hal je beken, kareh aku manarange akan keton, amon aku kareh dumah.