Read Ngaju 1 KORINTUS 16 Bible Online

1 KORINTUS 16 - Ngaju bible

1 KORINTUS 16

¹ Toh tahiu duit je handak inyumbang keton akan pahari je sama Kristen, aku manenga tirok uka keton malaluse manumon sonto je iawiku akan kare ungkup hong Galatia.

²Genep andau Minggo, keleh pahari samandiai mambagi duit tumon ampin pandinon genep biti. Ingkes duit te sampai aku dumah, mangat huang katika te dia usah tinai inampunan.

³Kareh amon aku sampai, aku handak manyoho kare oloh je jari imakat awi keton. Aku manenga akan ewen surat pengantar, mangat ewen mimbit duit sumbangan te akan Yerusalem.

⁴Tuntang amon ampie bahalap, aku haguet kea dengan ewen, aku omba haguet haya-hayak dengan ewen.

⁵ Aku handak maja manalih keton limbah mahalau Makedonia, awi aku aton kanahuangku mahalau hete.

⁶Tau kea aku melai hanjulo dengan keton, mungkin katahin wayah sadingen. Limbah te keton tau mandohop aku marajur panjalanangku akan eka beken tinai.

⁷Aku dia handak maja keton baya tende bewei. Amon Tuhan manyoho, aku handak melai tahi kea dengan keton.

⁸ Pandehan te aku handak melai hong lewu toh, lewu Epesus, sampai andau Pentakosta.

⁹Are katika je baguna intu hetoh akan malalus kare gawi, aloh are kea oloh je malawan.

¹⁰ Amon Timoteus dumah, tambang ie bua-buah mangat ie mangkeme hanjak dengan keton, awi ie sama kilau aku kea bagawi akan Tuhan.

¹¹Ela sampai aton oloh je manahagampang ie. Dohop ie mangat ie tau marajur panjalanae haluli manalih aku dengan salamat, awi aku mentai panumahe haya-hayak dengan kare pahari je beken.

¹²Tahiu paharin itah Apolos, jari pire-pire tingkat aku manenga tirok akae mangat ie haya-hayak dengan pahari je beken haguet manalih keton. Tapi ie hindai mangkeme yakin[17] je ie musti haguet metoh toh. Tapi amon aton katikae kareh, batantu ie akan dumah.

¹³Keleh keton barendeng tuntang segah huang pambelom keton kilau oloh Kristen. Keleh keton bahanyi tuntang manjadi abas.

¹⁴Taloh handiai je ilalus keton, keleh keton malaluse dengan sinta.

¹⁵ Pahari batantu kasene Stepanus dengan keluargae; ewen te oloh je pangkasolake manjadi oloh Kristen hong Akhaya. Ewen hapan salepah ateie bagawi baya akan mahaga ungkup Hatalla.

¹⁶Aku manenga tirok dengan katotoe uka keton manumon pimpinan kare oloh je kilau te, hayak kare oloh je beken je bagawi tuntang melayani haya-hayak dengan ewen.

¹⁷Aku hanjak tagal panumah Stepanus, Portunatus tuntang Akhaikus. Akangku ewen te sama kilau gantin keton.

¹⁸Ewen jari mawi ateiku hanjak, sama kilau ewen manyanang atei keton. Kare oloh je kalote patut ihormat.

¹⁹ Kare ungkup hong Asia manyampai tabe akan keton. Akwila tuntang Priskila dengan ungkup je hapumpong intu human ewen mahin mangirim tabe je mangalasot kilau taben oloh Kristen.

²⁰Uras kare pahari intu hetoh manyampai tabe akan keton. Keleh keton hatabe huang sinta manumon cara je sama kilau pahari Kristen.

²¹Aku mandahang hetoh tabe je inyuratku kabuat: Tabe bara aku, Paulus.

²²Oloh je dia sinta Tuhan, keleh ie ihukum Hatalla! Maranatha — Tuhan keleh bajeleng dumah!

²³Keleh Tuhan Yesus mamberkat pahari.

²⁴Impahayak sinta akan pahari handiai je jari percaya huang Kristus Yesus. Hormat ikei, Paulus