Read Ngaju 1 KORINTUS 2 Bible Online

1 KORINTUS 2 - Ngaju bible

1 KORINTUS 2

¹Pahari handiai! Katika aku dumah manalih keton tuntang mambarita akan keton tahiu rencana Hatalla je hindai ingatawan awi kalunen,[2] aku dia mahapan kapintar-kaharatin kalunen toh atawa hakotak mahapan auh je tama-tamam.

²Basa aku jari tukas angat ateiku katahin aku aton hinje keton, aku dia handak mansanan taloh en-en, beken bara tahiu Yesus Kristus; je mambatang tahiu Ie je jari matei intu kayu sampalaki.

³ Katika aku aton hinje keton aku balemo tuntang hagenjeh awi kikeh.

⁴Barita je inyampaiku akan keton dia aku manyampaie hapan kare auh je manis-menyak manumon kapintar-kaharatin olon. Aku manyampai jete hapan cara je mambukti je Roh Hatalla te aton kuasan Aie.

⁵Aku mawie kalote, uka kapercayan keton dengan Kristus dia hagalang kapintar-kaharatin olon, malengkan hagalang kuasan Hatalla.

⁶Aloh kalote, bara marak kare oloh je pambelom roh ayue jari batue, aku puna hakotak tahiu kapintar-kaharati. Tapi kapintar-kaharati jetoh dia ie kapintar-kaharatin kalunen, atawa kapintar-kaharatin kare panguasa jaman jetoh, je kuasae te kareh lilap.

⁷Kapintar-kaharati je handak insanangku iete kapintar-kaharati bara Hatalla. Kapintar-kaharati te dia ingatawan awi kalunen, tapi Hatalla jari manatape akan kasanang itah helo bara kalunen toh injapa.

⁸Ije biti mahin jaton bara kare panguasa jaman jetoh je katawan tahiu kapintar-kaharati te. Basa, paribasae ewen jari mangatawan, batantu ewen dia handak manyampalaki Tuhan je paham kahaie te.

⁹ Hakalawan dengan jete, sama kilau je tarasurat huang Surat Barasih, “Taloh je dia puji inampayah atawa ihining awi olon, tuntang dia puji kea lembut huang tirok olon, jete je inatap awi Hatalla akan kare oloh je sinta Ie.”

¹⁰Tapi[3] Hatalla jari mamparahan jete akan itah mahalau Roh Ayue. Roh Hatalla te manantuani kare taloh handiai, sampai akan kare rencana Hatalla je paling basilim haream.

¹¹Basa je mangatawan taloh huang atei ije biti olon iete roh oloh te kabuat, en dia kalote? Kalote kea tahiu Hatalla. Je mangatawan taloh huang atei Hatalla iete baya Roh Hatalla kabuat!

¹²Tuntang akan itah dia inenga roh kalunen jetoh, malengkan Roh Hatalla, mangat itah mangatawan taloh handiai je jari inenga Hatalla akan itah.

¹³Tagal te, amon ikei manarang kare taloh tahiu Hatalla akan kare oloh je aton Roh Hatalla huang ie,[4] kei dia mansanan jete manumon kapintar-kaharatin olon, malengkan manumon ajar ain Roh Hatalla.

¹⁴Oloh je jaton Roh Hatalla huang ie, dia tau manarima taloh je imparahan awi Roh te. Basa akan oloh te, kare taloh te kilau kahumong bewei. Oloh te dia haratie, awi kare hal te baya tau oloh haratie hapan cara roh.

¹⁵Oloh je aton Roh Hatalla huang ie, tau manarima taloh handiai, tapi ije biti mahin jaton oloh beken je tau manarima Ie.

¹⁶ Huang Surat Barasih tarasurat, “Eweh je katawan tirok Tuhan? Tuntang eweh je tau manasehat Ie?” Itah toh ih je tempon tirok-atei je sama dengan Kristus!