Read Ngaju 1 KORINTUS 3 Bible Online

1 KORINTUS 3 - Ngaju bible

1 KORINTUS 3

¹O keton, sapunae aku dia olih hakotak dengan keton kilau dengan kare oloh je aton Roh Hatalla huang ie. Aku baya tau hakotak dengan keton kilau dengan oloh je magon belom manumon kipen oloh kalunen; sama kilau dengan oloh je magon awau huang kapercayae dengan Kristus.

² Bihin aku tau manenga akan keton panginan awau, dia panginan oloh bakas; basa keton hindai sukup kaabas keton akan jete. Tapi aloh metoh toh mahin keton hindai olih akan jete,

³awi keton magon belom hapan dasar cara olon. Basa amon keton magon bahiri tuntang kalahi sama arep keton, en jete dia mamparahan ampin keton je magon belom manumon dasar olon, kilau kare oloh je dia mangasene Hatalla?

⁴ Amon keton hamauh, “Aku omba Paulus,” tuntang je beken hamauh, “Aku omba Apolos,” en jete dia mamparahan ampin sipat pahari je sama kilau kare oloh kalunen?

⁵Sapunae eweh kea Apolos te? Tuntang eweh Paulus? Ikei toh baya kare ayang Hatalla, je jari mangagalan keton uka percaya dengan Kristus. Ikei baya malalus kare gawi je inyoho Tuhan akan ikei.

⁶ Aku mimbule tuntang Apolos manatae hapan danum tapi Hatalla kabuat ih je mawi taloh imbul te belom.

⁷Jadi je mambatang iete Hatalla, awi Ie je mambelome. Je mimbul tuntang je manatae hapan danum dia mambatang;

⁸kadadue ewen te sama pangkate. Genep biti akan manarima upah manumon kahekae.

⁹Ikei toh kare oloh je sama-sama bagawi akan Hatalla; tuntang keton kilau tana ain Tuhan, Hatalla. Kare pahari sama kilau huma hai ain Hatalla kea.

¹⁰Hapan kapintar je inenga Hatalla, aku kilau tukang pangun huma jari manampa galang akan pangun huma te, tuntang oloh beken mamangun huma hunjun galang te. Genep bitin oloh musti manantuani bua-buah kilen ampie ie mamangun intu hunjun galang te.

¹¹Basa Hatalla kabuat jari manenga Yesus Kristus kilau galang je tunggal akan pangun huma te; jaton galang je beken.

¹²Aton oloh je mamangun hunjun galang te mahapan amas, aton je mahapan perak, aton je mahapan batu permata, aton kea kayu, oru keang atawa kea tampilai.

¹³Gawin genep bitin oloh kareh akan gitan hong katika Kristus dumah haluli. Basa hong andau te apui kareh mawi gawin genep bitin oloh manjadi gitan. Apui kareh mauji tuntang manukas kakorik tuntang kahain regan gawi te.

¹⁴Amon huma je impendeng oloh hunjun galang te tahan apui, oloh te kareh manarima hadiah ayue.

¹⁵Tapi amon gawin oloh te bakeho, ie kareh rugi; ie kabuat kareh salamat tapi sama kilau oloh je balua bulu-bulus bitie mahalau apui.

¹⁶ En pahari katawan je pahari toh Human Hatalla? Tuntang Roh Hatalla te melai huang keton?

¹⁷Amon aton oloh je marusak Human Hatalla, Hatalla mahin kareh marusak oloh te. Basa Human Hatalla te imbaris baya akan Hatalla bewei, tuntang keton toh huma te.

¹⁸Ije biti mahin ela aton oloh je mananjaro arepe kabuat. Amon aton oloh bara marak keton mangkeme arepe pintar-harati manumon tampayah kalunen jetoh, oloh te musti manjadi humong, uka ie toto-toto manjadi pintar-harati.

¹⁹ Basa oloh je pintar-harati manumon tampayah kalunen, jete oloh je humong intu tampayah Hatalla. Huang Surat Barasih tarasurat, “Hatalla manjabak kare oloh pintar-harati huang kapintar ewen kabuat.”

²⁰ Aton kea auh tarasurat kalotoh, “Tuhan katawan je kare tirok oloh je pintar-harati jete uras dia baguna.”

²¹Tagal te, ela sampai aton oloh je lalau mampatamam olon, basa kare taloh handiai uras jari inenga mangat manjadi waris ain keton:

²²Paulus, Apolos, Petrus, kalunen jetoh, pambelom tuntang pampatei, jaman jetoh atawa jaman je kareh dumah, taloh handiai te uras ain keton.

²³Tuntang keton toh ain Kristus, tuntang Kristus ain Hatalla.