Read Ngaju 1 KORINTUS 5 Bible Online

1 KORINTUS 5 - Ngaju bible

1 KORINTUS 5

¹ Sapunae aku jari manarima laporan bara oloh marak keton tahiu gawin karayap je malabien; Aton bara kare pahari je habandong dengan indu tirie. Kare oloh je dia mangasene Tuhan mahin dia malalus taloh je kilau te!

²Aloh kalote, pahari magon gantong atei. Padahal sapunae pahari te musti kapehe atei, tuntang mampalua oloh je mawi gawi macam te bara marak keton.

³Secara kaolon aku toh kejau bara keton, tapi secara hambaruan aku aton intu bentok keton. Jadi ampin gawingku kilau jaka aku aton hong bentok keton, “Huang aran Tuhan Yesus Kristus aku mansanan oloh je jari malalus gawi je kalote kapapae, musti ihukum!” Amon keton hapumpong keleh keton maanggap aku aton hong marak keton, tuntang mahapan kuasan Tuhan itah Yesus,

⁵keton musti manyarah oloh te akan setan mangat bitin oloh te rusak tuntang awi kalote hambaruae inyalamat katika Tuhan dumah haluli.

⁶ Dia patut keton mangkeme tamam. Mungkin keton jari katawan paribasa toh, “Ragi je isut mawi hapus adonan manjadi kembang!”

⁷ Keleh keton manganan helo ragi je usang te, iete ragin dosa, mangat keton manjadi sama kilau tepong wadai je jari iewoi, barasih bara ragin dosa je usang, tuntang aku katawan je keton puna kilau te. Basa pesta Paska ain itah jari tatap, karana Yesus je manjadi kilau tabirin Paska ain itah, jari inyarah.

⁸ Jadi, keleh itah mahaga pesta ain itah te hapan rote je dia iragi, iete rote je manjadi tanda katinduh tuntang taloh handiai je manyanang atei Hatalla. Ela itah mahaga pesta Paska te mahapan rote je inguan hapan ragi usang, iete ragin dosa tuntang kapapa.

⁹Huang suratku je helo, aku mansanan akan keton mangat ela keton marampi oloh parayap.

¹⁰Taloh je koangku toh dia ie oloh parayap atawa bakoho atawa pananjaro atawa panyembah dewa je samasinde dia mangasene Hatalla. Dia! Aku dia manahiu ewen te; basa amon keton musti mangejau arep keton bara ewen, batantu keleh keton balua samasinde bara kalunen toh.

¹¹Je inahiuku toh iete, ela keton marampi arep keton dengan oloh je mangaku arepe oloh Kristen, tapi oloh te parayap, atawa bakoho, panyembah dewa, atawa rajin mamapa oloh beken, atawa pambusau, atawa panakau. Mondok kuman hinje ewen te mahin ela!

¹² Puna toto, urusan ayungku dia handak mahakim oloh je dia Kristen. Hatalla kabuat ih je mahakim ewen. Tapi tahiu kare anak ungkup keton, en dia keton kabuat ih je mahakim ewen? Huang Surat Barasih aton tarasurat, “Keleh keton maharak oloh papa bara marak keton.”