Read Ngaju 1 KORINTUS 7 Bible Online

1 KORINTUS 7 - Ngaju bible

1 KORINTUS 7

¹Toh aku handak hakotak tahiu perkara je inyewut keton huang surat keton. Amon ije biti oloh hatue dia kawin, jete bahalap.[5]

²Tapi uka ie dia tagoda ateie handak mawi kare taloh je dia patut, labih bahalap genep bitin oloh hatue aton sawae kabuat tuntang genep bitin oloh bawi aton banae kabuat.

³Oloh hatue musti malalus kapatut gawie kilau ije biti oloh je aton sawae, tuntang oloh bawi musti malalus kapatut gawie kilau ije biti oloh bawi je aton banae; genep biti malalus kapatut gawie dengan kabalie.

⁴Oloh bawi jaton kuasae dengan bitin ayue kabuat; je kuasa dengan bitin ayue iete banae. Kalote kea oloh hatue jaton kuasae dengan bitin ayue kabuat; je aton kuasae dengan bitin ayue iete sawae.

⁵Ela keton mangejau arep keton bara kabalin keton. Tapi tau kea amon hanjulo asal jete puna jari imakat awi keton due. Awi kalote genep bitin keton tau balakudoa kabuat tuntang jaton inderoh. Tapi limbah te keleh keton haluli tinai manokep kabalin keton. Amon dia kalote, maka keton kareh tau manumon auh roh papa, awi keton jaton kaabas manyarenan kipen keton.

⁶Aku mansanan jetoh dia kilau parentah, tapi kilau nasehat.

⁷Sapunae aku labih rajin jaka oloh uras tau sama kilau aku. Tapi genep biti jari mandino panenga je inukas awi Hatalla. Ije biti aton panenga kalotoh, je beken tinai aton panenga kalote.

⁸Akan kare oloh je hindai kawin tuntang akan kare oloh bawi je jari balo, aku manasehat kalotoh: labih bahalap ewen te tetep belom kabuat kilau aku.

⁹Tapi amon pahari dia olih manyarenan kipen, pahari keleh kawin. Basa labih bahalap pahari kawin bara manyarenan kipen je hagandang.

¹⁰ Akan ewen je jari kawin, aku marentah kalotoh: (Sapunae dia ie aku je manenga parentah toh tapi Tuhan.) Ije biti oloh bawi je jari kawin ela malihi banae.

¹¹Tapi amon ie jari malihie, ie musti tetep dia babane, atawa ie haluli dengan banae. Tuntang ije biti oloh hatue dia tau manganan sawae.

¹²Akan ewen je beken, aku manasehat kalotoh: — Jetoh nasehat ayungku kabuat, dia ain Tuhan — amon ije biti oloh Kristen kawin dengan ije biti oloh bawi je dia percaya dengan Kristus, tuntang sawae te handak belom hinje dengae, oloh te dia tau manganan sawae.

¹³Tuntang amon ije biti bawin oloh Kristen kawin dengan ije biti oloh je dia percaya dengan Kristus, tuntang banae te handak belom hinje dengae, maka oloh bawi te dia tau manganan banae.

¹⁴Basa banae je dia percaya te inarima uka manjadi ungkup ain Hatalla tagal pangawie dengan sawae je jari manjadi oloh ain Hatalla. Kalote kea sawan oloh je dia percaya inarima uka manjadi anak ungkup ain Hatalla, tagal pangawie dengan banae je jari manjadi oloh ain Hatalla. Amon dia kalote, kare anak ewen batantu kilau kare anak oloh kapir, padahal kare anak ewen te ianggap kilau anak ungkup ain Hatalla.

¹⁵Tapi amon oloh je dia percaya te malihi sawae atawa banae je Kristen, ela manahan ie. Huang hal toh pahari bawi atawa pahari hatue te bebas, basa Hatalla handak uka pahari belom huang kadamai.

¹⁶Basa pahari kilau oloh bawi — je jari percaya dengan Tuhan — kilen ampie pahari tau katawan dengan pasti je pahari dia tau manyalamat[6] banan pahari? Kalote kea pahari kilau ije biti oloh hatue Kristen, kilen ampie pahari tau katawan dengan pasti je pahari dia olih manyalamat kabalin pahari?

¹⁷Keleh genep biti mator pambelom ayue manumon atoh bara Tuhan sama kilau je jari inukas awi Hatalla akae katika Hatalla mantehau ie uka percaya Dengae. Jete atoran je iajarku hong genep ungkup.

¹⁸Paribasae, amon aton ije biti oloh jari inyunat katika ie manarima pantehau Hatalla, maka ela oloh te manggau jalan manganan kare tanda sunat te. Kalote kea amon aton ije biti oloh je hindai inyunat katika ie manarima pantehau Hatalla, ela oloh te balaku inyunat.

¹⁹Basa en oloh manumon atawa dia manumon atoran sunat, sama-sama jaton en-en rimae. Je mambatang iete genep biti manumon kare parentah Hatalla.

²⁰Keleh genep biti tetep belom huang keadaan kilau metoh ie manarima pantehau bara Hatalla.

²¹Amon hong katika pahari intehau, pahari kilau ije biti jipen, dia usah ih pahari heka-heka manirok hal te. Tapi kareh amon pahari mandino katika uka tau bebas, keleh manduan kesempatan jete.[7]

²²Basa ije biti jipen je jari percaya dengan Tuhan, ie te oloh ain Tuhan je bebas. Tuntang ije biti oloh bebas je jari percaya dengan Tuhan, ie te jipen Kristus.

²³Hatalla jari mamili pahari tuntang jari punah regae. Tagal te, ela pahari manyarah arep uka manjadi jipen olon.

²⁴Jadi, pahari handiai, aloh kilen ampie keadaan keton metoh keton intehau, keleh pahari tetep belom kalote hinje dengan Tuhan.

²⁵Toh tahiu kare oloh je hindai kawin. Tahiu hal te aku jaton manarima parentah en-en bara Tuhan. Tapi kilau oloh je tagal asin Tuhan patut imercaya, aku handak manenga nasehat bewei.

²⁶Awi mingat kare kasusah je mamok wayah toh, aku mangkeme labih bahalap amon oloh tetep belom kilau je ie aton ampie wayah toh.

²⁷Amon ije biti Pahari aton sawae, ela ie manggau jalan mangat lapas bara sawae te. Amon ije biti pahari hindai aton sawae, dia usah ie manggau oloh bawi akan sawae.

²⁸Amon Pahari jari kawin, jete dia ie dosa. Kalote kea amon ije biti oloh bawi bujang kawin, ie dia badosa. Baya ewen je kawin te kareh manaharep are kasusah. Tuntang aku handak kare pahari luput bara kare kasusah te.

²⁹Maksud ayungku kalotoh, pahari handiai: katika dia are hindai akan itah. Nampara bara toh, genep oloh je jari kawin dengan oloh bawi, keleh belom kilau jaka ie hindai kawin;

³⁰oloh je manangis, keleh belom kilau jaka ie dia kapehe atei; oloh je tatawe, kilau jaka ie dia hanjak; oloh je jari mamili, kilau jaka ie jaton mingkes taloh en-en,

³¹tuntang oloh je maurus kare hal hong kalunen, keleh belom kilau jaka ie dia inderoh awi kare hal te. Basa dia tahi hindai kalunen jetoh, tumon keadaae wayah toh, akan lilap!

³²Aku handak uka pahari lapas bara kasusah. Oloh je dia kawin dengan oloh bawi, ie handak mambulat tiroke dengan kare hal tahiu Tuhan awi ie handak manyanang atei Tuhan.

³³Tapi oloh hatue je jari kawin, rajin manirok kare hal hong kalunen jetoh, awi ie handak manyanang atei sawae;

³⁴kajariae tiroke tabagi-bagi. Ije biti oloh bawi je dia kawin, atawa ije biti anak bawi bujang, are manirok kare hal tahiu Tuhan, awi ie mipen uka biti-bereng tuntang hambaruae manjadi ain Tuhan. Tapi oloh bawi je jari kawin, mambulat tiroke akan kare hal kalunen jetoh, awi ie mipen manyanang atei banae.

³⁵Aku manyurat taloh handiai toh akan kahalap keton kabuat, dia awiku handak mangahana keton manguan taloh toh te. Je handak inggauku baya uka pahari malalus taloh je bujur tuntang patut, tuntang uka pahari tau bulat tirok akan Tuhan.

³⁶Amon ije biti oloh mangkeme dia malalus kapatute dengan tunangae, amon ie dia olih manyarenan kipee, tuntang ie mangkeme perlu kawin dengan oloh bawi bujang te, keleh ie malalus taloh je ingkemee bahalap.[8] Ie dia badosa, amon ewen kawin.

³⁷Tapi amon ije biti oloh jari manukas huang ateie uka dia kawin dengan tunangae[9] tuntang tukas ateie te dia imaksa, maka taloh je ilaluse te bahalap, asal ie olih malalus jete.

³⁸Jadi, oloh je kawin[10] gawie te bahalap, tuntang oloh je dia kawin[11] gawie te labih bahalap hindai.

³⁹Ije biti oloh bawi je jari kawin, ie heret dengan banae baya katahin banae te belom. Amon banae jari matei, oloh bawi te bebas kawin tinai dengan oloh je eka kanahuange; asal pangawin te pangawin Kristen.

⁴⁰Aloh kalote, ie kareh labih ontong amon ie dia kawin tinai. Jete tirok ayungku kabuat, tapi aku mangkeme taloh je inyewutku te impahayak awi kuasan Roh Hatalla.